Ee, hu na vhafumakadzi vhanzhi u mona na ḽifhasi vhane vha vha Ṱhanzi dza Yehova, vhane vha ḓivhadza mafhungo maḓifha nga ha Muvhuso wa Mudzimu. Phisalema 68:11 yo porofita uri: “Yehova u ṋea ndaela; vhafumakadzi vha ḓivhadzaho mafhungo maḓifha ndi mmbi khulu.”

Fhedzi zwine vhenevha vhafumakadzi vha zwi ita zwo fhambana na zwine zwa itwa nga vhafumakadzi vhane vha ranga phanḓa kha dziṅwe kereke. Ndi ngani?

Kanzhi vhafumakadzi vhane ha dzhena kereke vha ranga phanḓa na u funza henefho kerekeni dzavho. Fhedzi vhafumakadzi vhane vha vha Ṱhanzi dza Yehova vha ḓivhadza mafhungo maḓifha kha vhathu vhane vha si vhe miraḓo ya tshivhidzo, vhenevho ndi vhane vha ṱangana navho vha tshi ya nnḓu nga nnḓu na huṅwe fhethu.

Tshiṅwe tshine tsha fhambanya Ṱhanzi dza Yehova na dziṅwe kereke ndi uri ndi vhanna fhedzi vhane vha funza tshivhidzoni. Vhafumakadzi a vha funzi tshivhidzoni arali hu na vhanna vho lovhedzwaho henefho.​—1 Timotheo 3:2; Yakobo 3:1.

Bivhili i amba uri ndi vhanna fhedzi vhane vha nga vhewa sa vhahulwane tshivhidzoni. Sa tsumbo, Paulo o vhudza Tito uri: ‘Ndo u sia ngei Kereta uri vhee vhahulwane miḓini yoṱhe.’ O dovha a mu vhudza uri vhenevho vhanna vha tea u vha vha “sa solei” nahone vha vhe na “mufumakadzi muthihi.” (Tito 1:5, 6) Paulo o vhudza Timotheo zwi fanaho, o ri: “Munna ane a ṱoḓa u vha mulavhelesi, o tama mushumo wavhuḓi. Mulavhelesi u fanela u vha a sa solei, e munna a re na mufumakadzi muthihi, . . . a tshi kona u funza.”​—1 Timotheo 3:1, 2.

Ndi ngani hu vhanna fhedzi vhane vha nga vha vhahulwane vha zwivhidzo? Paulo o ri: “Mufumakadzi a thi mu tendeli uri a funze kana u langa munna, fhedzi u fanela u fhumula. Ngauri ho thoma u vhumbiwa Adamu, ha kona u tevhela Eva.” (1 Timotheo 2:12, 13) Zwenezwi zwi sumbedza uri Mudzimu o vha a tshi ṱoḓa uri hu vhe vhanna vhane vha ranga phanḓa na u funza tshivhidzoni.

Vhoṱhe vhane vha vha Ṱhanzi dza Yehova vha tevhela tsumbo ya murangaphanḓa wavho, ane a vha Yesu Kristo. Luka o amba zwi tevhelaho nga ha Yesu, o ri: “A tshimbila a ya miḓini na miḓanani, a tshi khou huwelela na u ḓivhadza mafhungo maḓifha a Muvhuso wa Mudzimu.” Nga murahu, Yesu a vhudza vhafunziwa vhawe uri vha ye u ḓivhadza mafhungo maḓifha, “vha tshimbila na miḓi vha tshi enda vha tshi ḓivhadza mafhungo-maḓifha.”​—Luka 8:1; 9:2-6.

Ṋamusi, vhoṱhe vhane vha vha Ṱhanzi dza Yehova vha ita zwoṱhe zwine vha nga kona u itela u ita mushumo we Yesu a dzula o amba nga hawo, musi a tshi ri: “Aya mafhungo maḓifha a Muvhuso a ḓo ḓivhadzwa ḽifhasini ḽoṱhe uri a pfiwe nga tshaka dzoṱhe, nga murahu ndi hone vhufhelo vhu tshi ḓo ḓa.”​—Mateo 24:14.