Ombuto yocikũla ci tukuiwa okuti eyo liohosi, yi kasivo pokati koviluvo via velapo vi palãlã voluali. Nda ofela yi sikila kolonelẽho yimosi lieyo liohosi, olohuluwa vialua violombuto vitito vi ambatiwa lofela, ci kala ndu okuti vi kasi oku pãlãlela vilu. Ndaño okuti yi kala vilu ocipepi longongo, vimue pokati kavio vi pondola oku telela ci soka (0.6 kolokilometulu) ale ceci ci pitahãla. Nye ci kuatisa ombuto yocikũla caco oku kala vilu otembo yalua? Olonoño via limbuka okuti, ombuto yocikũla ci tukuiwa eyo liohosi yi kala vilu otembo yalua momo yi pãlãla lonjila yimue okuti, ci pitahãla olonjanja vikuãla kuenda ya kolapo okuti, ukuakuenda loparakeda o sule.

 Konomuisa: Onepa lonepa yombuto yaco, yi tundila kuti umue kilu liongalo kuenda ombuto yaco yi kasi ndoluvi. Oluvi luaco lu kasi kombuto lieyo liohosi, oluo lu kuatisa ombuto yaco oku pãlãla.

 Oluvi luaco, lukuetevo ocikele cikuavo ci kuatisa ombuto oku amamako oku pãlãla. Osimbu ofela yamamako oku sika loku veta kutue wonelẽho yaco, oyo yi fetika oku pãlãla. Osimbu ofela yi sika loku veta vemẽhi lioluvi luonelẽho, ci kuatisa okuti onelẽho yamamako oku pãlãla okuti ka yi patuka lonjanga.

 Omo liaco, tu pondola oku popia okuti, oluvi luaco lu ecelela okuti ombuto yaco, yi kala ndoparakeda yimue okuti, ya pangiwa ciwa hayo ya kolapo. Handi vali, oluvi luaco lua lela calua!

 Olonoño vi kasi oku likolisilako oku kũlĩha ciwa oku pãlãla kuombuto yocikula ceyo liohosi oco vi mioñolole uloño wavo. Onjila yimue yoku talavaya lolonumbi viaco, oku linga esokiyo lioku talavaya lotulomakina tu tukuiwa okuti olodrone vitito vi kasi ndombalãu, okuti ka ci sukila oku pesela ongusu yalua. Olodrone viaco, vi kuete olonjila vialua via litepa vioku talavaya lavio oku kongelamo oku yelisiwa kuofela.

 Nye o sima? Oku palãlã kuombuto yocikũla ci tukuiwa okuti eyo liohosi kua tukuluka ño? Ale kua lulikiwa?