Ku Tiago 1:1-27
1 Ame Tiago+ ndupika wa Suku kuenda wa Ñala Yesu Kristu, ndi sonehela ovikoti 12 via sanduiwa:
Ovilamo!
2 A vamanjange, sanjuki calua eci vu liyaka loloseteko viñi viñi,+
3 omo wa kũlĩhi okuti oku setekiwa kuekolelo liene, ku koka epandi.+
4 Pole, eceleli okuti epandi li tẽlisa ocimãho calio okuti, vu kanguka kuenda vu kala ciwa kovina viosi vu linga kuenje lacimue cu kambeli.+
5 Omo liaco, nda umue pokati kene wa kamba olondunge, amameko oku pinga ku Suku,+ momo eye eca calua ku vosi lutima waye wosi, halokupisako*+ kuenje ovio vi ka eciwa kokuaye.+
6 Puãi amameko oku pinga lekolelo,+ halokutatãlako,+ momo una o tatãla wa soka lakimba okalunga a tumõhaila oko loko omo liofela.
7 Kuenje omunu waco, ka ka lavoke oku tambula cimue ku Yehova;*
8 momo eye ukuavitima vivali,+ haeye ukuatatahãi kolonjila viaye viosi.
9 Pole, manji ohukũi a sanjukile* oku kemãlisua kuaye,+
10 kuenda ohuasi yi sanjukilevo oku liketisua kuaye,+ momo eye o kowuka ndonelẽho yovusenge.
11 Momo ndeci ekumbi li tunda lowuya walio walua kuenje li kukutisa ovikũla kuenda olonelẽho vialio vi kupuka kuenje oku fina kuavio ku imũha, cimuamue haico ohuasi yi ka nyõleha osimbu yi sanda ovokuasi.+
12 Wa sumũlũha omunu una o pandikisa koseteko,+ momo eci a yula oseteko, o ka tambula ekolowa liomuenyo,+ lina Yehova* a likuminya ku vana vamamako oku U sola.+
13 Eci umue a setekiwa, ka ka popie hati: “Ñasi oku setekiwa la Suku.” Momo Suku ka setekiwa leci cĩvi kuenda eye ka seteka laumue.
14 Pole, omunu lomunu, o setekiwa eci a kokiwa loku tambiwa* loloñeyi viaye muẽle.+
15 Kuenje eci oloñeyi vi mina, vi cita ekandu; lekandu eci li lingiwa, li koka olofa.+
16 A vamanjange wa soliwi, ko ka kembiwi.
17 Ongavelo yosi yiwa, lombanjaile yosi ya lipua,+ vi tunda kilu ku Isia yovinyi+ una okuti, ka pongoloka ndaño oku ñualapo ndulembo.*+
18 Mekonda liocipango caye, wa tu nena komuenyo omo liondaka yocili+ okuti, tu linga apako atete oviluvo viaye.+
19 A vamanjange wa soliwi, kũlĩhi okuti: Omunu lomunu a kale ukuanjanga koku yevelela, a livale koku popia,+ a livale konyeño,+
20 momo onyeño yomunu ka yi tuala kesunguluko lia Suku.+
21 Omo liaco, imbipo eliño liosi, levĩho liosi*+ kuenda tavi lumbombe ondaka ya kũliwa la Suku yina yi tẽla oku vu popeli.
22 Pole, lingi vakuakutẽlisa ondaka+ okuti, vakuakuyeva lika haivo va likembisa ño lovisimĩlo viesanda, hacoko.
23 Momo nda umue ukuakuyeva lika ondaka, pole, ka yi tẽlisa,+ wa lisoka lomunu o vanja ocipala caye muẽle volumuĩlo.
24 Eye o li vanja eye muẽle, noke enda kuenje vepuluvi liaco, haico a ivalako ndomo a kasi.
25 Puãi omunu o vanja vanja sũi vocihandeleko ca lipua+ haico ci tuala keyovo kuenje amamako laco, ka lingi ukuakuyeva lika okuti haico a ivalako, pole, o linga ukuakutẽlisa upange; kuenda o ka sanjuka kueci a linga.+
26 Nda umue o sima okuti ufendeli wa Suku,* pole, ka kapi olelia* kelimi liaye,+ o kasi oku kemba utima waye muẽle kuenje efendelo liaye ka li kuete esilivilo.
27 Onjila yoku fendela* ya lipua haiyo ya pua evĩho kovaso a Suku yetu haeye Isia, yeyi: oku tata olosiwe+ kuenda ovimbumba+ kohali yavo,+ loku li lava keliño lioluali.+
Atosi Pombuelo
^ Ale “oku sanga eko.”
^ Tala Alombo. A5.
^ Lit., “oku lipanda.”
^ Tala Alombo. A5.
^ Ale “oku yonjiwa lonulo.”
^ Ale “kokuaye ka kuli epongoloko liulembo.”
^ Ale pamue, “evĩho lialua.”
^ Ale “ukuetavo.”
^ Ale “ka likandangiya.”
^ Ale “etavo.”
