Ha panahon han Biblia, an pagpuasa ginkakarawat han Dios kon ginhihimo ito nga may husto nga motibo. Pero diri nalilipay an Dios kon ginhihimo ito tungod ha sayop nga mga rason. Kondi, an Biblia waray magsugo o magdumiri ha mga tawo yana nga magpuasa.

•   Kon nangangaro hin bulig ngan giya tikang ha Dios. An mga tawo nga tikadto ha Jerusalem nagpuasa basi ipakita nga sinsero hira nga nangangaro han bulig han Dios. (Ezra 8:21-23) May mga panahon nga hira Pablo ngan Bernabe nagpuasa han nagpili hira hin mga tigurang ha kongregasyon.—Buhat 14:23.

•   Kon namamalandong ha katuyoan han Dios. Katapos mabawtismohan hi Jesus, nagpuasa hiya hin 40 ka adlaw basi iandam an iya kalugaringon ha pagbuhat han kaburut-on han Dios antes tikangan an iya ministeryo.—Lucas 4:1, 2.

•   Kon nagbabasol ha nahimo nga mga sala. Pinaagi kan propeta Joel, ginsidngan han Dios an diri matinumanon nga mga Israelita: “Balik ha akon ha bug-os niyo nga kasingkasing, nga may pagpuasa ngan pagtangis ngan pagnguyngoy.”—Joel 2:12-15.

•   Kon nagsasaurog han Adlaw han Pagpara han Sala. An Balaud nga iginhatag han Dios ha nasud han Israel nag-uupod han sugo nga magpuasa ha tinuig nga Adlaw han Pagpara han Sala. a (Levitico 16:29-31) Angayan an pagpuasa hini nga okasyon kay nagpapahinumdom ito ha mga Israelita nga diri hira perpekto ngan ginkikinahanglan nira an pagpasaylo han Dios.

•   Basi magpabilib ha iba. Igintutdo ni Jesus nga an pagpuasa nga konektado ha relihiyon kinahanglan magin personal ngan pribado nga butang butnga han indibiduwal ngan han Dios.—Mateo 6:16-18.

•   Basi ipakita nga matadong ka. Kon nagpupuasa an usa, diri ito nagpapasabot nga mas maopay hiya ha moral o ha espirituwal.—Lucas 18:9-14.

•   Basi tabonan an tinuyo nga pagbuhat hin sala. (Isaias 58:3, 4) Ginkakarawat la han Dios an pagpuasa nga gin-uupdan han pagin masinugtanon ngan kinasingkasing nga pagbasol ha bisan ano nga nabuhat nga sala.

•   Basi sundon la an relihiyoso nga kustomre. (Isaias 58:5-7) Hini nga bahin, an Dios pariho hin kag-anak nga diri nalilipay kon an iya mga anak nagpapakita hin gugma ha iya tungod la kay gin-oobligar hira, ngan diri tikang ha kasingkasing.

 Diri. Ginsugo han Dios an mga Israelita nga magpuasa ha Adlaw han Pagpara han Sala, pero waray na niya ito ipatuman han permanente na nga ginpara ni Jesus an sala han mabinasulon nga mga tawo. (Hebreo 9:24-26; 1 Pedro 3:18) An mga Kristiano diri sakop han Mosaiko nga Balaud, nga nag-uupod han Adlaw han Pagpara han Sala. (Roma 10:4; Colosas 2:13, 14) Salit, an tagsa nga Kristiano an magdidesisyon kon magpupuasa ba hiya o diri.—Roma 14:1-4.

 Maaram an mga Kristiano nga an pagpuasa diri amo an nangunguna nga bahin han ira pagsingba. An Biblia nagsusumat nga diri malipayon an usa nga nagpupuasa. Ha kabaliktaran, kalipay an usa nga pangirilal-an han pagsingba han tinuod nga mga Kristiano, nga nagpapakita han personalidad ni Jehova, an “malipayon nga Dios.”—1 Timoteo 1:11; Eclesiastes 3:12, 13; Galacia 5:22.

 Sayop nga ideya: An mga Kristiano sadang magpuasa kon nagsasaurog han kamatayon ni Jesus.

 Kamatuoran: Waray sugoa ni Jesus an iya mga disipulo nga magpuasa kon nagsasaurog han iya kamatayon. (Lucas 22:14-18) Bisan kon nagsiring hi Jesus nga magpupuasa an iya mga disipulo ha iya kamatay, waray hiya magsugo hito, kondi nagsumat la hiya kon ano an mahitatabo. (Mateo 9:15) An Biblia nagsusugo ha mga Kristiano nga nagugutom nga kumaon anay ha ira balay antes magsaurog han Memoryal han kamatayon ni Jesus.—1 Corinto 11:33, 34.