Koshshenna. Geeshsha Maxaafay nuuni Yesuusa suntan Xoossaa xallaa woossana koshshiyoogaa yootees. Yesuusi ba erissiyo ashkkarata, “Simmi intte hagaadan yaagidi, Xoossaa woossite; Saluwan de7iya nu Aawawu, ne geeshsha sunttay anjjetto.” (Maatiyoosa 6:9) Yesuusi ba erissiyo ashkkarati Xoossaa xallaa woossanaappe attin geeshshata, kiitanchchata woy hara oonakka gidin mule woossana koshshennaagaa tamaarissiis.

 Yesuusi bana kaalliyaageetuyyo, “Ogee, tumainne de7oi tana; ta baggaarappe attin, ooninne ta Aawaakko baanau danddayenna” yaagidikka yootiis. (Yohaannisa 14:6) Nuuyyo gaannatanaadan Xoossay sunttidoogee Yesuusa xalla.—Ibraawe 7:25.

Xoossaa Woossiiddi Geeshshatakka Woossikko SHin?

 Xoossay Tammu Azazuwan, “Taani, GODAI ne Xoossai qanaatiya Xoossaa” yaagidi yootiis. (Kessaabaa 20:5) Xoossay aybin ‘qanaatii’? Ba xalaalawu ammanettanaadan koyiyoogaana. Xoossay woosaa gujjin, ammanettiyoogaa bessiya oosoy woy goynoy ba xallawu imettanaadan koyees.—Isiyaasa 48:11.

 Nuuni hara oonanne gidin, ubba geeshshata woy geeshsha kiitanchchatakka gidin woossikko Xoossaa azzanttoos. Kiitettida Yohaannisi issi kiitanchchawu goynnanawu malin, he kiitanchchay A, “Hegaa oottoppa. Taani ne malanne Yesuusi etayyo qonccissido tumatettaa oiqqida ne ishanttu ubbaa mala ashkkara. Xoossaayyo goinna” yaagiis.—Ajjuutaa 19:10.