A faaite mai na ihea oe i te paariraa.

Ua fanauhia vau i 1966 e ua paari i Taïwan. I tiaturi na to ˈu na metua i te mau haapiiraa a te haapaoraa Taoïsme e ta Bouddha. Noa ˈtu e faahanahana na matou i te mau tupuna e e pure atoa na i mua i te mau tii, aita matou i tiaturi te vai ra te hoê Atua poiete.

No te aha oe i maiti ai i te ihi ora?

I to ˈu tamariiraa, mea au roa na ˈu e haapao i te mau animara. Ua hinaaro vau e haapii eaha te rave ia ore te mau animara, oia atoa te taata, ia mauiui faahou. I muri aˈe, ua haere au i te haapiiraa no te riro ei taote no te mau animara e i muri aˈe, ua rave i te mau maimiraa no nia i te tupuraa o te hoê fanauˈa i roto te opu o to ˈna mama. Ua manaˈo hoi au e tauturu mai te reira ia taa maoti te aha e ora ˈi te animara e te taata.

Na mua ˈˈe, i tiaturi na oe mea tupu noa mai te mau mea atoa. A faaite mai na eaha te tumu.

Tera ta te mau orometua o te haapiiraa teitei i parau e ua na ô atoa mai, e haapapuraa to te reira. Ua tiaturi au i ta ratou i haapii.

No te aha oe i haamata ˈi i te taio i te Bibilia?

A tahi, ua feruri au i roto i tera mau rahiraa atua ta te taata e haamori ra, te vai ra iho â hoê mea rahi aˈe. E titauhia râ ia imi o vai. Te piti, ua ite au o te Bibilia te buka faatura-roa ˈˈe-hia. Ua tamata ïa vau i te haapii i te Bibilia.

I to ˈu haamataraa i te haere i te haapiiraa teitei Katolika o Louvain i Beletita i 1992, ua tomo vau i roto i te tahi fare pureraa Katolika e ua ani i te perepitero ia tauturu mai ia taa i te Bibilia. Aita râ oia i farii.

Mea nafea i noaa ˈi te pahonoraa o ta oe mau uiraa?

E piti matahiti i muri aˈe, te rave noa ra ïa vau i te mau maimiraa i Beletita, ua farerei au i te tahi vahine Ite no Iehova no Poronia o Ruth te iˈoa. Ua haapii o ˈna i te reo Tinito no te tauturu i te mau piahi i te haapiiraa teitei o te hinaaro e ite atu â no nia i te Atua. Tera te pahonoraa o ta ˈu mau pure e ua oaoa roa vau i te farereiraa ia ˈna.

Ua haapapu mai Ruth te tuati ra ta te Bibilia e parau ra i te mau hiˈopoaraa a te mau aivanaa. Ua na ô Davida i te Atua i roto i ta ˈna pure: “Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa ra i te papaihia i roto i te buka na oe; i te mau mahana atoa te raveraahia, e aore roa te hoê i toe.” (Salamo 139:16) Ua tano ta Davida i parau! Noa ˈtu aita te tino o te hoê pêpe i oti atura, ua papai-aˈena-hia te mau aratairaa no nia i to ˈna tupu-maite-raa. I to ˈu iteraa mea tano te Bibilia, ua tiaturi mau vau o te Parau a te Atua te reira. Ua haamata atoa vau i te taa hoê anaˈe Atua mau, o Iehova. ¹

 No te aha oe i papu ai na te Atua i poiete i te mau mea atoa?

Te fa o te mau maimiraa a te mau aivanaa, o te iteraa ïa i te parau mau, e ere râ te imiraa i te haapapuraa o ta vetahi e manaˈo ra. I muri aˈe i ta ˈu mau maimiraa, ua papu roa ia ˈu mea poietehia te mau mea atoa. Ua ite aˈena outou i te feia aravihi e patia i te mau niuniu uira i te vahi taa maitai e i te taime tano mau? Mai tera rii te tupuraa o te pêpe i roto i te opu, ua hau ê râ te faahiahia!

Hoê anaˈe taoˈa tahi ora te itehia i te haamataraa, e ere anei?

E. Mea nainai roa e o ˈna anaˈe i te haamataraa. I muri iho râ, e hamani oia i te tahi atu mau taoˈa tahi ora e e rahi roa mai te reira. E tataipiti to ratou numera i te mau 12 hora atoa e tae atu 24 hora. I te haamataraa iho â e itehia ˈi te mau taoˈa tahi ora tumu. ² E nehenehe hoi ta ratou e hamani na 200 taoˈa tahi ora o te hinaarohia ia oti maitai te tupuraa o te tino o te pêpe mai te mau taoˈa tahi ora no te toto, no te mau ivi, no te mau uaua uira e te vai ra ˈtu â.

E tia ia hamanihia te tahi mau taoˈa tahi ora taa maitai i te taime tano mau e i te vahi i faataahia. Na mua, e haaputuputu e e apǎpǎ ratou ia ratou a hamani atu ai i te mau mero atoa e oti anaˈe te reira e tupu mai ai na avae e rima. Auê te faahiahia i te manaˈo-noa-raa e hamani i tera huru faanahoraa! Ma te faahiahia mau, ua papaihia te mau haamaramaramaraa atoa no nia i te tupuraa o te tino o te hoê pêpe i roto i to ˈna ADN (acide désoxyribonucléique). Ua ite au i te faahiahia o te reira e ua papu atura ia ˈu na te Atua i horoa mai i te ora.

No te aha oe i riro mai ai ei Ite no Iehova?

Hoê noa tumu, no te here. Ua na ô Iesu: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) Eita tera here e maiti i te taata ia au i te fenua no reira mai oia, ia au i ta ˈna mau peu tumu aore ra to ˈna iri. Ua mataitai e ua ite roa vau i tera here i to ˈu haereraa i te putuputuraa a te mau Ite no Iehova.