Issi issi haymaanootetun “Geeshsha Mikaaˈeela” geetettiya Mikaaˈeeli, saˈaa yaanaappe kasenne saˈaappe bi simmin Yesuusawu imettida suntta gidiyoogee qoncce. a Mikaaˈeeli muusee hayqqi simmin, Seexaanaara palamettiis; qassi hananabaa yootiya Daaneelassi Xoossaa kiitaa yootanaadan issi kiitanchchaa maaddiis. (Daaneela 10:13, 21; Yihudaa 9) Mikaaˈeeli Xoossaa haaruwawu exatiyoogaaninne A morkketuura olettiyoogan, “Xoossaa mali ooni deˈii?” giya ba sunttaa birshshettaara maayettiyaabaa oottiis.—Daaneela 12:1; Ajjuutaa 12:7.

 Yesuusi kiitanchchatu halaqaa Mikaaˈeela geetettana bessiyoy aybissakko akeeka.

•   Mikaaˈeeli “Kiitanchchatu halaqaa.” (Yihudaa 9) Geeshsha Maxaafan, “kiitanchchatu halaqaa” giya bonchcho sunttay naaˈˈu xiqisetu xallan deˈees. He qaalay naaˈˈu xiqisetunkka cora gidiyoogaa bessenna gishshawu, he bonchcho sunttay deˈiyoy issi kiitanchcha xalla. He xiqisetuppe issoy, hayquwaappe denddida Godaa Yesuusi ‘azazuwaara, kiitanchchatu halaqaa cenggurssaara saluwaappe wodhdhanaagaa’ yootees. (1 Tasalonqqe 4:16) Yesuusi kiitanchchatu halaqaa Mikaaˈeela gidiyo gishshawu, A cenggurssay ‘kiitanchchatu halaqaa cenggurssa.’

•   Yesuusi olanchcha kiitanchchata azazees. “Mikaa7eeli ba kiitanchchatuura issippe miimminttiyaara,” Seexaanaara olettiis. (Ajjuutaa 12:7) Mikaaˈeeli ‘kiitanchchatu halaqatuppe issuwaa,’ qassi ‘gita halaqaa’ geetettido gishshawu, ayyo saluwan gita maatay deˈees. (Daaneela 10:13, 21; 12:1) Ooratta Maachchaa eranchchay Devid I. Awuni yootidoogaadan, he bonchcho sunttati Mikaaˈeeli ‘olanchcha kiitanchchata azaziya xoqqa halaqa’ gidiyoogaa bessoosona.

   Olanchcha kiitanchchatu bolli maatay deˈiyo ura hara sunttay, Geeshsha Maxaafan issuwaa xallay odettiis. Azazettennaageeta qaxxayanawu, ‘Goday Yesuusi ba wolqqaama kiitanchchatuura tamaa lacuwaa giddon saluwaappe yaanaagaa’ Geeshsha Maxaafay yootees. (2 Tasalonqqe 1:7, 8; Maatiyoosa 16:27) Yesuusi “Saluwaa biidi . . . kiitanchcha ubbaa, maataara de7iyaageetanne wolqqaamata haarees.” (1 PHeexiroosa 3:21, 22) Xoossay, geeshsha kiitanchchata kaalettiya, issoy issuwaara keesettiya Yesuusanne Mikaaˈeela sunttees giidi qoppiyoogee milatennaba. Hegaappe, Yesuusinne Mikaaˈeeli, naaˈˈaykka issi ura suntta giidi qoppiyoogee bessiyaaba.

•   Mikaaˈeeli hegaappe kase hani erenna sinttawukka hanenna ‘meto wodiyan’ “denddana.” (Daaneela 12:1) Daaneela maxaafan, “denddana” giya qaalay darotoo issi kawoy issi dummaba oottanawu denddiyoogaa bessees. (Daaneela 11:2-4, 21) “Xoossaa Qaalaa” geetettida Yesuus Kiristtoosi ‘kawotu Kawuwaa’ gidiyoogaadan, Xoossaa asaa ashshanawunne Xoossaa morkketa ubbaa xayssanawu dummabaa oottana. (Ajjuutaa 19:11-16) I ‘saˈay merettoosappe hachchi gakkanaashin deˈibeennanne hagaappe sinttawukka mule deˈenna iita waayiyaa’ wode hegaadan oottana.—Maatiyoosa 24:21, 42.