Mga Proberbios 25:1-28
25 Ini liwat an mga darahunon ni Solomon,+ nga ginkopya ngan gintarampo han mga tawo ni Hezekias+ nga hadi han Juda:
2 Kadungganan han Dios an pagsekreto han usa nga butang,+Ngan kadungganan han mga hadi an pag-usisa ha usa nga butang.
3 Sugad la nga an kalangitan hitaas ngan an tuna hilarom,An kasingkasing han mga hadi diri matugkad.
4 Kuhaa an hugaw tikang ha silber,Ngan magawas ito nga napurog na gud.+
5 Kuhaa an maraot nga tawo tikang ha atubangan han hadi,Ngan an iya trono maiestablisar hin marig-on ha katadongan.+
6 Ayaw pasidunggi an imo kalugaringon ha atubangan han hadi,+Ngan ayaw pagpwesto ha hinmumutangan han mga prominente,+
7 Kay mas maopay na la nga sumiring hiya ha imo, “Kadi didi,”
Kay ha pakaalohan ka niya ha atubangan han usa nga dungganon.+
8 Ayaw pagdali-dali ha pagpasaka hin kaso,Kay ha urhi, ano an imo bubuhaton kon pakaalohan ka han imo igkasi-tawo?+
9 Ipakiistorya ha imo igkasi-tawo an imo kaso ha iya,+Pero ayaw ipanumat an ginsiring ha imo hin sekreto,*+
10 Basi diri ka maibutang ha kaarawdan han tawo nga namamatiNgan diri ka makapasarang hin maraot nga sumat* nga diri na mababawi.
11 Pariho hin mga mansanas nga bulawan dida ha silber nga mga inukitan*An pulong nga ginyakan ha husto nga panahon.+
12 Pariho hin ariyos nga bulawan ngan hin alahas nga hinimo ha maopay nga klase hin bulawanAn tawo nga maaramon nga nagsasaway ngada ha talinga nga namamati.+
13 Pariho han kataghom han niebe ha adlaw han panganiAn matinumanon nga mensahero para ha mga tawo nga nagsugo ha iya,Kay iya narirepreskohan an iya agaron.*+
14 Pariho han mga dampog ngan hangin nga waray dara nga uranAn tawo nga nanhahambog hin regalo nga waray man ngani niya ighatag.*+
15 Pinaagi han pagpailob nakakabig an usa nga kumander,Ngan an buotan* nga dila makakabari hin tul-an.+
16 Kon makaagi ka hin dugos, kaona la an imo ginkikinahanglan,Kay kon kumaon ka hin sobra kadamu, bangin igsuka mo ito.+
17 Ayaw agsoba an pagbisita ha balay han imo igkasi-tawo,Basi diri hiya masumhan ha imo ngan mangalas ha imo.
18 Pariho hin ibaralbag nga pan-girra ngan hin espada ngan hin matais nga panaAn tawo nga nagtitestigo hin buwa kontra ha iya igkasi-tawo.+
19 Pariho hin tipak nga ngipon o hin nagkikiang-kiang nga tiilAn pagsarig ha diri matataporan* nga tawo ha mga panahon han kakurian.
20 Pariho hin tawo nga naghuhukas hin bado ha mahagkot nga adlawNgan pariho hin suoy nga iginbububo ha soda*
An tawo nga nagkakanta hin mga kanta ngada ha masurub-on nga kasingkasing.+
21 Kon ginugutom an imo kaaway,* tagi hiya hin tinapay nga makakaon;Kon gin-uuhaw hiya, tagi hiya hin tubig nga maiinom,+
22 Kay ha pagbuhat hini gintatambakan mo hin mga bága an iya ulo,*+Ngan babalosan ka ni Jehova.
23 An hangin nga tikang ha norte nagdadara hin bunok,Ngan an dila nga mahilig magtsismis nagriresulta hin nasisina nga nawong.+
24 Mas maopay na la nga umukoy ha kanto han atopKay ha umukoy ha sulod han balay upod an makiawayon* nga asawa.+
25 Pariho hin matugnaw nga tubig ha kapoy nga kalag*An maopay nga sumat tikang ha hirayo nga lugar.+
26 Pariho hin malapok nga burabod ngan hin ruba nga bubonAn matadong nga tawo nga nagpapadára ha* maraot nga tawo.
27 Diri maopay an pagkaon hin sobra kadamu nga dugos,+Ngan diri darayawon an paghingyap han kalugaringon nga kadayawan.+
28 Pariho hin syudad nga gin-guhangan an paderAn tawo nga diri nakakapugong han iya kasina.*+
Mga footnote
^ O “an mga sekreto han iba.”
^ O “hin nakakadaot nga hurobhurob.”
^ O “mga burutangan.”
^ O “an kalag han iya agaron.”
^ Lit., “hin regalo nga buwa.”
^ O “malumo.”
^ O posible nga “diri maunungon.”
^ Usa nga klase hin asin nga ginagamit hadto ha paglimpyo ngan paglaba.
^ Lit., “an tawo nga nangangalas ha imo.”
^ Karuyag sidngon, basi pahumukon an kasingkasing han tawo ngan tunawon an iya pagin matig-a.
^ O “reklamador.”
^ O “nakikigkompromiso ha.” Lit., “nagpaparadingpading ha atubangan han.”
^ O “diri nakakakontrol han iya espiritu.”
