“Pinaagi han usa nga tawo an sala sinulod ha kalibotan ngan an kamatayon pinaagi han sala, tungod hito an kamatayon dinangat ha ngatanan nga tawo.”​—ROMA 5:12.

Ginlarang han Dios an aton siyahan nga mga kag-anak, hira Adan ngan Eva, nga may perpekto nga hunahuna ngan lawas. Gintagan liwat niya hira hin paraiso nga urukyan ha tuna​—an garden han Eden. Ginsidngan niya hira nga puydi hira kumaon han bunga han ngatanan nga kahoy ha garden, labot la han usa. Pero ginpili nira Adan ngan Eva nga kumaon han bunga hito nga kahoy, ngan nakasala hira. (Genesis 2:15-17; 3:1-19) Tungod han ira pagin diri masinugtanon, ginpaiwas hira han Dios tikang ha garden, ngan nagin makuri an ira kinabuhi. Paglabay han panahon, nagkaada hira mga anak, ngan makuri liwat an ira kinabuhi. Hira ngatanan nalagas ngan namatay. (Genesis 3:23; 5:5) Nagkakasakit kita, nalalagas, ngan namamatay kay tikang kita hiton siyahan nga mag-asawa.

“An bug-os nga kalibotan aada ha gahum han usa nga maraot.”​—1 JUAN 5:19.

Iton “usa nga maraot” gintatawag nga Satanas. Usa hiya nga diri nakikita nga espiritu nga linarang nga nagrebelde ha Dios. (Juan 8:44; Pahayag 12:9) Ha urhi, an iba nga espiritu nga mga linarang umupod kan Satanas. Gintatawag hira nga mga demonyo. Ginagamit hinin magraot nga espiritu an ira gahum basi limbongan an mga tawo ngan ipahirayo hira ha Maglalarang. Ira gin-iimpluwensyahan an damu nga tawo  nga magbuhat hin maraot. (Salmo 106:35-38; 1 Timoteo 4:1) Nalilipay hi Satanas ngan an mga demonyo nga paantuson an mga tawo.

“Anoman an iginsasabwag han usa nga tawo, ito liwat an iya aanihon.”​—GALACIA 6:7.

Ha iba-iba nga paagi, nag-aantos kita tungod han napanunod nga sala ngan han impluwensya ni Satanas hini nga kalibotan. Pero usahay an mga tawo la liwat an nakakadugang ha ira mismo pag-antos. Paonan-o? Kon nagbubuhat hira hin maraot o naghihimo hin diri maaramon nga mga desisyon, kasagaran na nga nag-aani hira hin magraot nga resulta. Ha kabaliktaran, kon an mga tawo nagbubuhat hin maopay, nag-aani hira hin mag-opay nga resulta. Pananglitan, an bana ngan tatay nga tangkod, maduruto magtrabaho, ngan nahigugma ha iya pamilya mag-aani hin damu nga mag-opay nga butang ngan makakapalipay ha iya pamilya. Pero adton naghuhuygo, sobra nga nainom, o hubya mahimo magin hinungdan nga magin pobre hiya ngan an iya pamilya. Salit maaramon an pagpamati ha aton Maglalarang. Karuyag niya nga mag-ani kita hin damu nga mag-opay nga butang, upod na an “hura nga kamurayawan.”​—Salmo 119:165.

“Ha kataposan nga mga adlaw . . . , an mga tawo magigin mahigugmaon ha ira kalugaringon, mahigugmaon ha kwarta, . . . diri masinugtanon ha mga kag-anak, . . . waray pagpugong ha kalugaringon, mapintas, waray gugma ha kaopayan.”​—2 TIMOTEO 3:1-5.

Yana, an panggawi han damu nga tawo sugad gud han igintagna. An ira panggawi dugang nga pamatuod nga aanhi na kita ha “kataposan nga mga adlaw” han kalibotan yana. Igintagna gihap han Kasuratan nga an mga girra, kakulang hin pagkaon, magkusog nga linog, ngan mga sakit pamatuod liwat nga nabubuhi kita ha kataposan nga mga adlaw. (Mateo 24:3, 7, 8; Lucas 21:10, 11) Mga hinungdan ini nga damu an nag-aantos ngan namamatay.