Vhathu vho shumisa pfunzo dza Yesu u itela u vhumba zwigwada zwo fhambanaho zwa “Vhukriste.” Naho zwo ralo, Bivhili i sumbedza uri hu na tshigwada tshithihi fhedzi tsha Vhakriste vha ngoho. Kha ri haseledze zwiitisi zwiraru.

1.   Yesu o amba uri o funza “ngoho” nahone Vhakriste vha u thoma vho amba uri vhurereli havho ndi ha “ngoho.” (Yohane 8:32; 2 Petro 2:2; 2 Yohane 4; 3 Yohane 3) Zwenezwo zwi sumbedza uri vhane funza zwine zwa hanedzana na zwe Yesu a zwi funza a si Vhakriste vha ngoho.

2.   Bivhili i funza uri Vhakriste ‘vhoṱhe vha tea u tendelana musi vha tshi amba.’ (1 Vhakorinta 1:10) Naho zwo ralo, zwigwada zwinzhi zwa Vhakriste a zwi tendelani na pfunzo dzi ngaho zwine u vha Mukriste zwa amba zwone. Zwenezwo zwigwada zwi nga si vhe zwi tshi khou amba ngoho zwoṱhe.​—1 Petro 2:21.

3.   Yesu o porofita uri vhanzhi vha ḓo ḓiita u nga vha Vhakriste ngeno vha sa thetshelesi milayo yawe, zwenezwo zwi ḓo ita uri a vha landule. (Mateo 7:21-23; Luka 6:46) Vhaṅwe vhathu vha ḓo fhurwa nga vharangaphanḓa vha vhurereli vhane vha tshikafhadza vhurabeli ha ngoho u itela u ḓivhuyedza. (Mateo 7:15) Naho zwo ralo, vhaṅwe vhathu vha takalela Vhukriste vhu si ha ngoho ngauri vhu funza zwine vha ṱoḓa u zwi pfa hu si ngoho i bvaho Bivhilini.​—2 Timotheo 4:3, 4.

 Yesu o dzula o amba nga ha vhane vha ḓo shandukela Vhukriste ha ngoho (kana vhagunei), kha tshifanyiso tshawe tsha goroi na tsheṋe. (Mateo 13:24-30, 36-43) Ho vha hu tshi ḓo fhela tshifhinga tshilapfu vhathu vha sa koni u ṱalula Vhakriste vha ngoho kha vha mazwifhi. Musi vhaapostola vho no fa, ho mbo ḓi vha na vhagunei samusi Yesu o vha o amba. (Mishumo 20:29, 30) Naho zwine vhagunei vha zwi funza zwi sa fani, Vhukriste hoṱhe vhu si ha ngoho ho “ṱutshela ngoho.”​—2 Timotheo 2:18.

 Yesu o amba hu tshee nga phanḓa uri nga u ya ha tshifhinga vhathu vha ḓo kona u ṱalula Vhakriste vha ngoho kha vha mazwifhi. Zwenezwi ri khou zwi vhona ṋamusi, samusi ri tshi khou tshila ‘vhufheloni ha maitele a zwithu.’​—Mateo 13:30, 39.