ہم اکثر یہ سوچتے ہیں کہ اِنسان کیوں مرتے ہیں، خاص طور پر اُس وقت جب ہمارا کوئی اپنا فوت ہو جاتا ہے۔ پاک کلام میں لکھا ہے:‏ ”‏وہ ڈنک جس سے موت آتی ہے، گُناہ ہے۔“‏—‏1-‏کُرنتھیوں 15:‏56‏۔‏

سب لوگ کیوں گُناہ کرتے ہیں اور مرتے ہیں؟‏

 پہلے اِنسانوں یعنی آدم اور حوا نے خدا کے خلاف گُناہ کِیا اور یوں اپنی زندگی گنوا دی۔ (‏پیدایش 3:‏17-‏19‏)‏ اُنہوں نے خدا کے خلاف بغاوت کی جس کا نتیجہ صرف موت ہی ہو سکتا تھا کیونکہ خدا تو ”‏زندگی کا چشمہ“‏ ہے۔—‏زبور 36:‏9؛‏ پیدایش 2:‏17‏۔‏

 آدم نے اپنی تمام اولاد کو بھی گُناہ کی بیماری ورثے میں دی۔ پاک کلام میں لکھا ہے:‏ ”‏ایک آدمی کے ذریعے گُناہ دُنیا میں آیا اور گُناہ کے ذریعے موت آئی اور موت سب لوگوں میں پھیل گئی کیونکہ سب نے گُناہ کِیا۔“‏ (‏رومیوں 5:‏12‏)‏ لہٰذا سب لوگ اِس لیے مرتے ہیں کیونکہ ”‏سب نے گُناہ کِیا ہے۔“‏—‏رومیوں 3:‏23‏۔‏

موت کو کیسے ختم کِیا جائے گا؟‏

 خدا نے ایک ایسے وقت کا وعدہ کِیا ہے جب ”‏وہ موت کو ہمیشہ کے لئے نابود کرے گا۔“‏ (‏یسعیاہ 25:‏8‏)‏ موت کو ختم کرنے کے لیے وہ اِس کی جڑ یعنی گُناہ کو ختم کرے گا۔ خدا یسوع مسیح کے ذریعے ایسا کرے گا ’‏جو دُنیا کے گُناہ دُور کر دیتے ہیں۔‘‏—‏یوحنا 1:‏29؛‏ 1-‏یوحنا 1:‏7‏۔‏