VOKUENDA kuanyamo a pita, manji Rúbia (1) okuti cilo o kuete 30 kanyamo, wa linga ungende woku ka nyula manji Sandra (2) ukundi wa velapo okuti, wa kala vekongelo limue litito kombuelo yofeka yo Brasil. Osimbu manji Rúbia a kala volupale luaco, wa mola ovina vimue vio komohisa calua, kuenje, vio vetiya oku linga apongoloko komuenyo. Ovina vipi a mola? Tu kũlĩhĩsi ulandu waye.

“Eci manji Sandra a ndi laleka oku ka nyula ukãi umue a kala oku longisa Embimbiliya, vokuenda kuelilongiso, wa popia hati: ‘A Sandra, kupange ndi talavaya, kuli amalẽhe vatatu afeko va yongola oku lilongisa Embimbiliya. Pole, nda va sapuila okuti, va sukila oku kevelela toke eci ove o tiuka onjanja yikuavo. Momo nda kũlĩha okuti, unyamo ulo, o kuete upange walua.’ Sia tavele kovina nda yeva. Omanu vana va yongola oku kũlĩha Yehova, va sukila oku kevelela oco va longisiwe! Vekongelo nda kala, ka ca lelukile oku sanga omunu umue o tava oku lilongisa  Embimbiliya. Osimbu ka tua tundile konjo yukãi waco, nda kuata onjongole yoku kuatisa omanu volupale luaco lutitio. Noke, nda tunda volupale lunene nda kala, kuenje, nda ilukila volupale lutito, muna manji Sandra a kala oku talavaya kupange wakundi vavelapo.”

Nye manji Rúbia a linga eci a pitĩla volupale luaco? Eye wa popia hati: “Noke yolosãi vivali tunde eci nda iluka, nda fetika oku longisa Embimbiliya kueci ci soka 15 komanu. Vokuenda kuotembo, nda kuatavo omanu valua va lekisa onjongole yoku lilongisa Embimbiliya ndeci ca pita la manji Sandra!”

Manji Diego (3), okuti cilo o kuete ci pitahãla 20 kanyamo, wa nyula manji umue lukãi waye va kala kupange wakundi vavelapo volupale lumue lutito lu tukuiwa hati Prudentópolis, kombuelo yo Brasil. Noke yepasu liaco, wa komõha calua, kuenje wa vetiyiwa oku vokiya upange woku kunda. Eye wa lombolola hati: “Vekongelo nda kala, ndaenda oku pesila otembo yitito kupange woku kunda. Eci nda nyula akundi vaco va velapo loku yevelela ovolandu avo, sia tẽlele oku va kuatisa. Kuenje, nda limbuka okuti va kuata esanju lialua, pole, sia kuatele esanju omo liowesi kupange woku kunda. Esanju liavo, lia ndi vetiya oku linga apongoloko komuenyo, oco ndi kuatevo esanju.” Noke yepasu liaco, manji Diego wa iñilavo kupange wakundi vavelapo.

Anga hẽ ove umalẽhe umue okuti wa siata oku endaenda kupange woku kunda, kuenda kolohongele, pole o kuete ocitangi ndeci ca pita la manji Diego okuti tete wa kuata owesi woku endanda kupange woku kunda? Nda o kuete ocitangi caco, o pondola hẽ oku pongolola ekalo liomuenyo wove oco o kuate esanju li tunda koku kundila kovikanjo kuna ka kuli akundi valua Vusoma? Pamue osima okuti, ka ca lelukile oku siapo ekalo liwa liomuenyo wove. Pole, amalẽhe valua va siata oku leluisa omuenyo wavo. Ovo va ci linga poku pongolola ovimãho viavo, kuenje, va tiamisila utima kupange wa Yehova. Tu konomuisi ulandu wa manji Bruno.

Vokuenda kuanyamo a pita, manji Bruno (4), okuti cilo o kuete 28 kanyamo, wa lilongisa uloño woku imba ovisungo kosikola yimue ya kemãla, kuenda wa kuata ocimãho coku kala usongui wocimunga colonjimbi. Eye wa  amamako oku lilongisa kosikola yaco, kuenje, olonjanja vimue, wa enda oku lalekiwa oco a songuile ocisoko colonjimbi. Manji Bruno wa enda oku fetiwa olombongo vialua omo liuloño waye. Eye wa popia hati: “Ndaño ndi kuete uloño waco, pole, nda limbuka okuti, nda kambela ocina cimue komuenyo wange. Ndaño nda li tumbikile ku Yehova, pole sia kalele oku u vumba lutima wosi, kuenda nda sumuile calua. Kuenje, nda likutilila ku Yehova loku situlula ovisimĩlo viange, kuenda nda sapela la vamanji va loñoloha. Noke yoku konomuisa lutate ocitangi caco, nda nõlapo oku pesila otembo yalua kupange woku kunda okuti kovisikilo ci sule. Eci nda mala elilongiso liaco, nda liyaka locitangi coku nõla oku ka kundila kocikanjo kuna kuli ekambo liakundi Vusoma.” Manji Bruno wa yula ndati ocitangi caco?

Manji Bruno wa ilukila volupale luo Guapiara, (lu kuete 7.000 komanu) okuti, lu kasi ocinãla ci soka (260 kolokilometulu) oku tunda volupale luo São Paulu. Eye wa linga epongoloko limue linene. Omo liaco, wa popia hati: “Nda ilukila vonjo yimue yitito okuti ka muli onjilela, o Televisãu kuenda o Internet. Pole, kocitali conjo yaco, kua kala ovina vimue okuti lalimue eteke nda vi kuatele ndeci: Ocumbo colonelẽho, kuenda ocitaka coviti viapako!” Osimbu manji Bruno a kala oku kuatisa vekongelo liaco litito, wa enda oku ambata komoto yaye okulia, ovava, kuenda alivulu onjanja yimosi vosemana, oco a ka kundile kovaimbo a kasi ocipãla. Omanu valua va kasi vovaimbo vaco lalimue eteke va yevele esapulo liolondaka viwa. Omo liaco, manji Bruno wa popia hati: “Nda longisa Embimbiliya kueci ci soka 18 komanu. Kuenje, nda kuata esanju lialua poku mola ndomo omanu vaco va linga apongoloko komuenyo wavo!” Eye wa amisako hati: “Nda limbuka okuti, nda sanga ocina ca ndi kambelele komuenyo wange. Ocina caco, esanju li tunda koku pitisa kovaso Usoma wa Suku. Nda nda pitisile kovaso upange woku nganyala olombongo, nda sia kuatele esanju ndi kuete cilo.” Eci manji Bruno a kala volupale luo Guapiara, wa tẽla ndati oku landa ovina a sukilile? Lesanju lialua wa popia hati: “Nda tẽla oku landa ovina nda sukilile poku longisa omanu oku sika oviyola.” Omo liaco, manji Bruno wa amamako lupange waye woku sika.

Manji Mariana (5), okuti cilo o kuete ci pitahãla 20 kanyamo, wa liyakavo locitangi ndeci ca pita la manji  Bruno. Ndaño wa kala onganji kuenda wa enda oku nganyala olombongo vialua, pole, wa limbuka okuti, ka kuatele esanju komuenyo. Omo liaco, wa popia hati: “Nda limbuka okuti, upange wange wa kala ndomunu ‘o seteka oku kuata ofela.’” (Uku. 1:17) Vamanji valua, va ndi vetiya oku litumbika kupange wakundi va velapo. Manji Mariana noke yoku sokolola lutate ondaka yaco, eye kumue lakamba vaye ndeci: Bianca (6), Caroline (7), kuenda Juliana (8), va nõlapo oku kuatisa ekongelo limue li kasi volupale luo Barra do Bugres, ocipepi lofeka yo Bolivia okuti lu kasi ocipãla lonjo yavo. Nye ca pita lavo noke?

Manji Mariana wa popia hati: “Nda yonguile oku kala lika olosãi vitatu volupale luaco. Pole, kesulilo liotembo yaco, nda kala oku longisa Embimbiliya ci soka 15 komanu! Kuenje, omanu vaco va sukilile ekuatiso oco va pamise ekolelo liavo. Pole, sia kuatele utõi woku va sapuila okuti, ndi yongola oku tiukila. Omo liaco, nda amamako oku kala volupale luaco.” Kuenje, akamba vaye vatatu, va nõlapovo oku kala volupale luaco. Anga hẽ manji Mariana wa kuata esanju omo lionjila a nõlapo? Eye wa popia hati: “Ndi kuete esanju lialua, momo Yehova wa ndi nõla oco ndi kuatise omanu oku linga apongoloko komuenyo wavo. Cilo, ndi kuete esumũlũho lialua omo lioku limbuka okuti, ndi kasi oku pesila otembo yange kovina vi kuete esilivilo lia velapo.” Manji Caroline wa lombololavo ovisimĩlo viaye kuenda viakamba vaye vatatu a kala lavo poku popia hati: “Poku pekela, ndi kuata esanju lialua eci ndi sokolola okuti, ndi kasi oku pesila otembo yange kupange woku kunda esapulo Liusoma. Ndi tiamisila lika utima wange koku kuatisa omanu ndi longisa Embimbiliya. Nda komõha calua poku limbuka ndomo va kasi oku pamisa ekolelo liavo. Omo liaco, ndi tava kolondaka Viembimbiliya vi popia hati: ‘Seteki oco vu limbuke okuti Yehova ukuahenda.’​—Osa. 34:8.

Yehova o sanjuka calua poku mola ndomo amalẽhe valua voluali luosi va kasi oku ‘lieca olumue’ kupange woku kundila olondaka viwa Viusoma kovaimbo a kasi ocipãla! (Osa. 110:3; Olosap. 27:11) Omo liaco, vamanji vosi va lieca kupange waco, va siata oku tambula asumũlũho alua a Yehova.​—Olosap. 10:22.