Hinigugma Ka han Dios
AN Biblia may-ada han pinakamaopay nga sagdon para ha aton, kay tikang ito ha Dios. Bisan kon diri ito libro para ha kahimsog, makakabulig ito ha aton ha praktikal nga mga paagi nga makaya an makuri nga mga kahimtang, kasamok ha hunahuna, kasakit, ngan makasurubo nga mga problema ha pisikal ngan mental nga kahimsog.
Labaw ha ngatanan, an Biblia nagpapasarig ha aton nga an aton Maglalarang, hi Jehova nga Dios, a mas nakakaintindi ha aton mga panhunahuna ngan mga inaabat kay ha bisan hin-o. Karuyag gud niya nga buligan kita nga makaya an bisan ano nga problema nga aton gin-aatubang. Pananglitan, pansina an duha nga nakakaliaw nga teksto ha Biblia:
“Hi Jehova hirani ha mga ruba an kasingkasing; iya gintatalwas an mga rumok an espiritu.”—SALMO 34:18.
“Ako, hi Jehova nga imo Dios, an nakapot ha imo too nga kamot, an nasiring ha imo, ‘Ayaw kahadlok. Bubuligan ko ikaw.’”—ISAIAS 41:13.
Kon sugad, paonan-o kita ginbubuligan ni Jehova nga makaya an mga problema ha mental nga kahimsog? Sugad han imo makikita ha masunod nga mga artikulo, hinigugma gud kita ni Jehova ngan ginpapakita niya ito ha damu nga praktikal nga paagi.
a Jehova an personal nga ngaran han Dios.—Salmo 83:18.
