Voiz 7:1-29
7 Yaxshi nom qimmatbaho moydan+, o‘lim kuni esa tug‘ilgan kundan yaxshiroqdir.
2 Ziyofat uyiga borgandan ko‘ra+, azador uyga borish yaxshiroq, chunki har bir odam o‘limga duchor bo‘ladi. Tiriklar buni yodda tutsin.
3 Kulgidan ko‘ra qayg‘u afzalroqdir+, sababi, yuzdagi g‘am qalbni go‘zallashtiradi+.
4 Dononing yuragi azador uyda, nodonning yuragi esa ziyofat* uyidadir+.
5 Ahmoqlarning qo‘shig‘ini eshitgandan ko‘ra, dononing tanbehiga quloq solgan yaxshiroq+.
6 Ahmoqning kulgisi+ qozon tagida chirsillab yonayotgan tikanga o‘xshaydi. Bu ham behudadir.
7 Jabr-zulm dononi aqlsizlik qilishga undaydi, pora esa qalbni buzadi+.
8 Ishning oxiri boshlanishidan afzalroq. Sabrli bo‘lish, takabbur bo‘lgandan yaxshiroqdir+.
9 Arazchi bo‘lma*+, chunki gina-kudurat ahmoqlar ko‘nglida in quradi*+.
10 «Avvalgi kunlar hozirgidan yaxshi edi»,— dema. Dono odam bunday demaydi+.
11 Donolik merosga qo‘shilib kelsa yaxshidir, yorug‘ dunyoda yurganlar uchun foydalidir.
12 Chunki pul odamga himoya berganiday+, donolik ham uni himoyalaydi+. Ammo bilim va donolikning ustunligi shundaki, ular o‘z sohibining hayotini saqlaydi+.
13 Allohning ishlariga nazar sol: U egri qilgan narsani kim ham to‘g‘rilay olardi?!+
14 Yaxshi kunda shod-xurram bo‘l+, yomon kunda esa shuni yodda tutginki, yaxshi kunni ham, yomon kunni ham Xudo beradi+. Shu bois, odamzod kelajakda u bilan nima bo‘lishini bila olmaydi+.
15 O‘tkinchi hayotim davomida+ barcha narsani ko‘rdim: odil kishi odilligiga qaramay barvaqt o‘lar ekan+, yovuz kishi esa yovuzligiga qaramay, uzoq yashar ekan+.
16 Haddan oshiq odil bo‘lma+, o‘zingni ortiq darajada dono qilib ham ko‘rsatma+. Nega endi o‘zingni halok qilishing kerak?!+
17 Yovuzlikka berilib ketma, aqlsiz ham bo‘lma+. Nima uchun bevaqt o‘lishing kerak?!+
18 Birinchi ogohlantirishga quloq sol, ikkinchisini ham unutma+. Chunki Xudodan qo‘rqqan ikkisiga ham rioya qiladi.
19 Donolik insonni shahardagi o‘nta baquvvat kishidan ham kuchliroq qiladi+.
20 Boisi, yer yuzida doimo yaxshilik qilib, hech qachon gunoh qilmaydigan insonning o‘zi yo‘qdir+.
21 Odamlarning har bir so‘zini yuragingga yaqin olaverma+, yo‘qsa xizmatkoring seni yomonlayotganini eshitib qolasan.
22 Axir o‘zing ham boshqalarni ko‘p marotaba yomonlaganingni yaxshi bilasan-ku!?+
23 Bularning barini donolik ila tekshirib, o‘zimga: «Dono bo‘layin»,— deb aytdim. Lekin donolik mendan ancha yiroqda ekan.
24 Bo‘lib o‘tgan narsalarning tagiga yetib bo‘lmaydi, chunki ular tubsizdir. Bularni kim ham anglab yetardi?!+
25 Men qalbimni donolik va mavjud narsalarni bilishga, o‘rganishga va izlashga moyil qildim. Ahmoqlik — yovuzlik ekanini, nodonlik — telbalik ekanini tushunishga intildim+.
26 So‘ng shuni bilib oldim: ovchining tuzog‘iga o‘xshagan ayol o‘limdan ham achchiqroqdir. Uning qalbi to‘r, qo‘llari esa zanjir kabidir. Allohga ma’qul kelmoqchi bo‘lgan odam undan qochib qutiladi+, gunohkor esa uning o‘ljasiga aylanadi+.
27 «Men nimani anglab yetganimga diqqat qiling,— deydi voiz+. —Xulosa qilish uchun har narsani birin-ketin o‘rganib chiqdim,
28 ammo tinmay izlasam-da, qidirganimni topmadim. Mingta erkak ichidan birgina odil erkakni topdim, lekin ayollar orasidan bironta ham odil ayolni topa olmadim.
29 Men yagona bir to‘xtamga keldim: Alloh insoniyatni odil qilib yaratgan+, ammo ular o‘z maqsadlari payida bo‘lishgan»+.
Izohlar
^ Yoki «xursandchilik, o‘yin-kulgi».
^ Boshqa variant «ahmoqlik belgisidir».
^ So‘zma-so‘z «Xafa bo‘lishga shoshma».
