Sugad nga diri perpekto nga mga tawo, nakukurian kita nga pirme kontrolon an aton mga hingyap. Kon bubuhaton naton an bisan ano nga aton karuyag, puydi mawara an pag-uyon ni Jehova ha aton. Pananglitan, mas hinigugma han iba an pagkaon, bado, ngan urukyan kay ha Dios. Gintatagbaw han iba an ira seksuwal nga hingyap ha paagi nga nagtatalapas ha mga suruklan han Dios. (Ro 1:26, 27) An iba liwat nagpapadara ha presyur han ira mga kaupod kay karuyag nira nga karawaton o maruyagan hira.​—Ex 23:2.

Paonan-o naton padayon nga makukontrol an aton mga hingyap? Kinahanglan buhaton naton an aton gimaopayi nga magpokus ha espirituwal nga mga butang. (Mat 4:4) Kinahanglan liwat nga magpabulig kita kan Jehova basi makontrol an aton mga hingyap. Kay ano? Kay maaram hiya kon ano an pinakamaopay ha aton ngan kon paonan-o tatagbawon an aton husto nga mga hingyap.​—Sal 145:16.

KITAA AN VIDEO NGA AYAW TUGUTI NGA MADAOT AN IMO KINABUHI TUNGOD HAN PAGSIGARILYO, NGAN BATONA AN MASUNOD:

• Kay ano nga an iba nga tawo nagsisigarilyo?

• Ano an puydi magin epekto ha imo han pagsigarilyo?

• Kay ano nga sayop an pagsigarilyo ngan pag-vape?—2Co 7:1

• Ano an imo bubuhaton kon may mag-aghat ha imo nga magsigarilyo o paonan-o mo iuundang ito nga bisyo?