Musi vhavulanḓila vhavhili vha tshi dalela muṅwe muḓi ngei Kenya, vho mangadzwa nga u vhona munna o ṱukufhalaho o eḓela kha mbete. O vha e na muvhili muṱuku vhukuma na zwanḓa zwipfufhi. Musi vha tshi amba nae nga ha fulufhedziso ḽa Mudzimu ḽa uri ‘wa tshihole u ḓo fhufha vhunga phala,’ onoyo munna o aravha nga u tou ṅwethuwa.—Yes. 35:6.

Vhenevho vhavulanḓila vho wana uri onoyo munna ane a pfi Onesmus, ane zwino a vha miṅwahani ya vhu-30, o bebwa e na osteogenesis imperfecta, kana vhulwadze ha marambo a songo khwaṱhaho. Marambo awe o vha e matete vhukuma—lwe na mutsiko muṱuku-ṱuku wa ita uri a vunḓee. Samusi hu si na dzilafho kana mushonga wa vhulwadze honoho, Onesmus o vha o lavhelela u pfa vhuṱungu vhutshilo hawe hoṱhe nahone e kha tshidulo tsha vhaholefhali.

Onesmus o ṱanganedza pfunzo ya Bivhili. Naho zwo ralo, mme awe vho hana a tshi ya miṱanganoni ya Vhukriste, vha tshi humbula uri zwenezwo zwi nga mu ita uri a huvhale nahone zwa mu engedzela vhuṱungu. Nga zwenezwo, vhahashu vho rekhoda miṱangano nahone Onesmus a thetshelesa e hayani. Musi o no guda lwa miṅwedzi miṱanu, Onesmus o dzhia phetho ya uri u ṱoḓa u ya miṱanganoni hu sa londwi khombo dzine a nga ṱangana nadzo.

Naa u ya miṱanganoni ya Vhukriste zwo engedzela Onesmus vhuṱungu? Na khathihi. Onesmus o ri: “Vhuṱungu vhune nda dzula ndi tshi vhu pfa ho vha vhu tshi fhungudzea musi ndi miṱanganoni.” O humbula uri fulufhelo ḽawe ḽiswa ndi ḽone ḽe ḽa ita uri a ḓipfe e khwine. Mme a Onesmus vho ṱhogomela tshanduko dzine dza vha hone kha ṅwana wavho nahone vha takala vhukuma lwe na vhone vha tenda u guda Bivhili. Vho ri: “U shumela Mudzimu ndi mushonga wa ṅwana’nga.”

Hu si kale, Onesmus o mbo ḓi vha muhuweleli a songo lovhedzwaho. Nga u ya ha tshifhinga, o mbo ḓi lovhedzwa nahone zwino u shuma sa mushumeli. Naho a sa koni u shumisa milenzhe yawe na tshanḓa tshithihi, Onesmus o vha e na lutamo lwa u ita zwoṱhe zwine a nga kona tshumeloni ya Yehova. O vha a tshi ṱoḓa u vha muvulanḓila wa u thusa, fhedzi o vha a tshi timatima u ita khumbelo. Ndi ngani? Ngauri o vha a tshi zwi ḓivha uri u fanela u ḓitika nga muṅwe muthu uri a mu tshimbidze nga tshidulo tshawe tsha vhaholefhali. Musi a tshi vhudza Vhakriste ngae mbilaelo yawe, vho fulufhedzisa uri vha ḓo mu tikedza. Vho ita nga u ralo, vho thusa Onesmus kha vhuvulanḓila ha u thusa.

Lutamo lwa Onesmus lwa u vha muvulanḓila wa tshifhinga tshoṱhe lwo ḓisa mbilaelo i fanaho. Naho zwo ralo, ndimana ya ḓuvha yo mu ṋea ṱhuṱhuwedzo ye a vha a tshi i ṱoḓa. Yo vha yo thewa kha luṅwalo lwa Psalme ya 34:8 ine ya ri: “Thetshelani ni vhone vhuthu ha Yehova uri ndi vhungafhani.” Musi Onesmuso o no elekanya nga ha lwonolu luṅwalo, o dzhia phetho ya u vha muvulanḓila wa tshifhinga tshoṱhe. Zwino u huwelela maḓuvha maṋa nga vhege nahone u na pfunzo dza Bivhili dzo vhalaho dzine dza khou ita mvelaphanḓa yavhuḓi ya muya. Nga 2010, o ya Tshikoloni tsha Tshumelo ya Vhuvulanḓila. Onesmus o vha o takala vhukuma musi muṅwe wa vhagudisi vhawe vhavhili we a mu dalela lwa u thoma a tshi khou funza kha tshenetsho tshikolo!

Vhabebi vha Onesmus vho no lovha, fhedzi vhahashu vha tshinnani na vha tshisadzini vha tshivhidzoni tsha hawe vha ṱhogomela zwishaiwa zwawe zwa ḓuvha na ḓuvha. U a livhuha vhukuma phaṱhutshedzo dzoṱhe dzine a ḓiphina ngadzo zwino, nahone o lavhelela nga maṱo matswuku ḓuvha ḽa musi ‘vho dzulaho fhano vha si tsha ḓo ri: Ndi a lwala.’—Yes. 33:24.