Yesuusa yarshshoy, asay nagaraappenne hayquwaappe attanaadan Xoossay giigissidoba. Yesuusa suuttay wozuwawu qanxxettida waaga gidiyoogaa Geeshsha Maxaafay yootees. (Efisoona 1:7; 1 PHeexiroosa 1:18, 19) Yesuusi ‘daro asaa wozanawu ba shemppuwaa immanau yiidoogaa’ yootidoy hegaassa.​—Maatiyoosa 20:28.

“Daro asaa wozanau” koshshidoy aybissee?

 Koyro bitanee Addaamee, wottiyoobi baynna woy nagari baynna asa gididi merettiis. I merinawu deˈana danddayiyaaba gidikkonne, Xoossawu azazettibeenna gishshawu hegee appe haliis. (Doomettaabaa 3:17-19) I naata yelido wode, nagaraa eta laatissiis. (Roome 5:12) Hegaappe denddidaagan, Addaamee bananne ba naata nagaraanne hayquwaa aylletettawu ‘bayzzidoogaa’ Geeshsha Maxaafay yootees. (Roome 7:14) Asay nagaranchcha gidiyo gishshawu, Addaameppe halidabaa etappe ooninne wozanawu danddayenna.​—Mazamure 49:7, 8.

 Addaame zaretuyyo hidooti baynna gishshawu, Xoossay etawu qarettiis. (Yohaannisa 3:16) SHin, Xoossay suure pirddiyaagaa gidiyo gishshawu, atto giyo gaasoy baynnan nagaraa atto geenna. (Mazamure 89:14; Roome 3:23-26) Xoossay asaa siiqiyo gishshawu, eta nagaraa atto giyoogaa xalla gidennan muleera xayssanawu higgiyan koyettiyaaba giigissiis. (Roome 5:6-8) He higgiyan koyettiyaabay wozuwaa.

Wozuwaa goˈˈaa

 Wozuwaa giya qaalaa Geeshsha Maxaafay kaallidi deˈiya heezzubatun qonccissees:

1.   Qanxxettidaba.​—Qoodaabaa 3:46, 47.

2.   I Laˈa kiyanaadan oottiyaaba.​—Kessaabaa 21:30.

3.   Woziyoobaa waagaara bixe woy lagge. a

 Ha heezzubati Yesuusa wozuwaa yarshshuwaara waani gayttiyaakkonne akeeka.

1.   Qanxxettidaba. Kiristtaaneti ‘waagan shammettidoogaa’ Geeshsha Maxaafay yootees. (1 Qoronttoosa 6:20; 7:23) Yesuusa suuttay ‘qommo ubbaappe, dumma dumma biitta qaala ubbaappe, yara ubbaappenne zare ubbaappe Xoossaayyo asaa wozido’ waaga.​—Ajjuutaa 5:8, 9.

2.   Laˈa kessiyaaba. Yesuusa yarshshoy nagaraa ‘aylletettaappe laˈa kessees.’​—1 Qoronttoosa 1:30; Qolasiyaasa 1:14; Ibraawe 9:15.

3.   Bixe. Yesuusa yarshshoy, Addaameppe halida wottiyoobi baynna deˈuwaara lagge. (1 Qoronttoosa 15:21, 22, 45, 46) Geeshsha Maxaafay hagaadan gees: “Issi urai [Addaamee] azazettennan ixxido gaasuwan, daro asai nagaranchcha gididoogaadan, hegaadankka qassi issoi [Yesuus Kiristtoosi] eeno giidoogan daro asai xillana.” (Roome 5:19) Issi uri hayqqiyoogan daro nagaranchchatussi wozuwaa waati qanxxana danddayiyaakko he qofay qonccissees. Yesuusa yarshshoy, appe goˈettanawu banttappe koyettiyaabaa oottiya “asaa ubbaa wozanau” giigidaba.​—1 Ximootiyoosa 2:5, 6.