MEA ino anei te Atua? Mai vetahi, e huru ê paha oe i teie uiraa! No te tahi, tera iho â. Te rahiraa râ te uiui noa ra ïa.

Ua na ô vetahi tei faaruru i te ati natura: “No te aha te Atua e vaiiho ai ia tupu tera mau ati? Aita paha e tâuˈa maira aore ra mea ino iho â o ˈna.”

A taio ai i te Bibilia, ua huru ê atoa te tahi atu i te mau aamu mai te diluvi i te tau o Noa. E uiui ïa ratou: ‘No te aha te hoê Atua aroha i haamou ai i te taata atoa? Mea ino anei oia?’

Peneiaˈe tera atoa ta oe e uiui ra aore ra aita paha ta oe e pahonoraa. A feruri na ïa i to muri nei uiraa.

Mea hinaaro iho â na tatou te parau-tia, area te animara aita ïa. Ua poiete te Atua i te taata ‘ma to ˈna huru.’ (Genese 1:27) Eaha te auraa? E nehenehe ïa e faaite i to ˈna mau huru maitatai. E tuea atoa to tatou manaˈo i to te Atua no nia i te mea maitai e te mea ino. A feruri na: Mai te peu e mea au ore na te taata te ino eita atoa anei ïa te Atua?

Tera iho â ta te Bibilia e parau ra. Te na ô maira te Atua: “To ˈu ra haerea, e teitei ïa i to outou haerea, e to ˈu ra mau manaˈo i to outou ra mau manaˈo.” (Isaia 55:9) Ia parihia e mea ino te Atua, aita anei tatou e parau ra e mea teitei aˈe to tatou haerea i to ˈna? Hou ïa a na reira ˈi, mea maitai ia ite i te tahi pue parau mau. E mea tia ia uiui, no te aha e au ra e mea ino ta te Atua mau haaraa? Na mua, eaha mau na te taata “ino”?

Ia haa te tahi ma te manaˈo ino e parauhia ˈi e taata ino tera. Eita atoa oia e tâuˈa i to vetahi ê ati aore ra mauiui. No reira, mea ino te papa e aˈo i te tamarii no te haamauiui noa ia ˈna. Ei papa maitai râ, e na reira ïa o ˈna no te haapii aore ra paruru atu. E pinepine iho â eita tatou e taa no te aha te taata e rave ai i te tahi mea. E hape hanoa ïa to tatou manaˈo.

E hiˈopoa anaˈe ïa e piti tumu e manaˈo ai te rahiraa e mea ino te Atua. Te mau ati natura e te mau faautuaraa a te Atua i roto i te Bibilia. I reira noa e itehia ˈi mai tera iho â anei oia.