Ayyaanaabaa Kaalliyoogee woygiyoogee? Taani Haymaanooten Gelennan Ayyaanaabaa Kaallana Danddayiyaanaa?
Geeshsha Maxaafaa zaaruwaa
Ayyaanaabaa kaalliyoogaa giyoogaa Geeshsha Maxaafay goˈettido ogee, Xoossaa ufayssanawu wozanappe koyiyoogaa, qassi issibaa I qoppiyo ogiyan qoppanawu meezetiyoogaa geetettidi qonccana danddayees. Ayyaanaabaa kaalliya uri Xoossay kessido maaraadan deˈanawunne A geeshsha ayyaanaa kaaletuwaa kaallanawu baaxetees. a—Roome 8:5; Efisoona 5:1.
Geeshsha Maxaafay darotoo ayyaanaabaa kaalliyoogaa, ayyaanaabaa kaallenna asay oottiyoobaara geeddarissidi qonccissees. Leemisuwawu, ayyaanaabaa kaalliya uraappe dumma hanotan, “Geeshsha Ayyaanai bainna asi Xoossaa Ayyaanaa yohuwaa” woy Xoossaa timirttiyaa ekkenna. (1 Qoronttoosa 2:14-16) Ayyaanaabaa kaalliya asaara geeddarssiyo wode, Geeshsha Ayyaanay baynna asay kehiyoogaanne sarotettan deˈiyoogaa aggidi ‘qanaateesinne palamettees.’ (1 Qoronttoosa 3:1-3) Qassi eta haasayay cashshanne mata laggeta shaakkiyaagaa gididoogeeti “bantta iita amuwau haarettidaageeta, qassi Geeshsha Ayyaanai bainnaageeta” geetettidosona.—Yihudaa 19; Leemiso 16:28. b
Ha huuphe yohuwan
Ayyaanaabaa kaalliya asa waani gidana danddayiyoo?
Nuuni Xoossaa leemisuwan merettido gishshawu ayyaanaabaa kaallana danddayoos. (Doomettaabaa 1:27) Yaatiyo gishshawu, daro asay asatettaabaa woy aquwaabaa gidennabaa nashshiyoogeenne eranawu koyiyoogee maalaalissiyaaba gidenna.
Sarotettaa, maarotaanne asa asappe shaakkennaagaa malatiya, Xoossaa Yihoowaagaa c mala eeshshata qonccissiyoogaa nuuni yeletan laattida. (Yaaqooba 3:17) Hegaa bollikka, Xoossay A azazuwaa azazettanawu baaxetiyaageetussi ba ayyaanaa immees.—Oosuwaa 5:32.
Ayyaanaabaa kaalliyoogee keehi koshshiyoy aybissee?
Ayyaanaabaa kaalliyoogee “de7uwaanne sarotettaa” demissees. (Roome 8:6) Xoossaappe demmiyo ha imotati aybippenne aadhdhoosona.
Deˈuwaa: Xoossay baakko shiiqiya asawu merinaa deˈuwaa immanawu qaalaa geliis.—Yohaannisa 17:3; Galaatiyaa 6:8.
Sarotettaa: Hegee Xoossaara saruwan deˈiyoogaa. Bantta asatettawu koshshiyaabaa xallawu qoppiyaageeti Xoossaa morkke gidoosona. (Roome 8:7) SHin Xoossaakko shiiqanawu kaseegaappe aaruwan baaxetiyaageeta Xoossay “asa eratettaa ubbaappe aadhdhiya Xoossaa” sarotettaa immidi anjjana. (Piliphphisiyuusa 4:6, 7) Hegaa mala wozanaa sarotettay eti bantta deˈuwan ufayssaa demmanaadan maaddees.—Maatiyoosa 5:3.
Kaseegaappe aaruwan Ayyaanaabaa kaalliya asa waana gidana danddayiyaanaa?
Xoossaa azazota era qassi azazetta. Neeni hegaadan oottana danddayiyoy, “Geeshsha Ayyaanai kaalettin” asay xaafido, Xoossaa qofaa oyqqida Geeshsha Maxaafaa nabbabiyoogaana. (2 PHeexiroosa 1:21) Neeni tamaariyoobay, Xoossaayyo “ayyaanaaninne tumatettan goinnanau,” geeshsha ayyaanaa kaaletuwaa kaallanawunne Xoossaa sheniyaara maayettanawu nena maaddana.—Yohaannisa 4:24.
Xoossay maaddanaadan woossa. (Luqaasa 11:13) Ayyaanaabaa kaallida asa gidiyoogaa qonccissiya eeshshati neeyyo deˈanaadan Xoossay nena maaddana. (Galaatiyaa 5:22, 23) Hegee neeni deˈuwan gakkiya metuwaa genccanaadan aadhdhida eratettaakka immana danddayees.—Yaaqooba 1:5.
Ayyaanaabaa kaalliya asaara laggeta. Eti neeni kaseegaappe aaruwan ayyaanaabaa kaallanaadan nena minttettana. (Roome 1:11, 12) Hegaappe dumma ogiyan, Xoossaa qofaappe phalqqettiya qofay deˈiyo asaara laggetiyoogee ayyaanaaban nena shugissana danddayees.—Yaaqooba 4:4.
Ayyaanaabaa kaallanawu taani issi haymaanooten gelana koshshii?
Issi haymaanootiyaa kaalliyoogaa xallay issi uri Xoossaakko shiiqanaadan oottenna. Geeshsha Maxaafay hagaadan gees: “Ba inxxarssaa naagennan bana cimmiiddi, bau Xoossaa ammaniyoobaa milatiyo urai de7ikko, a ammanoi mela.”—Yaaqooba 1:26.
Gidikkokka, ayyaanaabaa kaalliya uri Xoossay koyiyo ogiyan ayyo goynniyoogaa Geeshsha Maxaafay yootees. Eti ‘issi ayyaanaa’ xallay, hegeekka Xoossaa geeshsha ayyaanay deˈiyoogaa ammanoosona. He ayyaanay eti “issippe gatti qachchiya sarotettan,” geeshsha ayyaanay immiyo issippetettaa naagidi ‘issi asatettan’ darajjayettidi Xoossaayyo goynnanaadan eta denttettees.—Efisoona 4:1-4.
Ayyaanaabaa kaalliyoogaa xeelliyaagan bala qofaa
Bala qofaa: Issi uri loˈˈobaa oottidabadan woy bawu danddayettida keenan loˈˈo asa gididabadan woy harata maaddidabadan qoppiyo deˈo ogee ubbay ayyaanaabaa kaalliyoogaa.
Tumaa: Geeshsha Maxaafay ayyaanaabaa kaalliyoogee Xoossaa qofaa kaallidi deˈiyo deˈo oge gidiyoogaa yootees. Xoossaa kaaletuwaa kaallennan loˈˈo asa gidanawu oottiyooba gidiyoogaa bessenna. Ayyaanaabaa kaalliya asay Yihooway eta Medhdhidaagaa gidiyoogaa ammaniyoogan, qassi A halchchuwaara maayettidi deˈiyoogan ufayssaa demmoosona.—Mazamure 100:3.
Bala qofaa: Issi uri ufayssiyaabaa oottiyoogaa aggiyoogan woy bana qohiyoogan ayyaanaabaa kaalliyaagaa gidana danddayees.
Tumaa: Issi uri ba asatettaa qohiyaabaa oottiyoogee ba “asatettaa gilqqissiyoogaa,” qassi asatetta qofa. (Qolasiyaasa 2:18, 23) Ayyaanaabaa kaalliyoogee qohuwaara gidennan ufayssaara gayttidaba gidiyoogaa Geeshsha Maxaafay yootees.—Leemiso 10:22.
Bala qofaa: Iita ayyaanaa oosuwaa gujjin ayyaana alamiyan deˈiyaageetuura ay ogiyaaninne gayttiyoogee ayyaanaa kaallanaadan maaddees.
Tumaa: Iita ayyaanaa oosotuppe issoy, hayqqida asaa ayyaanay paxa deˈiyaageetuura haasayana danddayees gi ammaniyoogaa. Gidoppe attin, hayqqidaageeti aybanne erennaagaa Geeshsha Maxaafay tamaarissees. (Eranchchaa 9:5) Tumuppe iita ayyaanaa oosoy, Xoossaara eqettiya iita ayyaana meretatuura gayttiyoogaa. Iita ayyaanaa oosoy Xoossay hanqqettiyooba, qassi issi uri ayyaanaabaa kaallennaadan diggees.—Wogaabaa 20:6; Zaarettido Wogaa 18:11, 12.
Bala qofaa: Merettida ubbabay meretan ayyaanaabaa kaallees.
Tumaa: Xoossay medhdhido ubbabay A bonchchissees. (Mazamure 145:10; Roome 1:20) Gidoppe attin, ayyaanaabaa kaallana danddayiyay qoppana danddayiya meretatu xalaala. Hegaappe dumma hanotan, meheenne doˈay issibaa qoppidi oottokkona, qassi Xoossaara dabbotaa medhdhana danddayokkona. Eti darotoo oottiyoobay bantta bollawu koyiyoobaa. (2 PHeexiroosa 2:12) Yaatiyo gishshawu, ayyaanaabaa kaalliyoogee mehiyaagaanne doˈaagaa mala qofaappenne eeshshaappe dummatiyoogaa Geeshsha Maxaafay yootees.—Yaaqooba 3:15; Yihudaa 19.
a Geeshsha Maxaafan “ayyaanaa” geetettida qaalawu koyro xaafettido doonan “carkkuwaa” giyo birshshettay deˈees. He qaalati ayfiyan beettenna issibaa, qassi issibaa oottiyo wolqqaa geetettanakka danddayoosona. Xoossay Aybippenne Aadhdhiya Ayyaana gidiyoogaa Geeshsha Maxaafay qonccissees. Ayyaanaabaa kaalliya uri Xoossaa ufayssiyaabaa kuuyanawunne A geeshsha ayyaanaa kaaletuwaa kaallanawu doorees.
b Geeshsha Maxaafan asaa xeelliyaagan “ashuwaabaa” qassi “asatettaabaa” geetettidaagee, eti qoppiyoobawunne oottiyoobawu denttettiya waannabay eta asatettaa koshsha gidido, Xoossay kessido maaraa bonchchenna asaa qonccees.
c Yihoowa giyaagee Geeshsha Maxaafay qonccissiyo Xoossaa sunttaa.—Mazamure 83:18, NW.
Hageeta Beˈadii?
GEESHSHA MAXAAFAABAA OYCHCHIYOOBATU ZAARUWAA
Geeshsha Ayyaanay Aybee?
Geeshsha Maxaafay geeshsha ayyaanaa Xoossaa “kushiyaa” giyoogee bessiyaaba.
BEEGOTTITE!
Payya Gidida Deˈuwawu—Ayyaanaabaa
Xoossay kessido maaratinne Geeshsha Maxaafay yootiyo maarati neeni ne deˈuwan kaseegaappe aaruwan ayyaanaabaa qoppanaadan oottana danddayoosona. Waati oottiyaakko akeeka.
NUBAA
Geeshsha Maxaafaa Tamaaranawu Oychcha
Geeshsha Maxaafaabaa woy Yihoowa Markkatubaa loytta erana.