Nabasa mo ba hin maopay an bag-o nga mga gowa han An Barantayan ngan Ang Bantayan? Kitaa kon mababaton mo an masunod nga mga pakiana:

Ano nga klase hin sala an ginhihisgotan ni Jesus ha iya sagdon ha Mateo 18:15-17?

Naghihisgot hiya hin sala nga puydi masulbad han mga indibiduwal nga nahidadabi. Pero puydi liwat ini magresulta ha pagpaiwas ha kongregasyon kon diri masulbad. Ini nga sala mahimo mag-upod han panlimbong, o pagpakaraot.​—w16.05, p. 7.

Ano an mahimo mo buhaton basi magin mas mapulsanon an imo pagbasa ha Biblia?

Pagbasa nga may abrido nga hunahuna ngan hibaroi an mga leksyon nga mahimo mo iaplikar; pakianhi an imo kalugaringon sugad han ‘Paonan-o ko ini magagamit ha pagbulig ha iba?’; ngan gamita an mga garamiton ha pagsaliksik basi mas masabtan mo an imo ginbabasa.​—w16.05, p. 24-26.

Sayop ba para ha usa nga Kristiano nga magtaguminatay bisan kon natoo hiya han pagkabanhaw?

An pagtoo han pagkabanhaw diri nagwawara han duro nga kasakit nga bangin inaabat han usa nga Kristiano. Hi Abraham nagtaguminatay tungod han kamatay ni Sarah. (Gen. 23:2) Ha urhi, hinay-hinay nga mawawara an kasakit nga inaabat han usa.​—wp16.3, p. 4.

Hin-o an ginsisimbolohan han tawo nga may surudlan hin tinta han sekretaryo ngan han unom nga kalalakin-an nga may hinganiban nga iginhuhulagway ha Esekiel kapitulo 9?

Nagsisimbolo hira han langitnon nga kasundalohan nga nakigbahin ha pagbungkag han Jerusalem ngan makikigbahin ha pagbungkag ha sistema ni Satanas ha Armagedon. Ha moderno nga katumanan, an tawo nga may surudlan hin tinta han sekretaryo nagsisimbolo kan Jesu-Kristo, an magbubutang hin tigaman ha mga matatalwas.​—w16.06, p. 16-17.

Ano nga mga pagsari an nalamposan han Biblia?

Naglampos ito tikang ha (1) nadudunot nga materyal nga ginsuratan hito, sugad han papiro; (2) pagkontra han mga lider han politika ngan relihiyon nga nangalimbasog pagbungkag hito; ngan (3) pangalimbasog han pipira nga bag-uhon an mensahe hito.​—wp16.4-TG, p. 4-7.

Paonan-o mahimo mapasimple han usa nga Kristiano an iya pagkinabuhi?

Hibaroi kon ano gud an imo panginahanglan ngan likyi an pamalit hin mga butang nga diri ginkikinahanglan. Paghimo hin makatadunganon nga badyet. Idispatsar an mga butang nga diri mo na ginagamit, ngan bayari an imo mga utang. Ibani an imo panahon ha sekular nga trabaho, ngan pagplano kon paonan-o mo mapapauswag an imo ministeryo.​—w16.07, p. 10.

Ano an ginsisiring han Biblia nga mas birilhon kay han bulawan o silber?

Iginpapakita han Job 28:12, 15 nga an kinaadman tikang ha Dios mas maopay kay han bulawan o silber. Samtang nangangalimbasog ka nga magkaada hito, padayon nga magin mapainubsanon ngan tipigi an marig-on nga pagtoo.​—w16.08, p. 18-19.

Angayan ba ha mga brother yana nga magkaada barangas o bungot?

Ha pipira nga kultura, an malimpyo nga pagkaarot ha barangas o bungot angayan ngan ginkakarawat, ngan diri ito nagmiminos ha mensahe han Ginhadian. Pero an iba bangin magdesisyon nga diri magkaada hito. (1 Cor. 8:9) Ha iba nga kultura ngan lugar, diri angayan para ha mga Kristiano an pagkaada hito.​—w16.09, p. 21.

Kay ano nga masasarigan an asoy ha Biblia mahitungod han away nira David ngan Goliat?

Hi Goliat mas hitaas la hin unom ka pulgada ha pinakahitaas nga tawo nga nairekord ha moderno nga panahon. Hi David tinuod nga tawo. Ginpapamatud-an ito han naukab nga kadaan nga inskripsyon nga may nakasurat nga “balay ni David” ngan han mga ginsiring ni Jesus. Napamatud-an liwat nga tinuod an mga lugar nga gin-unabi ha asoy.​—wp16.5, p. 13.

Ano an kaibahan han kahibaro, pagsabot, ngan kinaadman?

An tawo nga may kahibaro damu an hinbabaroan nga impormasyon, o kamatuoran. An usa nga may pagsabot maaram han koneksyon han tagsa nga impormasyon. Pero an tawo nga may kinaadman may-ada abilidad nga iaplikar ha praktikal nga paagi an iya nahibabaroan ngan nasasabtan.​—w16.10, p. 18.