Tu lomboluileko catiamẽla koku kula kuove.

Nda citiwa kunyamo 1979, kofeka yo Estados unidos. Eci nda kuata anyamo atatu, olonjali viange via linyãla. Nda kulila ketavo lia va Yudea kuenda nda tangela kolosikola vietavo liaco. Eci nda kuata anyamo epanduvali, tua ilukila ko Isareli kuna tua kala unyamo umosi kuenda nda tangela kosikola yimue vimbo limue kua enda oku lingiwa upange wowuiñi yi tukuiwa okuti, kibutz. Noke ame la ina yange tua ilukila kofeka yo Mesiko.

Vimbo liaco ka kua kaile onembele yimue, pole, nda amamako oku kuama oviholo via va Yudeia viokuti: Oku taimisa olovela volocasapalo, oku tanga elivulu lia Torá kuenda oku likutilila lekuatiso lielivulu liolohutililo li tukuiwa sidur. Kosikola, nda enda oku sapuila ku vana tua tangela kumosi okuti etavo liange olio liatete voluali. Lalimue eteke nda tangele Otestamentu Liokaliye li lombolola upange woku kunda wa Yesu Kristu kuenda alongiso aye. Ina yange wa ndi handelekele okuti ka citava oku ci linga, momo wa kuatele usumba wokuti ndi yapuisiwa lalongiso aco.

Momo lie wa nolelapo oku tanga Otestamentu Yokaliye?

Eci nda tẽlisa 17 kanyamo, nda tiukila ko Estados Unidos oco ndi malusule oku tanga. Kofeka yaco, omunu umue nda kũlĩhĩle wa ndi sapuila okuti Ukristão kuenda okuti si kuata ekalo liwa komuenyo nda sia kũlĩhĩle Yesu.

Ame ndo tambulula hati: Omanu vosi va tava ku Yesu va nyẽlela.

Eye wa ndi pula hati: “Ove wa tanga ale Otestamentu Yokaliye?”

Ame ndo tambulula hati, “Sio”.

Eye hati: “Ku simi hẽ okuti o kasi oku vangula catiamẽla kocina cimue kua kũlĩhĩle?”

 Olondaka viaco via ndi vetiya calua momo, nda simile okuti uveke oku vangula catiamẽla kocina cimue kua kũlĩhĩle. Nda yuvula epela, ndambata Embimbiliya liaye konjo yange kuenje nda fetika oku tanga Otestamentu Yokaliye.

Oku tanga Otestamentu Yokaliye ca ku vetiya ndati?

Nda komõha poku limbuka okuti asonehi Votestamentu Yokaliye va kala va Yudea. Olonjanja viosi ndi tanga, nda enda oku limbuka okuti Yesu wa kala u Yudea umue ukuacikembe, kuenda ukuembombe wa yonguile oku kuatisa omanu okuti, oku va talisa ohali hacoko. Nda enda voviseleko vialivulu oco ndi lande alivulu a lombolola catiamẽla kokuaye. Pole, ka kua kaile elivulu lia ndi vetiya oku tava okuti Yesu wa kala Mesiya. Alivulu amue a popia okuti eye wa kala Suku, okuti ocina cimue ka ca kuatele elomboloko kokuange. Oco hẽ, kulie Yesu a enda oku likutilila? Kokuaye muẽle? Handi vali, Yesu wa fa. Pole, catiamẽla ku Suku Embimbiliya li popia hati: ‘Suku ka fi.’ *

Wa tẽla ndati oku yula atatahãi aco?

Ocili ka ci pondola oku lipatãla kuenda ame nda nõlelepo oku sanda ocili. Omo liaco, lasuẽlela vovaso nda likutilila ku Suku lutima wosi pole, sia kuamele elivulu liange liohutililo. Eci nda malusula oku likutilila, omunu umue wa totola pepito. Va kala Olombangi vivali Via Yehova. Ovo va nyĩha ombrocura yimue oco ndi kuate elomboloko Liembimbiliya. Ombrocura yaco kuenda olombangulo vialua nda kuata Lolombangi Via Yehova, via ndi vetiya oku tava okuti alongiso avo a kunamẽla Vembimbiliya. Ndeci, ovo ka va tava kelongiso liokuti Yesu o panga onepa Kusuku Umosi Muvatatu, pole va tava okuti eye “omõla a Suku” * kuenda “efetikilo lioviluvo viosi via Suku.” *

Noke yotembo yimue, nda tiukila ko Mesiku kuna nda amamako oku lilongisa Lolombangi Via Yehova ovitumasuku viatiamẽla ku Mesiya. Nda komõha poku mola okuti Vembimbiliya muli ovitumasuku vialua! Pole, handi nda kuatele atatahãi. Nda enda oku lipula ndoco: ‘Yesu eye lika wa ponduile oku tẽlisa ovitumasuku viaco?’ kuenda ‘Anga Yesu ka lingile ño ocindekaise ca Mesiya?’

Nye ca ku kuatisa oku malako atatahãi aco?

Olombangi Via Yehova via ndi lekisa ovitumasuku ka via ponduile oku tẽlisiwa lomunu ukuavo. Ndeci, osimbu ka papitile 700 kanyamo, uprofeko Mika wa popele okuti Mesiya wa laikele oku citiwa ko Beteleme, vo Yudea. * Omunu umue o pondola hẽ oku nõla ocitumãlo a citiwila? Uprofeto Isaya wa soneha okuti Mesiya wa laikele oku pondiwa ndondingaĩvi pole, o kendiwa lolohuasi. * Ovitumasuku viaco viosi via tẽlisiwila ku Yesu.

Ocina cimue ca ndi vetiya calua oku tava, ovina viatiamẽla kocikoti cepata Yesu a laikele oku citiwa. Embimbiliya li popia okuti Mesiya wa laikele oku kala ocitumbukila ca Soma Daviti. * Omo okuti va Yudea va enda oku seleka ovisonehua viatiamẽla kovikoti, nda okuti Yesu ka kaile ukuacitumbulukila ca Daviti, ovanyãli vaye nda va ci sandeka voluali luosi! Pole, ovo ka va ci lingile momo, lomue wa ponduile oku likala okuti Yesu wa kala ukuacitumbulukila ca Daviti. Handi vali, omanu va enda oku u tukula hati, “Omõla a Daviti.” *

Kunyamo 70 K. K, eci papita 37 kanyamo tunde eci Yesu a fa, asualali vo ko Roma va kundula o Yerusalãi kuenje ovisonehua viatiamẽla kovikoti via nyõliwa. Omo liaco oco ku lekisiwe ocikoti Mesiya a citiwila, eye wa sukilile oku molẽha osimbu unyamo 70 K.K. ka wa pitĩlile.

Ovina wa lilongisa via ku vetiya ndati?

Kelivulu Liesinumuĩlo 18:18, 19, Suku wa popia okuti wa laikele oku katuila ku va Isareli uprofeto umue nda Mose. Suku hati: “Ndi kangisa omunu wosi ka yevi olondaka viange vina eye a ka vangula vonduko yange.” Poku lilongisa Embimbiliya liosi ondongonsi, ca ndi kuatisa oku tava okuti Yesu u Nasara eye wa kala uprofeto waco.