Eric: Diri ako relihiyoso salit baga hin waray kita sadang pag-istoryahan.

Brian: Salamat han imo pagin prangka. Ako ngay-an hi Brian. Puydi ko ba ikaw makilala?

Eric: Ako hi Eric.

Brian: Mapakiana la unta ako, Eric, relihiyoso ba an iyo pamilya?

Eric: Oo. Kondi han binaya na ako ha amon balay han magkolehiyo ako, waray na ako panahon ha relihiyon.

Brian: Ngay-an? Ano an imo kurso?

Eric: Social studies ngan history. Mahilig gud ako ha history—an mahitungod ha kasaysayan han tawo.

Brian: Makapainteres gud an history. Maaram ka ba nga an Biblia usa nga libro han kasaysayan? Nahiupod mo na ba ito ha imo gin-aadman?

Eric: Ah, waray. Maaram ako nga maopay ito nga libro, pero waray ko gud mahunahuna nga an Biblia usa nga libro han kasaysayan.

Brian: Amo ba? Karuyag ko unta ipakita ha imo hin madaliay an pipira nga ehemplo hin husto nga kasaysayan nga mababasa ha Biblia.

Eric: Sige. Pero waray ako Biblia.

Brian: Okey la, may-ada man ako dara. An siyahan mababasa ha 1 Kronikas kapitulo 29, bersikulo 26 ngan 27. Nasiring ito: “Yana hi David an anak nga lalaki ni Jesse naghadi ha bug-os nga Israel. Ngan an panahon nga iya iginhadi ha Israel kap-atan ka tuig; pito ka tuig an iya paghadi didto ha Hebron, ngan katloan kag tulo ka tuig an iya paghadi didto ha Jerusalem.”

Eric: Paonan-o mo nasiring nga husto ito nga kasaysayan?

Brian: May mga kritiko nga nasiring nga waray gud umeksister hi Hadi David.

Eric: Kay ano nga ginkukwestyon nira an iya pag-eksister?

Brian: Tungod kay labot han Biblia, haros waray ebidensya nga nagpapamatuod nga ineksister hiya. Kondi han 1993, usa nga grupo hin mga arkeologo an nakaukab hin daan na gud nga bato nga may nakaukit nga mga pulong nga iginhubad nga “Balay ni David.”

Eric: Ngay-an?

Brian: Usa pa nga tawohan ha Biblia nga ginruhaduhaan an pag-eksister amo hi Ponsio Pilato nga usa nga gobernador ha panahon ni Jesus. Dinhi ha Lucas kapitulo 3, bersikulo 1, gin-unabi hiya kaupod han damu nga opisyal han gobyerno hito nga panahon.

Eric: Oo gud man. Nasiring dinhi nga “hi Ponsio Pilato an gobernador ha Judea, hi Herodes an magmarando ha distrito han Galilea.”

Brian: Husto. Maiha na nga ginruruhaduhaan han pipira nga eskolar kon ineksister gud ba hi Ponsio Pilato. Pero han naglabay nga mga 50 ka tuig,  may nabilngan nga bato ha Butnga Sinirangan nga may nakaukit nga iya ngaran dida hito.

Eric: Hmm. Yana ko la ito nabatian.

Brian: Nalilipay ako nga iistorya ito ha imo.

Eric: Ha tinuod la, bilib gud ako ha pagkasurat han Biblia, pero para ha akon kadaan na ito. Bangin husto ito ha kasaysayan, kondi baga hin diri na ito praktikal yana.

Brian: Damu an may sugad hito nga panhunahuna. Pero iba an akon opinyon mahitungod hito. Hunahunaa ini: Waray magbag-o an importante nga mga panginahanglan han tawo. Pananglitan, kinahanglan naton pirme hin pagkaon, bado, ngan balay. Karuyag liwat naton pirme nga makigkomunikar ha iba ngan magkaada malipayon nga pamilya. Diri ba ito ngatanan importante ha aton?

Eric: Sabagay, may punto ka.

Brian: An Biblia makakabulig ha aton mahitungod hito nga mga butang. Amo nga masisiring naton nga kadaan ito nga libro pero moderno.

Eric: Ano an imo karuyag sidngon?

Brian: Karuyag ko sidngon, an Biblia nagsusulod hin mga prinsipyo nga mapulsanon pa gihapon yana sugad la nga mapulsanon ito han iginsurat ito mga siglo na an naglabay.

Eric: Ha ano nga bahin?

Brian: Kon may kalabotan ha timbang nga panhunahuna ha kwarta, malipayon nga pamilya, o pagin maopay nga sangkay, an mga prinsipyo ha Biblia makakabulig ha aton. Ini nga libro pariho hin mapa nga nabulig basi magmalampuson an usa. Pananglitan, mauyon ka ba nga makuri yana magin bana ngan ulo han pamilya?

Eric: Balitaw. Mga usa na ka tuig kami nga kasal han akon asawa, pero may mga panahon la gihapon nga diri nagkakauyon an amon panhunahuna ha mga butang.

Brian: Oo, pero may makakabulig nga mga prinsipyo ha Biblia. Pananglitan an Efeso kapitulo 5. Alayon pagbasa han bersikulo 22, 23, ngan 28.

Eric: Sige. Nasiring ito: “An mga asawa magpasakop ha ira bana sugad han ira pagpasakop ha Ginoo, kay an bana amo an ulo han iya asawa sugad la nga an Kristo amo an ulo han kongregasyon nga iya lawas, kay hiya an paratalwas hito.” Ngan an bersikulo 28 nasiring: “Sugad hito sadang higugmaon han mga bana an ira asawa pariho han ira paghigugma ha ira kalugaringon nga lawas. An nahigugma ha iya asawa nahigugma ha iya kalugaringon.”

Brian: Salamat. Di’ ba kon susundon han mag-asawa inin simple nga sagdon magigin mas malipayon an pamilya?

Eric: Posible. Pero masayon la ito yaknon kondi makuri buhaton.

Brian: Husto ito, tungod kay waray perpekto nga tawo. Ngani, dida hito nga kapitulo may bersikulo nga nag-aaghat ha aton nga magin makatadunganon. * Ha anoman nga relasyon, kinahanglan magin timbang ngan andam kita nga unahon an kaopayan han iba. An Biblia nakabulig gud ha amon nga mag-asawa nga mabuhat ito.

Eric: Sabagay.

Brian: Maaram ka, an mga Saksi ni Jehova may-ada Web site nga may mapulsanon nga mga impormasyon may kalabotan ha mag-asawa ngan ha pamilya. Kon tatagan mo ako hin pipira ka minuto, ipapakita ko ha imo an usa nga sampol.

Eric: Sige, okey la.

Brian: Salamat. An adres han amon Web site, www.mt711.com/war. Ini an home page.

Eric: Kaopay han retrato.

Brian: Retrato ito han pagsangyaw nga amon ginhihimo ha bug-os nga kalibotan. Okey, adi na. Dinhi ha seksyon nga “PUBLIKASYON” may makikita ka nga bag-o nga mga magasin ngan iba pa nga publikasyon nga naghihisgot hin iba-iba nga topiko upod na an mahitungod ha pamilya. Pananglitan,  kitaon naton an brosyur nga Maopay nga Sumat Tikang ha Dios! Usa han mga leksyon dinhi may ulohan nga “Paonan-o Magigin Malipayon an Imo Pamilya?”

Eric: Kaopay man hini nga pakiana!

Brian: Ginhihisgotan hini nga leksyon an pipira nga impormasyon nga makakabulig basi magin malipayon an iyo pag-asawa. Tagda an parapo ha ilarom han pakiana 2. Puydi mo ba basahon an duha nga ultimo nga sentence?

Eric: Sige. Nasiring ito: “Sadang higugmaon ngan tahuron han mag-asawa an kada tagsa. Tungod kay diri hira hingpit, kinahanglan magpinasayloay hira basi magin malipayon an ira pag-asawa.” Husto gud ini.

Brian: Salamat. Usa han mga ginkotar dinhi nga teksto an Efeso 5:33. Puydi mo ba ini basahon?

Eric: Nasiring ito: “Sadang higugmaon han tagsa ha iyo an iya asawa sugad han iya paghigugma ha iya kalugaringon. Sugad man, an asawa sadang magkaada daku nga respeto ha iya bana.”

Brian: Naobserbaran mo ba nga ginpapabug-atan an paghatag ha kon ano an ginlalaoman han usa nga iya makakarawat?

Eric: Ano an imo karuyag sidngon?

Brian: Di’ ba karuyag han bana nga tahuron hiya han iya asawa, ngan an asawa naman karuyag niya masiguro nga hinigugma gud hiya han iya bana?

Eric: Oo.

Brian: Kon an bana pirme namimiling hin paagi basi maipakita an iya gugma ha iya asawa, diri ba mas masayon para ha asawa nga tahuron hiya?

Eric: Oo gud man.

Brian: Ini nga teksto iginsurat haros 2,000 ka tuig na an naglabay, pero kon susundon ini han mag-asawa, an tagsa ha ira mabubuligan ngan makakakarawat hin sagdon nga sigurado nga maglalampos.

Eric: Waray ako maghunahuna nga damu ngay-an an akon mahibabaroan ha Biblia.

Brian: Nalilipay ako han imo ginsiring. Karuyag ko unta bumalik basi pag-istoryahan naton an ikatulo nga pakiana, “Sadang ka ba makigbulag ha imo padis kon diri na kamo malipayon?” nga makikita dinhi hini gihapon nga leksyon ha amon Web site. *

Eric: Sige. Kikitaon namon nga mag-asawa ito.