“Mighel” l’è el nome de Gesù nel cielo, vanti e dopo dela so vita nela Tera. a Arquante religion lo ciama de “San Mighel”. La Bìblia la parla che Mighel el ga barufà con Sàtana dopo dela morte de Moisè e el ga giutà un àngelo a portar un messàgio al profeta Daniel. (Daniel 10:13, 21; Giuda 9) El nome “Mighel” el vol dir “Chi che l’è come Dio?” Sicuro che lu el mèrita questo nome, parché el difende el governo de Dio e el lota contra i so nemighi. — Daniel 12:1; Apocalisse 12:7.

 Ndemo veder parché che podemo dir che Gesù l’è el arcàngelo Mighel.

•   Mighel l’è “el arcàngelo”. (Giuda 9) El tìtolo “arcàngelo” el vol dir “àngelo prinsipal”. Nele due volte che catemo questa parola nela Bìblia, la ze scrita de una maniera che ne fà capir che ghen’è solche un àngelo con questo tìtolo. Nte una de queste volte dise che, dopo dela so ressuression, el Signor Gesù “el vegnarà do del cielo con un comando, con voce de arcàngelo”. (1 Tessalonissensi 4:16) Gesù el ga “voce de arcàngelo” parché lu l’è el arcàngelo Mighel.

•   Mighel el comanda un esèrsito de àngeli. La Bìblia la dise che “Mighel e i so àngeli i ga fato guera contra el dragon”, che l’è Sàtana. (Apocalisse 12:7) Savemo che Mighel el ga tanto poder nel mondo spiritual parché lu l’è ciamà de “un dei prìnsipi pi importanti” e anca de “el grando prìnsipe”. (Daniel 10:13, 21; 12:1) David Aune, un studioso del Novo Testamento, el ga dito: “Questi tìtoli i mostra che Mighel l’è el comandante prinsipal dei esérsiti de àngeli.”

   La Bìblia la dopera sol nantro nome par parlar de qualchedun che ga poder sora un esèrsito de àngeli. Ela la dise: “El Signor Gesù el sarà rivelà del cielo, insieme coi so àngeli poderosi in fiame de fogo, quando che lu el farà la vingansa.” (2 Tessalonissensi 1:7, 8; Mateo 16:27) Gesù “l’è ndà al cielo, . . . e i àngeli, e quei che i ga autorità e poder i ze stati metesti soto de lu.” (1 Piero 3:21, 22) Saria strànio se Dio el metesse Gesù e Mighel nela medèsima posission par comandar i àngeli fedeli. Par quela, l’è pi giusto dir che Mighel e Gesù i ze la stessa persona.

•   Mighel “el se meterà in pié” durante un “tempo de aflission” che mai ga sucedesto vanti. (Daniel 12:1) Nel libro de Daniel, la spression ‘méterse in pié’ tante volte la ze doperada par parlar de un rè che el se mete in pié par far qualcossa spessial. (Daniel 11:2-4, 21) Gesù Cristo, anca ciamà de “La Parola de Dio”, el va far una roba spessial come “Rè dei rè”. Gesù el ndarà finir fora con tuti i nemighi de Dio e el ndarà proteger el pòpolo de Dio. (Apocalisse 19:11-16) Gesù el ndarà far questo durante un tempo de “granda tribolassion, come mai ga sucedesto del scomìnsio del mondo fin adesso”. — Mateo 24:21, 42.