Geeshsha Maxaafay eriiddi shahaaraa kesissiyoogaa xeelliyaagan yootiyo higgee baawa. Gidoppe attin, yelettibeenna naˈaa gujjin, asaa deˈuwaa Xoossay waati xeelliyaakko yootiya daro xiqiseti Geeshsha Maxaafan deˈoosona.

 Deˈoy Xoossaa imota. (Doomettaabaa 9:6; Mazamure 36:9) Aayee uluwan deˈiya shahaaraa gujjin, deˈoy A sinttan keehi alˈˈo. Yaatiyo gishshawu, shahaaraa eriiddi kesissiyoogee shemppuwaa woriyoogaara issi mala.

 Xoossay Israaˈeelatussi immido Higgee hagaadan gees: “Naa77u asati issoi issuwaara warettiiddi abbe ixeta maccaasiyo dechchikkonne a boshettikko, hegaappe hara iita deshetti xayikko, he maccaasee azinai oichchidobaanne daannati pirddidobaa aibanne qanxxo. SHin iyyo deshettai darikko, shemppoi haiqqikko shemppo.”—Kessaabaa 21:22, 23. a

•  Asaa deˈoy doommiyoy awudee?

•  Xoossay shahaaraa kessida urawu atto gaanee?

•  Aayyiyaa woy naˈay qohettikko shahaaraa kessiyoogee balee?

 SHahaaray aayee uluwan attido wodiyaappe doommidi Xoossay A deˈuwan deˈiya uradan xeellees. Xoossay yelettibeenna naˈa aayee bollaa shaahodan gidennan, issi asadan xeelliyoogaa Geeshsha Maxaafay darosan yootees. Xoossay aayee uluwan deˈiya naˈaa deˈuwaa yelettida naˈaa deˈuwaappe dummayidi xeellennaagaa qonccissiya amarida leemisota beˈa.

•   Ayyaanay denttettin Kawuwaa Daawiti Xoossaa hagaadan giis: “Yelettibeenna ta bollaa ne aifee be7iis.” (Mazamure 139:16) Xoossay Daawiti yelettanaappe kasekka, deˈuwan deˈiya asadan A xeelliis.

•   Hegaa bollikka, hananabaa yootiya Ermmaasi yelettanaappe kase Xoossay A dummabawu halchchi wottiis. Xoossay awu hagaadan giis: “Taani nena ne aayee uluwan tilanaappe kase eraas. Neeni uluwaappe yelettanaappe kase taani nena geeshshada dummaya wottaas. Qassi kawotettatuyyo hananabaa yootiyaagaa oottada nena sunttaas.”—Ermmaasa 1:5.

•   Geeshsha Maxaafaa xaafidanne aakime gidida Luqaasi, biron yelettibeenna naˈaanne yelettida naˈaa qonccissanawu issi mala Giriiketto qaalaa goˈettiis.—Luqaasa 1:41; 2:12, 16.

 Kase shahaaraa kesissidaageetuyyo Xoossay atto gaana. Eti deˈuwaa Xoossay xeelliyoogaadan xeelliyaaba gidikko, kase oottido mooruwan keehi zilˈˈettana koshshenna. “GODAI [Yihooway, NW] qarettiyaagaanne maariyaagaa; . . . Awai mokkiyoosaappe awai wulliyoosai haakkiyoogaadan, hegaadankka GODAI [Yihooway, NW] nu mooruwaa nuuppe haassees.” b (Mazamure 103:8-12) SHahaaraa woriyoogaa gujjin, oottido nagaraappe wozanappe simmiyaageeta ubbaa Yihooway atto gaana.—Mazamure 86:5.

 Yelettibeenna naˈaa deˈuwaa xeelliyaagan Geeshsha Maxaafay yootiyoogaadaana gidikko, aayee woy naˈaa bolli wolqqaama qohuwaa gattees giidi shahaaraa kessiyoogee bala.

 Issi issitoo yeluwaa wodiyan gakkiya daafaabaa gaasuwan aayyiyaa woy naˈay hayqqanaadan oottiyaabay merettikko shin? Hegaa mala wodiyan, O shemppuwaa ashshana bessiyaakko aqo laggeti kuuyana koshshees.