Hini nga artikulo

•  Ano an pakig-date?

•  Andam ka na ba makig-date?

 Para ha pipira an pakig-date usa nga butang nga ginbubuhat la para mag-enjoy. Pero hini nga artikulo, an “pakig-date” nagtutudlok ha panahon nga ginagamit han mag-uyab basi mahibaroan kon angayan hira sugad nga mag-asawa. Salit may katuyoan an pakig-date. Diri la ito basta pag-enjoy ha atensyon han usa kag usa.

 Maabot an panahon nga an nagdi-date kinahanglan magdesisyon—kon magpapakasal o tatapuson an ira relasyon. Kon magtikang ka na pakig-date, kinahanglan nga andam ka ha bisan hain hini.

 An punto: Kon para ha imo andam ka na makig-date, kinahanglan andam ka na liwat mag-asawa.

 Mahimo magresulta ha pag-asawa an pakig-date, salit kinahanglan mo hunahunaon kon ano nga mga kalidad an may-ada ka nga makakabulig o makakadaot han relasyon. Pananglitan, hunahunaa an masunod:

•   Relasyon ha pamilya. An imo pagtratar ha imo mga kag-anak ngan kabugtoan—labi na kon naiistres ka—kasagaran nga nagpapakita kon paonan-o mo tatrataron an imo padis.

   Prinsipyo ha Biblia: “Bayai niyo an ngatanan nga klase hin pagdumot, kasina, kapungot, pagsinggit, ngan nakakadaot nga panyakan, sugad man an ngatanan nga karaotan.”—Efeso 4:31.

   Pakianhi an imo kalugaringon: ‘Masisiring ba han akon mga kag-anak ngan kabugtoan nga ginrirespeto ko hira? Kon may-ada kami diri pagkasinabtanay, nakikiistorya ba ako hin kalmado, o nasisina ngan nakikigdiskusyon?’

•   Pagsakripisyo ha kalugaringon. Kon inasaw-an ka na, kinahanglan mo hunahunaon an karuyag han imo padis ngan kasagaran nga magpapahiuyon ka hito.

   Prinsipyo ha Biblia: “An kada tagsa padayon nga mangalimbasog diri para ha iya kalugaringon nga kaopayan, kondi para ha kaopayan han iba nga tawo.”—1 Corinto 10:24.

   Pakianhi an imo kalugaringon: ‘Karuyag ko ba nga ako pirme an masunod? Pagkita han iba makatadunganon ba ako? Ha ano nga mga paagi iginpapakita ko nga gin-uuna ko an panginahanglan han iba kay ha akon kalugaringon?’

•   Pagkamapainubsanon. Ginkakarawat han maopay nga padis an iya mga sayop ngan sinsero nga nangangaro hin pasaylo.

   Prinsipyo ha Biblia: “Kita ngatanan nakakasayop hin damu ka beses.”—Santiago 3:2, footnote.

   Pakianhi an imo kalugaringon: ‘Ginkakarawat ko ba dayon an akon mga sayop, o naghihimo ako hin mga pasangil? Nasisina ba ako kon ginsasagdonan ako han iba?’

•   Kwarta. An tawo nga responsable ha paggamit hin kwarta mahimo makalikay ha usa han nangunguna nga hinungdan han away han mag-asawa.

   Prinsipyo ha Biblia: “Hin-o ha iyo nga naruruyag pagtukod hin torre an diri anay malingkod ngan magkukwenta han magagasto basi makita kon may igo hiya nga pundo nga ighuhuman hito?”—Lucas 14:28.

   Pakianhi an imo kalugaringon: ‘Ginkukontrol ko ba an akon paggasto, o pirme ako nagkakautang? Paonan-o ko iginpapakita nga responsable ako ha paggamit hin kwarta?’

•   Espirituwal nga rutina. Kon usa ka han mga Saksi ni Jehova, kinahanglan may-ada ka regular nga rutina han pag-aram ha Biblia ngan pagtambong ha Kristiano nga mga katirok.

   Prinsipyo ha Biblia: “Malipayon an mga mahunahunaon han ira espirituwal nga panginahanglan.”—Mateo 5:3.

   Pakianhi an imo kalugaringon: ‘Nangangalimbasog ba ako basi magpabilin nga marig-on an akon pagtoo? Prayoridad ko ba an akon espirituwal nga rutina, o gintutugotan ko an iba nga butang nga makaulang hito?’

 An punto: Kinahanglan han imo mapapangasawa an usa nga padis nga may marig-on nga espirituwalidad. Kon nangangalimbasog ka nga magin sugad hito, mas daku an posibilidad nga maruyag ha imo an sugad hito nga klase hin tawo.