“Cosi o yongola, sapuileko, ndi sanjukila oku ci linga.” Ove citava okuti o kuata ohele oku sapuila olondaka evi komunu umue kua kũlĩhile ale komunu umue wa li kũlĩhi ño konduko. Pole ku kuata ohele poku vi sapuila ekamba liove liocili. Ekamba liocili ka li kuata ohele yoku linga eci ukuavo o pinga.

Embimbiliya li lekisa okuti, olonjanja viosi Yehova o linga eci a kũlĩha okuti ci sanjuisa afendeli vaye. Soma Daviti, una wa kuatele ukamba la Suku wa popia hati: “A Yehova Suku yange, ovikomo wa linga, lovisimilo wa tu simila, via lua cimue. . . . Nda ka ca tavele oku vi tenda, omo via lua enene!” (Osamo 40:5) Handi vali, Yehova wa siatavo oku sanjuisa vana ka vo kũlĩhile poku ‘kutisa ovitima viavo loku va iha okulia kuenda esanju.’—Ovilinga 14:17.

Omo okuti Yehova o linga ovina vi sanjuisa vakuavo, vana va yongola oku kuata ukamba Laye, va sukilavo oku linga ovina vi “sanjuisa utima waye.” (Olosapo 27:11) Pole nye ove o sukila oku linga oco o sanjuise Suku? Embimbiliya li tambulula ndoco: “Ko ka ivaliko oku lingainga ciwa, loku liavela pokati, momo Suku o sanjukila ovilumba ndevi.” (Va Heveru 13:16) Anga hẽ, eci ci lomboloka okuti oku lingila vakuetu ovina viwa kuenda oku liavela pokati oco lika ci sukiliwa koku sanjuisa Yehova?

Embimbiliya li popia hati: “Oku sunguluka ku Suku ka ku tẽliwa te lekolelo.” (Va Heveru 11:6) Eci oco ca pita la ‘Avirahama okuti omo lioku kolela Yehova, vo tukula vati, ekamba lia Yehova.’ (Tiago 2:23) Yesu Kristu wa lekisavo okuti nda tu yongola oku tambula esumũlũho lia Suku tu sukila oku ‘kolela Suku.’ (Yoano 14:1) Oco hẽ ndamupi o pondola oku kuata ekolelo lina Suku a lavoka ku vana a yongola oku kokela kokuaye? Ove o pondola oku fetika oku ci linga poku lilongisa Embimbiliya olonjanja viosi. Poku ci linga, o ka kuata “ukũlĩhiso wocipango caye” kuenda o ka lilongisa ndomo o pondola oku ‘u sanjuisa.’ Osimbu ukũlĩhiso wove watiamẽla ku Yehova u livokiya poku kapako olonumbi viaye viesunga, ekolelo liove kokuaye li ka livokiya kuenje o ka kuata ukamba laye.—Va Kolosai 1:9, 10.