Mateo 15:1-39
15 Pea neʼe ʼomai mai Selusalemi te kau Faliseo mo te kau sekelipa ʼo natou olo age kia Sesu. Neʼe natou ui fenei age:
2 “He koʼe ʼe maumauʼi e ʼau tisipulo ia te talatisio ʼa te ʼu tagata ʼo te temi muʼa? Ohage la, ʼe mole natou fanofano* ʼi muʼa ʼo tanatou kakai.”
3 Neʼe ina tali fenei age kia natou: “He koʼe ʼe kotou maumauʼi te fakatotonu ʼa te ʼAtua ʼuhi ko takotou talatisio?
4 Ohage la, neʼe ui fenei e te ʼAtua: ‘Fakaʼapaʼapa ki tau tamai pea mo tau faʼe,’ pea ‘Ke matehi ia ia ʼae ʼe leakovi ki tana tamai peʼe ki tana faʼe.’
5 Kaʼe ʼe kotou ui fenei koutou: ‘Kapau ʼe ui fenei e he tagata ki tana tamai peʼe ki tana faʼe: “Ko meʼa fuli ʼae ʼe au maʼu pea ʼe feala ke ʼaoga atu, ʼe ko he meʼa ʼofa ia kua au foaki ki te ʼAtua,”
6 pea ʼe mole maʼua ia ke fakaʼapaʼapa ki tana tamai peʼe ki tana faʼe.’ Koia, ʼuhi ko takotou talatisio, neʼe kotou meʼa noaʼi ai te folafola ʼa te ʼAtua.
7 Kau malualoi, neʼe tonu te faifakakikite ʼa te polofeta ko Isaia ʼo ʼuhiga mo koutou, ʼi tana ui fenei:
8 ‘ ʼE fakaʼapaʼapa mai te hahaʼi ʼaeni kia te au ʼaki ʼonatou laugutu kaʼe ʼe mamaʼo ʼaupito ʼonatou loto ia te au.
9 ʼE mole he ʼuhiga ʼo tanatou haga atolasio mai kia te au, koteʼuhi ʼe natou akoʼi ki te hahaʼi te ʼu lekula fakatagata.’ ”
10 Neʼe ina pauʼi te hahaʼi ke natou fakaovi age kia te ia pea mo ina ui fenei age: “Kotou fakalogo pea mo mahino ki te ʼu folafola ʼaeni:
11 ʼE mole ko te meʼa ʼae ʼe hu ki te gutu ʼo te tagata ʼae ʼe ina ʼulihi ia ia, kaʼe ʼe ko te meʼa ʼae ʼe haʼu mai tona gutu.”
12 Pea neʼe olo age kia te ia te kau tisipulo ʼo natou ui fenei age: “ ʼE ke iloʼi koa neʼe tukia te kau Faliseo ʼi tanatou logo ki ʼau palalau?”
13 Neʼe ina tali fenei age: “Ko te ʼakau fuli ʼae neʼe mole to e taku Tamai ʼae ʼe ʼi selo, ʼe taʼaki anai.
14 Kotou tukunoaʼi natou. Ko natou ʼe ko he kau takitaki kivi. Pea kapau ʼe takitaki e he kivi he tahi age kivi pea ʼe nā fetoki anai ki he luo.”
15 Neʼe ui fenei age e Petelo: “Fakamahino mai kia matou ia te lea fakatata ʼaia.”
16 Neʼe ina ui fenei age: “Mo koutou foki, heʼeki kotou mahino koa koutou?
17 ʼE mole kotou iloʼi koa ko te meʼa ʼae ʼe hu ki te gutu ʼe hifo ki te fatu pea ʼe fakaalu leva ia ki tuʼa?
18 Kaʼe ko te meʼa ʼae ʼe haʼu mai te gutu ʼe haʼu ia mai te loto, pea ʼe ko te ʼu faʼahi ʼaia ʼae ʼe natou ʼulihi te tagata.
19 Ohage la, ʼe haʼu mai te loto te ʼu fakakaukau kovi, mo te ʼu fakapo, mo te tono, mo te ʼu felaveʼi fakasino heʼe ʼaoga,* mo te ʼu kaihaʼa, mo te ʼu fakamoʼoni loi pea mo te ʼu laukovi.
20 Ko te ʼu faʼahi la ʼaia ʼae ʼe natou ʼulihi te tagata. Kaʼe ʼe mole ʼuli te tagata mo kapau ʼe kai kaʼe neʼe mole fanofano.”*
21 Neʼe mavae ia Sesu mai ai, pea neʼe alu ki te koga fenua ʼo Tile mo Sitoni.
22 Pea neʼe alu age kia te ia te fafine Fenisia ʼo te koga meʼa ʼaia pea neʼe kalaga fenei: “ ʼAliki, Foha ʼo Tavite, ʼofa mai kia au. Kua kovi ʼosi taku taʼahine he neʼe ulu sino ai te temonio.”
23 Kaʼe neʼe mole gu age ia ki ai. Neʼe fakaovi age kia te ia ʼana tisipulo ʼo natou kole fenei age: “Fekau ke alu, he ʼe mole tuku tana kalaga mai.”
24 Neʼe ina tali fenei age: “Neʼe fekauʼi mai pe au ki te ʼu ovi ʼae kua hehe ʼo te puleʼaga ʼo Iselaele.”
25 Kaʼe neʼe haʼu te fafine ʼo hu kia te ia, ʼo ina ui fenei age: “ ʼAliki, tokoni mai kia au!”
26 Neʼe ina tali fenei age: “ ʼE mole lelei ke toʼo te foʼi pane ʼa te ʼu fanau ʼo laku ki te ʼu ʼuhiʼi kuli.”
27 Neʼe ina ui fenei age: “ ʼIo, ʼAliki, kaʼe ʼe kai e te ʼu ʼuhiʼi kuli te ʼu eveʼi pane ʼae ʼe maluku ifo mai te laupapa ʼo ʼonatou pule.”
28 Pea neʼe tali fenei age e Sesu ki ai: “Fafine, ʼe malohi tau tui. Ke hoko kia koe ʼo mulimuli ki te meʼa ʼae ʼe ke loto ki ai.” Pea neʼe malolo atu aipe tana taʼahine.
29 Neʼe mavae leva ia Sesu mai ai ʼo alu ki te ʼu tafaʼaki ʼo te Tai ʼo Kalilea. Neʼe hake leva ki te moʼuga pea neʼe nofo ifo ki lalo.
30 Pea neʼe fakaovi age kia te ia te hahaʼi kaugā malie. Neʼe natou ʼaumai te ʼu hahaʼi ketu, mo maʼimoa, mo kivi, mo ʼalelo mate, pea mo ʼihi atu kau mahahaki, ʼo tuku ifo ki ʼona vaʼe pea neʼe ina fakamalolo natou.
31 Neʼe punamaʼuli ai te hahaʼi ʼi tanatou sisio ʼae kua palalau te kau ʼalelo mate, kua malolo te kau maʼimoa, kua haʼele te ʼu ketu, pea kua sisio te kau kivi. Neʼe natou fakakololiaʼi ai te ʼAtua ʼo Iselaele.
32 Neʼe pauʼi e Sesu ʼana tisipulo ke natou olo age pea neʼe ina ui fenei: “ ʼE au ʼofa ki te hahaʼi, koteʼuhi kua ʼaho tolu tanatou nonofo mo au pea ʼe mole ʼi ai hanatou meʼa kai. Pea ʼe mole au loto ke natou liliu pakupaku, naʼa natou matapopo ʼi te ala.”
33 Kaʼe neʼe ui fenei age e te kau tisipulo kia te ia: “ ʼE ʼi ai koa he faʼahi, ʼi te koga meʼa lavaki ʼaeni, ʼe feala ke matou olo ʼo toʼo mai ai he ʼu foʼi pane ʼe feʼauga, ke makokona ai te toe hahaʼi tokolahi ʼaeni?”
34 Neʼe ui fenei age e Sesu kia natou: “Ko ʼakotou foʼi pane ʼe fia?” Neʼe natou tali fenei age: “Ko foʼi pane ʼe fitu pea mo te ʼu kiʼi ika.”
35 ʼI tana ʼosi fakatotonu ki te hahaʼi ke natou nonofo ifo ki lalo,
36 neʼe ina toʼo te ʼu foʼi pane ʼe fitu pea mo te ʼu ika. Hili tana fai te fakafetaʼi, neʼe ina tofitofi te ʼu foʼi pane pea ina foaki ki te kau tisipulo, pea neʼe natou tufatufa leva ki te hahaʼi.
37 Neʼe natou kakai fuli ai ʼo makokona, pea neʼe natou tanaki te ʼu toega kai, ʼo fofonu ai kato lalahi* ʼe fitu.
38 Pea ko natou ʼae neʼe kakai, neʼe ko te toko 4 000 hahaʼi tagata, ʼo mole lau ai te hahaʼi fafine pea mo te tamaliki.
39 ʼI tana ʼosi fakaliliu te hahaʼi, neʼe heka leva ki te vaka ʼo alu ki te koga fenua ʼo Makatane.
Nota ’i te lalo pasina
^ ʼE mole natou mulimuli ki te talatisio ʼo ʼuhiga mo te faʼahiga fanofano.
^ ʼI te Fakakeleka, pornéïa. Vakaʼi Te ʼu Kupu Mo ʼOna Fakaʼuhiga.
^ Neʼe mole mulimuli ki te talatisio ʼo ʼuhiga mo te faʼahiga fanofano.
^ Peʼe “kato faʼo meʼa kai.”