Ke Fua Lelei Takotou Toe ʼOhoana
TE ʼU PULEʼAKI KI HE MAʼULI FAKAFAMILI FIAFIA
Ke Fua Lelei Takotou Toe ʼOhoana
HERMAN: * “Neʼe mate toku ʼuluaki ʼohoana ʼi te kōsea, kaʼe neʼe kua taʼu 34 tamā nofo ʼohoana. ʼI taku toe ʼohoana, neʼe fakatokagaʼi ʼe toku lua ʼohoana ia Linda, ʼe au fakatatau tuʼumaʼu ia ia ki toku ʼuluaki ʼohoana. Pea tahi, neʼe palalau tuʼumaʼu ʼoku kaumeʼa ki te ʼu kalitate ʼo toku ʼuluaki ʼohoana, pea neʼe itaita ai ia Linda.”
LINDA: “ ʼI taku ʼohoana mo Herman, neʼe au logoʼi tana fakamaʼuhigaʼi age tona ʼuluaki ʼohoana ʼi au. Neʼe ʼofainaʼi, mo agamalū pea mo agafakapoipoi. ʼI ʼihi temi, ʼe au feʼuiʼaki pe ʼe feala anai ʼi he ʼaho ke au hage ko ia.”
Neʼe mavete ia Linda mo tona ʼuluaki ʼohoana. Pea ʼe fiafia ia Linda mo Herman ʼi tanā felaveʼi. Neʼe nā tokagaʼi ko te toe ʼohoana, ʼe ʼi ai te ʼu fihifihia ʼe mole tatau mo te ʼuluaki ʼohoana. *
Kapau kua kotou toe ʼohoana, kotea ʼae ʼe kotou logoʼi ʼi takotou nofo ʼi te aluʼaga ʼaia? Koʼeni ia te tala manatu ʼa Tamara, neʼe toe ʼohoana, hili ki ai taʼu ʼe tolu ʼo tana mavete: “ ʼI tau ʼuluaki ʼohoana, ʼe ke manatu ʼe kolua nofo ʼohoana ʼo talu ai. Kaʼe ka ke toe ʼohoana, ʼe mole ke maʼu ia te manatu ʼaia, he neʼe kita mavete mo tokita ʼuluaki ʼohoana.”
Koia, tokolahi te ʼu taumatuʼa, ʼe natou fiafia ʼi tanatou toe ʼohoana. Neʼe fua lelei tanatou toe ʼohoana, pea ʼe toe feala mo koutou. ʼO feafeaʼi? Tou vakaʼi ia fihifihia ʼe tolu pea mo te ʼu pelesepeto *
Fakatohi-tapu ʼae ka tokoni mai anai ke tou lava fakatokatoka.ʼULUAKI FIHIFIHIA: ʼE KOTOU FAKATATAU TAKOTOU ʼULUAKI NOFO ʼOHOANA MO TE LUA.
Neʼe fakamatala fenei e Ellen, ʼae ʼe maʼuli ʼi Afelika ʼi Saute: “ ʼE mole faigafua ia taku galoʼi ia toku ʼuluaki ʼohoana, tafitō la moka ma fakalaka ʼi te ʼu koga meʼa ʼae neʼe ma tautau olo ʼo malolō ai mo toku ʼuluaki ʼohoana.” Pea tahi, kapau neʼe kua ʼuluaki ʼohoana tokotou hoa pea mo palalau tuʼumaʼu ʼo ʼuhiga mo ia, ʼe feala ke kotou logoʼi ia te faʼahi ʼaia.
TOKONI ʼAOGA: Kotou tali ia te manatu ʼae ʼe mole feala ke kotou fakagaloʼi ki tokotou hoa ia tona ʼuluaki ʼohoana, tafitō la mo kapau neʼe fualoa tanā nofo ʼohoana. Ko ʼihi ʼe natou fakamoʼoni, ʼe natou tautau fakatoʼo te higoa ʼo tonatou ʼuluaki ʼohoana ki te lua. ʼE kotou lava fakatokatoka feafeaʼi ia te faʼahi ʼaia? ʼE fakalotomalohiʼi koutou ʼi te Tohi-Tapu ke kotou femahinoʼaki.—1 Petelo 3:8.
ʼAua naʼa kotou tapuʼi age ki ai ia tana palalau ʼo ʼuhiga mo tona ʼuluaki ʼohoana. Kapau ʼe logoʼi ʼe tokotou hoa ia tona fia palalau ʼo ʼuhiga mo tona ʼuluaki ʼohoana, kotou fakalogo ki ai ʼaki he lotomahino pea mo he lotoʼofa. ʼAua naʼa kotou manatu ʼe ina fakatatau koutou ki ai. Neʼe ui fenei e Ian ʼae kua taʼu hogofulu ia tana kua toe ʼohoana: “Neʼe mole pe la heʼeki tapuʼi mai e toku ʼohoana ko Kaitlyn ia taku palalau ʼo ʼuhiga mo toku ʼuluaki ʼohoana. Kaʼe neʼe feala ai ke mahino ki toku aluʼaga ʼi te temi nei.” Ko te taʼi ʼu faipalalau ʼaia ʼe feala ke ina fakamalohiʼi ʼakotou felogoʼi mo tokotou hoa.
Kotou tokagaʼi tafitō ia te ʼu kalitate ʼo tokotou ʼohoana ʼaeni. ʼE mahino ia, ʼe lagi mole ina maʼu ia te ʼu kalitate peʼe ko te ʼu fealagia ʼo tokotou ʼuluaki ʼohoana, kaʼe ʼe lagi ʼe ʼi ai hona tahi ʼu kalitate. Koia, kotou fakamalohiʼi ʼakotou felogoʼi mo ia, ke mole kotou fakatatau ki he tahi age, kaʼe ke kotou tokagaʼi ia te ʼu faʼahi ʼae ʼe kotou leleiʼia ia ia. (Kalate 6:4) Ohage ko tona ui e Edmond ʼae neʼe toe ʼohoana: “ ʼE mole he ʼu fakakaumeʼa ʼe lua ʼe tatau, koia ʼe mole he ʼu ʼohoana ʼe lua ʼe tatau.”
ʼE lava feafeaʼi hakotou mole fakamaʼuhigaʼi fau ia takotou ʼuluaki nofo ʼohoana? ʼE ui e Jared neʼe ina leleiʼia te ʼu meʼa ʼae neʼe nā fai mo tona ʼuluaki ʼohoana, pea ʼi ʼihi temi ʼe ina toe manatuʼi. Kaʼe ʼi te temi nei, kua maʼuli fiafia ia mo tona lua ʼohoana.
ʼAHIʼAHI TE PULEʼAKI ʼAENI: Kotou fakalavelave ki tokotou ʼohoana pe ʼe ina leleiʼia ke kotou palalau ʼo ʼuhiga mo tokotou ʼuluaki ʼohoana. Kotou vakaʼi ia te temi ʼae ʼe mole tonu ke kotou palalau ʼo ʼuhiga mo te faʼahi ʼaia.
LUA FIHIFIHIA: ʼE FAI E ʼOKOTOU KAUMEʼA HE ʼU PALALAU ʼE LOTOMAMAHI AI TOKOTOU LUA ʼOHOANA.
ʼE manatuʼi e Javier, ʼae neʼe toe ʼohoana hili ki ai taʼu ʼe ono ʼi tana ʼosi mavete: “ ʼI te hili pe ʼo tamā ʼohoana, neʼe hage ki toku ʼohoana ʼe ʼahiʼahiʼi ia ia e ʼihi ʼo ʼoku kaumeʼa.” ʼE fakamatala fenei e Leo: “Neʼe ui age e ʼihi hahaʼi ki toku ʼohoana, kaʼe ʼe au tuʼu pe, ʼe natou leleiʼia tona ʼuluaki ʼohoana.”
TOKONI ʼAOGA: Kotou faiga ke kotou mahino ki ʼokotou kaumeʼa. Neʼe ui fenei e Ian: “ ʼE au mahalo, ʼe faigataʼa ki te ʼu kaumeʼa hanatou sisio pe ki he tokotahi ʼo te taumatuʼa ʼae neʼe natou feʼiloʼiʼaki.” Koia kotou “fakapotopoto, pea mo fonu i te agamalu” kia natou ʼaia. (Tito 3:2) Kotou tuku he temi ki ʼokotou kaumeʼa pea mo tokotou famili ke natou fakamamahani ki te aluʼaga foʼou ʼaia. Koteʼuhi ʼae neʼe kotou toe ʼohoana, ʼe lagi fetogi anai mo ʼokotou kaumeʼa. Neʼe toe ui e Javier, ʼaki te alu ʼo te temi, neʼe toe malohi ʼanā felogoʼi mo ʼonā ʼuluaki kaumeʼa. ʼE ina ui fenei: “ ʼE ma faiga ke ma fakakaumeʼa lelei mo ʼihi atu pea ʼe ko he toe tokoni kia maua.”
Kotou tokagaʼi ia te ʼu meʼa ʼae ʼe logoʼi e tokotou ʼohoana moka kotou fakatahi mo ʼokotou kaumeʼa. Kapau ʼe kotou faipalalau ʼo ʼuhiga mo tokotou ʼuluaki ʼohoana, kotou aga fakaʼeteʼete pea mo fakasiosio tonu ke ʼaua naʼa ufiufi tokotou hoa. ʼE ui fenei ʼi te taʼagā lea Fakatohi-tapu: “Ko he tahi, ae e palalau fakafuanoa, e ina fakalaveai te loto o hage ko he heleta, kae ko te alelo o te kau poto e ina ave te faitoo.”—ʼAHIʼAHI IA TE PULEʼAKI ʼAENI: Kotou fakakaukau fakatomuʼa ki te ʼu aluʼaga ʼae ʼe feala ke kotou ufiufi ai ia koutou peʼe ko tokotou hoa. Kotou faipalalau ʼo ʼuhiga mo te faʼahiga tali ʼae ʼe lelei ke kotou fai ki he tahi ʼe palalau atu ʼo ʼuhiga mo tokotou ʼuluaki ʼohoana.
TOLU FIHIFIHIA: ʼE FAIGATAʼA TAKOTOU TOE FALALA KI HE TAHI.
Neʼe ui fenei e Andrew, ʼae neʼe liakī e tona ʼohoana: “Neʼe au mataku naʼa toe liakī au. Ki muli age, neʼe au toe ʼohoana mo Riley. Neʼe au feʼuiʼaki pe ʼe lelei age anai taku aga ʼi ʼae ʼo te ʼuluaki ʼohoana ʼo Riley. Neʼe au mataku naʼa mole ina leleiʼia au pea fokifa kua alu mo he tahi age.”
TOKONI ʼAOGA: Kotou palalau mo tokotou hoa ki ʼakotou tuʼania. ʼE ui fenei ʼi te Tohi-Tapu: “E mole hoko te u fakatuutuu, o tupu ko te masiva fakakaukau.” (Taaga Lea 15:22) Neʼe tokoni ia te ʼu faipalalau ʼaia kia Andrew pea mo Riley ke nā fefalalaʼaki. ʼE ui fenei e Andrew: “Neʼe au ui age kia Riley, ʼe mole ko he puleʼaki lelei ia te mavete moka hoko ʼoma fihifihia pea neʼe ina ui mai, ʼe toe tatau mo ia. ʼAki te alu ʼo te temi, neʼe au falala leva ki ai.”
Kapau neʼe liakī tokotou hoa tona ʼuluaki ʼohoana, kotou fai ia meʼa fuli ke tupu ai hana falala kia koutou. Ohage la, ko Michel mo Sabine, ʼae neʼe nā mavete mo ʼonā ʼohoana, neʼe nā fakatuʼutuʼu ke nā fefakahaʼaki mo kapau ʼe tonu ke nā faipalalau mo ʼonā ʼuluaki ʼohoana. Neʼe ui fenei e Sabine: “Neʼe tokoni mai te fakatuʼutuʼu ʼaia ke ma fefalalaʼaki.”—Efeso 4:25.
ʼAHIʼAHI TE PULEʼAKI ʼAENI: Kotou fakasiʼisiʼi ia takotou faipalalau mo he tahi ʼe mole ko tokotou hoa, ʼi te telefoni peʼe ʼi te Neti.
Tokolahi neʼe natou toe ʼohoana pea neʼe fua lelei, ʼo toe feia aipe kia koutou. Ko he tahi ʼe toe ʼohoana kua ina iloʼi lelei age ia tona ʼuhiga ʼi tana ʼuluaki nofo ʼohoana. ʼE ui fenei e Andrew: “ ʼE au fiafia ʼaupito ʼi taku toe ʼohoana mo Riley. Hili ki ai taʼu ʼe 13 ʼo tamā ʼohoana, kua malohi ʼama felogoʼi pea ʼe mole au fakaʼamu ke fetogi.”
[ʼU nota]
^ Neʼe fetogi te ʼu higoa.
^ ʼE moʼoni ʼe mole tatau ia te aluʼaga ʼo he tahi neʼe mate tona ʼuluaki ʼohoana pea mo ʼae neʼe mavete mo tona ʼuluaki ʼohoana. Kaʼe neʼe fakatuʼutuʼu te alatike ʼaeni ke fua lelei ia te toe ʼohoana ʼa he tahi, tatau aipe pe kotea tona aluʼaga.
^ Kapau ʼe kotou fia maʼu he tahi ʼu fakamahino, kotou vakaʼi te alatike “ ʼE Feala Ke Lava Lelei Te Maʼuli ʼo Te ʼu Famili ʼAia” ʼo Te Tule Leʼo ʼo te ʼaho 1 ʼo Malesio 1999 neʼe ta e te kau Fakamoʼoni ʼa Sehova.
KOTOU FAI IA TE ʼU FEHUʼI ʼAENI KIA KOUTOU . . .
▪ Kotea te ʼu kalitate ʼo toku ʼohoana ʼe au leleiʼia?
▪ Kotea ʼae ʼe tonu ke kotou fai ke ʼaua naʼa ufiufi tokotou ʼohoana?
[Paki ʼo te pasina 8]
[Paki ʼo te pasina 10]
Kolua fakamalohiʼi ʼakolua felogoʼi ʼo kolua fai fakatahi ni meʼa ke kolua toe fakamanatuʼi