An Kwarta ba an Hinungdan han Ngatanan nga Karaotan?

An baton han Biblia

Diri. An Biblia waray magsiring nga an kwarta maraot o nga ito an hinungdan han ngatanan nga karaotan. May mga nasiring nga igintututdo han Biblia nga an “salapi amo an gamut han ngatanan nga mga karat-an” pero diri ito tinuod. Lugod, an Biblia nasiring nga “an paghigugma han salapi amo an gamut han ngatanan nga mga karat-an.” a—1 Timoteo 6:10, An Baraan nga Biblia, kami an nag-italiko.

Ano an ginsisiring han Biblia mahitungod ha kwarta?

Kay ano nga nagpapahamangno an Biblia mahitungod ha gugma ha kwarta?

Paonan-o kita magpapahimulos ha sagdon han Biblia mahitungod ha kwarta?

Mga teksto ha Biblia mahitungod ha kwarta

Ano an ginsisiring han Biblia mahitungod ha kwarta?

An Biblia nasiring nga an kwarta, kon gagamiton ha maopay nga paagi, mahimo magin mapulsanon, puydi pa ngani ito magin “proteksyon.” (Eclesiastes 7:12) Dugang pa, ginkukumendasyonan han Biblia adton mahinatagon, nga nag-uupod ha paghatag hin kwarta sugad nga regalo.—Proberbios 11:25.

Pero an Biblia nagpapahamangno liwat ha aton nga diri himoon an kwarta nga magin pinakaimportante ha kinabuhi. Nasiring ito: “Mahigawas ha paghigugma ha kwarta an iyo pagkinabuhi, samtang kontento na kamo ha mga butang nga aada.” (Hebreo 13:5) Gintututdo hini nga an kwarta gamiton ha maopay nga paagi ngan diri magpinaniguro nga magin riko. Lugod, kinahanglan magin kontento kita ha pagkaada han mga butang nga aton gud ginkikinahanglan, sugad han pagkaon, bado, ngan urukyan.—1 Timoteo 6:8.

Kay ano nga nagpapahamangno an Biblia mahitungod ha gugma ha kwarta?

An hakog nga mga tawo diri magkakaada kinabuhi nga waray kataposan. (Efeso 5:5) An usa nga rason tungod kay an kahakog usa nga klase han idolatriya, o buwa nga pagsingba. (Colosas 3:5) Usa pa, tungod han ira paniguro nga makuha an ira ginhihingyap, kasagaran na nga ginbabalewaray han mga hakog an mag-opay nga prinsipyo. An mga “nagdadagmit nga magin riko diri magpapabilin nga waray sala,” siring han Proberbios 28:20. Posible pa ngani hira masulay nga maghimo hin mga krimen, sugad han pag-blackmail, pangilkil, panlimbong, pagkidnap, o pagpatay.

Bisan kon an gugma ha kwarta diri magresulta hin maraot nga buhat, puydi ito magkaada iba pa nga diri maopay nga epekto. An Biblia nasiring nga “an mga determinado magin riko nahuhulog ha pagsulay ngan ha bitik ngan ha damu nga linurong ngan nakakadaot nga mga hingyap.”—1 Timoteo 6:9.

Paonan-o kita magpapahimulos ha sagdon han Biblia mahitungod ha kwarta?

Kon diri naton igbabalyo ha kwarta an aton mga prinsipyo ha moral ngan espirituwal, magkakaada kita respeto ha kalugaringon ngan pag-uyon ngan suporta han Dios. Nagsasaad hiya ha mga tawo nga naniningkamot gud nga lipayon hiya: “Diri ko gud ikaw babayaan, ngan diri ko gud ikaw papabay-an.” (Hebreo 13:5, 6) Ginpapasarig liwat kita niya nga “an matinumanon nga tawo makakakarawat hin damu nga bendisyon.”—Proberbios 28:20.

Mga Teksto ha Biblia Mahitungod ha Kwarta

Eclesiastes 7:12: “An kwarta usa nga proteksyon.”

Karuyag sidngon: Kon an kwarta ginagamit ha maopay nga paagi, mahimo ito magin mapulsanon kay naghahatag ito hin seguridad.

Lucas 12:15: “Bisan kon an usa nga tawo may kahuraan, an mga butang nga iya gintatag-iya diri naghahatag ha iya hin kinabuhi.”

Karuyag sidngon: An kwarta diri amo an pinakaimportante ha kinabuhi, ngan diri ito makakatalwas ha aton.

1 Timoteo 6:10: “An gugma ha kwarta usa nga gamot han ngatanan nga klase hin nakakadaot nga mga butang, ngan ha pagtinguha hini nga gugma an iba naisimang tikang ha pagtoo ngan ginbuno an ira kalugaringon hin damu nga kasakit.”

Karuyag sidngon: An kwarta diri maraot. Pero an mga tawo nga nahigugma ha kwarta—nga naghihimo hito nga pinakaimportante ha ira kinabuhi—naghahatag la hin mga problema ha ira kalugaringon, sugad han pagkabungkag han pamilya ngan maluya nga kahimsog tungod han sobra nga pagtrinabaho.

Hebreo 13:5: “Mahigawas ha paghigugma ha kwarta an iyo pagkinabuhi, samtang kontento na kamo ha mga butang nga aada.”

Karuyag sidngon: Imbes nga magpinaniguro nga magkaada damu nga kwarta, maaramon kita kon magigin kontento kita ha kon ano an aton ginkikinahanglan.

Mateo 19:24: “Mas masayon pa an kamelyo makalusot ha luho han dagum kay ha makasulod ha Ginhadian han Dios an riko nga tawo.”

Karuyag sidngon: Gin-imbitar pa la ni Jesus nga magin iya sumurunod an usa nga riko nga batan-on nga lalaki. Diniri an lalaki tungod kay hinigugma niya an iya mga panag-iya. Salit hi Jesus naghatag hin pahamangno. Kon gin-uuna han usa nga tawo an karikohan imbes nga an Dios, mawawara an iya paglaom nga mabuhi ha waray kataposan.