Embimbiliya lia popele ale okuti, koloneke via sulako kua laikele oku iya afengi alua, oku kongelamo ovovei. (Luka 21:11) Pole, afengi aco ka a lomboloka okuti ekangiso li tunda ku Suku. Ocili okuti, Suku o ka tuma Usoma waye oco u ka malako ovovei osi oku kongelamo afengi.

•  Anga hẽ Embimbiliya lia tukuile ale afengi?

•  Suku o kangisa hẽ omanu lovovei?

•  Anga hẽ afengi a siata koloneke vilo ekangiso li tunda ku Suku?

•  Anga hẽ afengi eteke limue ka a ka kalako vali?

•  Ovinimbu Viembimbiliya vi lombolola catiamẽla kovovei

 Embimbiliya ka li tukula afengi ale ovoveyi ndeci, o KOVID-19, o SIDA, o tumbe, o malária ale o gripe Espanyola. Pole olio li popia eci catiamẽla“kafengi” kuenda “kefengi li ponda.” (Luka 21:11; Esituluilo 6:8) Embimbiliya lia popele okuti ovina viaco via laikele oku pita “koloneke via sulako,” vi tukuiwavo okuti, ‘esulilo liovina vi kasi voluali.’—2 Timoteo 3:1; Mateo 24:3.

 Embimbiliya li popia okuti olonjanja vimue, Suku wa kangisa omanu lovovei. Ndeci, eye wa koka okuti omanu vamue va kuatiwa lovilundu. (Atendelo 12:1-16; 2 Olosoma 5:20-27; 2 Asapulo 26:16-21) Pole, wa ci linga lika lomanu vamue kuenda ovovei aco ka a-a sambukilile omanu vakuavo. Ocili okuti ovovei aco, Suku wa kangisa la-o ño omanu vana va linga ovina ka via sungulukile.

 Sio. Omanu vamue va popia okuti, Suku o kangisa omanu lafengi kuenda ovoveyi akuavo. Pole, haicoko Embimbiliya li longisa. Momo lie hacoko?

 Ndeci, afendeli vamue va Suku kosimbu kuenda koloneke vilo, va liyakavo locitangi coku vela. Umue pokati komanu vaco va liyaka loku vela, Timoteo. (1 Timoteo 5:23) Pole, Embimbiliya ka li lombolola okuti ca kala ekangiso lia Suku. Koloneke vilo, afendeli vamue va Suku vakuekolelo, va siatavo oku kuatiwa lovoveyi kuenje va vela. Pole, olonjanja vialua, va pita lovina viaco omo va kala pocitumãlo haicoko kuenda velivala halioko.—Ukundi 9:11.

 Handi vali, Embimbiliya lilongisa okuti ka ya pitĩlilepo otembo ya Suku yoku kangisa omanu olondingãivi. Ocili okuti tu kasi “keteke lieyovo,” ale koloneke Suku a kasi oku eca epuluvi komanu oco vo kũlĩhe kuenda oku popeliwa. (2 Va Korindo 6:2) Eye o kasi oku ci linga lekuatiso liupange woku kunda voluali luosi esapulo limue lia sunguluka, okuti ‘olondaka viwa Viusoma’ wa Suku.—Mateo 24:14.

 Oco. Embimbiliya li popia okuti kovaso yoloneke ovoveyi ka a ka kalako vali. Ndopo Usoma wa Suku u ka malako ovitangi viosi vioku vela. (Isaya 33:24; 35:5, 6) Eye o ka malako ohali, evalo kuenda olofa. (Esituluilo 21:4) Suku o ka pindula omanu vana va fa. Omanu vaco va ka kuata uhayele wa lipua kuenda oku kala vocumbo celau palo posi.—Olosamo 37:29; Ovilinga 24:15.

 Esituluilo 6:8: “Noke nda mola okavalu ka yeluluka kuenda u wa tumãlako o kuete onduko okuti Kufa. Kuenje Eyambo lio kuama. Va va ĩha omoko . . . okuti va ponda . . . lefengi li ponda.”

 Eci ci lomboloka nye? Ocitumasuku cotuvalu tu kuãla ca tukuiwa kelivulu Liesituluilo, ci lekisa okuti afengi a laikele oku pita koloneke vietu