ICHASHU laytta gidiya wodeppe kase, CHun Keyun giyonne Juulo giyo, layttay 35 heera gidido azinaynne machiyaa Awusttiraaliyan Sidini kataman kumetta wodiyaa aqinye gididi haggaazoosona. CHun Keyuni hagaadan giis: “Nuuni amarida saatiyaa oottidi, ishalidi deˈoos. Nu deˈiyo heeran carkkuwaa hanotay keehi loˈˈo; qassi deˈoykka injje. Nuuni nu soo asaaranne laggetuura ufayttidi deˈoos.” SHin CHun Keyuninne Juula paccidabi deˈiyaabadan qoppidosona. Aybissi? Eti Yihoowayyo loytti haggaazana danddayiyoogaa akeekoosona; shin koshshiya issi issibaa giigissanawu mammottidosona.

Eti 2009n shiiqido awuraajjaa shiiquwan eta wozanaa keehippe denttettida haasayaa siyidoosona. He haasayaa shiishshida ishay loytti haggaazana koyiyaageeta minttettiya ogiyan shiishshiis. I hagaadan giis: “Ane hagaa qoppite: Kaamiyaa laaggiya uri kaamiyaa haddirssi woy ushachi zaarana danddayiyoy kaamee hemettiyo wode xallaana. Hegaadankka, nuuni kaseegaappe loytti haggaazanaadan Yesuusi maaddana danddayiyoy nuuni hemettiyo wode woykko nu hoolliyaa gakkanawu baaxetiyo wode xallaana.” * He azinaynne machiyaa he haasayay etayyo shiiqidabadan qoppidosona. Qassi he awuraajjaa shiiquwan, Taywaanen haggaaziya azinanne macho gidida misoonaaweti oyshettidosona. Eti haggaazuwan keehi ufayttiyoogaanne haˈˈikka he oosuwaa oottidi maaddiya hara daroti koyiyoogaa yootidosona. CHun Keyuninne Juula haˈˈikka hegee etassi shiiqidabadan qoppidosona.

Juula, “He awuraajjaa shiiquwaappe simmin, nuuni Taywaane baanaadan Yihooway maaddana mala woossida” yaagaasu. A gujjadakka, “SHin nuuni hirggida. Hegee koyro wode ciimma haattan guppidi geliyoogaa mala giidi qoppida” yaagaasu. SHin Eranchchaa 11:4n, “Carkkuwaa hanotaa naagiya ooninne kattaa zerenna; qassi shaarai denddanaashin naagiya ooninne ba kattaa cakkenna” yaagiya, Geeshsha Maxaafaa qofay eti “guppidi” gelanaadan denttettiis. CHun Keyuni, “Nuuni ‘naagiyoogaa’ aggidi, ‘zeriyoogaanne cakkiyoogaa’ doommida” yaagiis. Eti zaaretti zaaretti woossidi,  misoonaawetu deˈuwan hanidabaa nabbabidi, qassi Taywaane biidi haggaaziyaageetuura darotoo iimeyliyan gaytti simmidi, bantta kaamiyaanne son goˈettiyo hara miishshata bayzzidi heezzu aginappe guyyiyan Taywaane biidosona.

Ha wodiyan dumma dumma biittaappe biida, 100ppe dariya ishatinne michoti Taywaanen, aassiyaageeti keehi koshshiyoosan haggaaziiddi deˈoosona. Eti Awusttiraaliyaappe, Birttaaniyaappe, Kanaadaappe, Paransaayeppe, Jaappaaneppe, Kooriyaappe, Isppeeneppenne Amarkkaappe biidosona; eta layttay 21ppe 73 gakkanaashiina. Hegeetuppe 50ppe dariyaageeti aqo oyqqibeenna michota. Ha mishettidi haggaaziya ishatinne michoti kare biittan haggaazanaadan denttettidabay aybee? Aybakko ane beˈoos.

Looro giyo, Kanaadaappe biida aqo oyqqibeenna michiyaa Taywaanen arshsho baggan aqinye gidada haggaazaawusu. A tammu layttappe kase haggaaziyoogaa mule dosukku. Loora, “Taani he wode haggaazana koshshiyo gishshawu haggaazaysippe attin dosada gidenna” yaagaasu. He wode Kanaadan deˈiya laggeti amarida aginaa Mekisiiko biidi etaara haggaazana mala o shoobbidosona. A, “Hegee taani ta deˈuwan daro saatiyaa haggaazido wodenne keehi ufayttido wode!” yaagaasu.

He hanotay Loora Kanaadan kare biittaa doonaa goˈettiya gubaaˈiyaa baanawu qoppanaadan denttettiis. Yaatada, CHayna qaalaa tamaaranawu mazggafettaasu, CHayna qaalaa haasayiya citaara haggaazaasu; qassi Taywaane baanawu halchada, hegaappe Masqqala 2008n yaa baasu. Loora, “Taani issi laytta gidiyaagaa takkada ooratta heeraa meezetaas; shin haˈˈi Kanaada biitti simmanawu mule qoppikke” yaagaasu. Haggaazuwaa xeelliyaagan iyyo aybi siyettii? A hagaadan gaasu: “Taani haˈˈi keehi ufayttays. Geeshsha Maxaafaa xannaˈiyaageeti Yihoowa eridi bantta deˈuwaa laammiyoogaa beˈiyoogaappe aadhiya ufayssi baawa. Taani Taywaanen haggaaziyoogee ta deˈuwan keehi ufayttanaadan oottiis.”

Layttay 35 heera gidido Breynanne Misheelo giyo azinaynne machiyaa hosppun laytta gidiya wodeppe kase  Amarkkaappe Taywaane biidosona. Eti koyro heeran bantta haggaazoy ayfe demissennabadan qoppidosona. SHin haggaazuwan daro meezee deˈiyo issi misoonaawee eta hagaadan giis: “Intte issi urawu issi traktte xallaa immiyaaba gidikkokka, he uri koyro wode Yihoowabaa eranaadan maaddidoogaa hassayana koshshees. Hegaa gishshawu, intte maara haggaaziiddi deˈeeta!” He minttettoy Breyninne Misheela hidootaa qanxxennaadan keehi maaddiis. Hara ishay qassi eta, “Hidootaa qanxxenna mala, CHayna qaalaa ay keenaa eridaakko galla galla yiggiyoogaappe layttan layttan yiggite” yaagiis. Eti ha wodiyan he qaalaa eridi, gooba aqinye gididi haggaaziiddi deˈoosona.

Neeni kare biittaa qaalaa tamaaranaadan aybi denttettana danddayii? Neeni baada haggaazana koyiyo biittaa kasetada beˈa. Baada gubaaˈe shiiquwaa shiiqa, yan deˈiya ishatuuranne michotuura eretta, qassi etaara issippe haggaaza. Breyni hagaadan giis: “Yan deˈiya daro asay Kawotettaa mishiraachuwaa ufayttidi siyiyoogaa, qassi ishatinne michoti siiquwan mokki ekkiyoogaa beˈiyo wode, amarida metoy deˈiyaaba gidikkokka, intte kare biittan haggaazanawu koyiyoogee attenna.”

Taywaanen aassiyaageeti keehi koshshiyoosan haggaaziya amarida ishatinne michoti aqinye gididi haggaaziiddi koshshiyaabaa demmanawu Inggilizettuwaa tamaarissoosona. Kiristtininne Misheela moliyaa bayzzoosona. Kiristtini, “Taani kase hegaadan ootta erikke; shin he oosoy taani ha biittan takkanaadan maaddiis” yaagiis. Guyyeppe, amarida asati ubba wode moliyaa Kiristtinappe shammiyoogaa doommidosona. Amarida saatiyaa oottiyo he oosoy inne a maccaasiyaa koshshiyaabaa demmanaadan maaddiis; qassi hegee eti bantta deˈuwan kaseyiyoobawu, hegeekka, aqinye gididi haggaaziyo wode moliyaadan asaa oyqqanawu gidiya wodiyaa demmanawu maaddiis.

Wiliyamanne Jenifero giyo azinaynne machiyaa laappun laytta gidiya wodeppe kase Amarkkaappe Taywaane biidosona. Wiliyami, “Ooratta qaalaa tamaariyoogee, aqinye gididi haggaaziyoogee, gubaaˈiyan deˈiyaageeta heemmiyoogeenne so asawu koshshiyaabaa kunttiyoogee issi issitoo metees” yaagiis. Eti hegaa genccanaadaaninne ufayttidi deˈanaadan maaddidabay aybee? Eti bessiya hoolliyaa kessanawu baaxetoosona. Leemisuwawu, CHayna qaalaa tamaariyo wode, darobaa eriichana giidi qoppokkona; eti qoppidoogaa keenaa erana xayikko hidootaa qanxxokkona.

Issi wode woradaa xomoosiya ishay, ayyaanaabaa hoolliyaa kessidi, he hoolliyaa gakkanawu oottiyooban ufayttanaadan yootido zoriyaa Wiliyami ubba wode hassayees. He zoriyaa kaallidoogee, inne a maccaasiyaa unˈˈettennaadan maaddidoogaa, he biittan deˈiya gubaaˈe cimati yootiyo zoriyaa siyanaadan maaddidoogaa, qassi haggaazuwan loˈˈo ayfiyaa demmanawu eti issi issibaa giigissanaadan maaddidoogaa Wiliyami yootiis. I gujjidi, “Hegee nuuni haggaaziyo haruuruwaa meretay keehi loˈˈiyoogaa issi issitoo beˈidi ufayttanaadankka maaddiis” yaagiis.

Amarkkaappe biida Megan giyo aqo oyqqabeenna michiyaakka, Wiliyamanne Jeniferidan, CHayna qaalaa loyttada eranawu kessido hoolliyaa gakkanawu baaxetaydda ba haggaazuwan ufayttaasu. A ufayssiya haggaazo mootta gidida, Taywaanen markkabee eqqiyo Kawushun giyo sohuwan haggaaziya citaara Qeeraanne Woggaa gallassi ubbatoo haggaazawusu. Megana markkabiyaappe markkabiyaa baada mishiraachuwaa yootawusu; qassi Banggilaadeeshappe, Hinddeppe, Indoneezhiyaappe, Pilippinsseppe, Taylanddeppenne Vanuwatuppe yiidi moliyaa oyqqiya asatussi sabbakawusu. A hagaadan gaasu: “Moliyaa oyqqiya asati markkabee eqqiyoosan guutta wode xallaa takkiyo gishshawu, eta sohuwaara Geeshsha Maxaafaa xinaatiyaa doomissoos. Eta ubbaa maaddanawu, darotoo issi kutti oyddu woy ichashu asaa issippe xannaˈissays” yaagaasu. CHayna qaalaa timirttiyaabaa shin woygana danddayettii? A hagaadan gaasu: “Taani sohuwaara eriyaakko ixxikke; shin issi ishay tana, ‘Neeyyo danddayettida keenaa baaxeta; attidaagaa Yihooway maaddana’ giidoogaa ubba wode hassayays.”

Katiyo giyo michiyaa Birttaaniyaappe kare biitti baanaappe kase, aqo oyqqibeenna michotuyyo injje gidida biittay awugaakkonne eranawu baaxetaasu. A bana qofissidabaa Yihoowayyo woosan yootaasu; qassi aqo oyqqibeenna michota metana danddayiyaabay aybakko amarida macara biiruwaa dabddaabbiyaa xaafada oychaasu. Hegaappe simmin, eti iyyo xaafido dabddaabbiyan deˈiya qofaa loytta qoppada, Taywaanee iyyo injje soho gidiyoogaa akeekaasu.

Katiya baayyo layttay 31 gidido wode 2004n Taywaane baasu; a yan bawu danddayettida keenan deˈossi koshshiyaaba xallaa demmada deˈaasu. A hagaadan gaasu: “Muuziyaa, mangguwaanne hegaa malabaa, qassi ataakilttiyaa awuppe hiraysuwan shammana danddayiyaakko yan deˈiya ishatanne michota oychaas. Eta zoree tawu deˈiya miishshaa taani daro wodiyawu goˈettanaadan maaddiis.” A deˈossi koshshiyaaba xallan deˈanaadan maaddidabay aybee? Katiya hagaadan gaasu: “Taani deˈossi koshshiya quma xallaa miyoogaaninne alˈˈo gidenna maayo maayiyoogan tawu deˈiyaabay gidana gaada deˈanaadan Yihooway maaddana mala ubba wode woossays. Yihooway tawu koshshiyaabay aybakko tana erissiyoogaaninne taani koyiyoobaa demmanaadan maaddiyoogan ta woosaa zaariis gaada qoppays.” A gujjadakka, “Deˈossi koshshiyaaba xallan ufayttada deˈays; aybissi giikko, hegee taani ubba wode ayyaanaabaa tishshi oottada qoppanaadan maaddiis” yaagaasu.

Katiya deˈossi koshshiyaaba xallan woppu gaada deˈiyoogaa xallaa gidennan, ufayssiya deˈo deˈawus. A hagaadan gaasu: “Taani daro asay mishiraachuwaa ufayttidi siyiyo heeran sabbakana danddayays. Hegee keehi ufayssiyaaba!” A Taywaane baada aqinye gidada haggaazido kataman CHayna qaalaa goˈettiya gubaaˈeti naaˈˈaa xallaa; shin ha wodiyan laappun gubaaˈeti deˈoosona. Katiya, “He maalaalissiya dichaa ta ayfiyan beˈiyoogeenne taani kattaa cahan shaahettiyoogee ubba galla ufayttanaadan oottiyaaba” yaagaasu.

Qommoora etabay qonccido CHun Keyunanne Juuli hanotay haˈˈi ay malee? CHun Keyuni CHayna qaalaa loytti erenna gishshawu, koyro heeran gubaaˈiyaa darin maaddennabadan qoppiis. SHin he biittan deˈiya ishati qoppidobay aagaappe dumma. CHun Keyuni hagaadan giis: “Nu gubaaˈee shaahettidi naaˈˈa gidido wode, taani gubaaˈiyawu oottiyaagaa gidiyo gishshawu daro aawatettay imettiis. Taani aassiyaageeti keehi koshshiyoosan haggaazaydda deˈiyaabadan qoppidoy he wode.” I ufayttiiddi, “Eti tanakka maaddiya asadan xeellidosona; hegee maalaalissiyaaba!” yaagiis. Ha wodiyan i gubaaˈe cima. Juula hagaadan gaasu: “Nuuni gitabaa oottiyaabadaaninne mule ufaytti erenna ogiyan ufayttiyaabadan qoppoos. Nuuni hagawu yiidoy harata maaddanaassa; shin nu deˈuwan beˈido ha ufayssiyaabay nuna keehi maaddidabadan qoppoos. Nuuni hagan haggaazanaadan paqqadido gishshawu Yihoowa galatoos!”

Daro biittan, haˈˈikka aassiyaageeti keehi koshshiyoosan haggaaziyaageeti ayyaanaabaa cakkiyo oosuwawu koyettoosona. Neeni naaˈˈantto xekka timirttiyaa wurssana hanay, qassi ne deˈuwan ay oottanaakko qoppaydda deˈay? Neeni aqo oyqqennan deˈiya, Yihoowa dirijjitiyan goˈˈiyaabaa oottanawu koyiya asee? Ne soo asawu ayyaanaabaa duretettaa laatissana koyay? Neeni xuurataa kiyida asee, qassi attida wodiyan harata keehi maaddiyaabaa oottana koyay? Neeni kaseegaappe loytta haggaazanawu kuuyiyaaba gidikko, Kawotettaa aassiyaageeti keehi koshshiyoosan haggaaziyoogan daro anjjettanaagaa ammanettana danddayaasa.