1^—3. მუ შეცდომა დუშვუ წინასწარმეტყველქ იუდაშე დო მუქ მაჸუნ თეს? (ქოძირით სურათ თე გვერდის)

იეჰოვაქ ართ-ართ წინასწარმეტყველ იუდაშე ისრაელიშ განდგომილ მეფეშა გოუტუ, ნამდა გუცხადებუდკო თიშა ღორონთიშ მკაცრ განაჩენი. თანდაბალ წინასწარმეტყველქ ართგურო შეასრულ ღორონთიშ დავალება დო იეჰოვაქ თის იერობოამიშ რისხვა გეუჩილითუ (1 მეფ. 13:1—10).

² მუჟამსით წინასწარმეტყველ ჸუჩა ირთუდუნ, შარას შურო ველუდუნ თეშ, ხანშამიშულირ კოჩიქ ქეშეხვად, ნამუთ ბეთელშე რდუ. თე კოჩიქ დუდ იეჰოვაშ წინასწარმეტყველო გაჩინებაფუ. თიქ მიოჩილითუ ახალგაზრდა კოჩი დო ხუჯი ეიორთაფუ იეჰოვაშ ზუსტ მითითებეფშა, ნამდა „ვაუჭკომუდკო ქობალ დო ვა უშუმუდკო წყარ ისრაელს“ დო „უკახალე თი შარათ ვა დურთინუდკო, სოვრეშეთ მორთუნ“. იეჰოვაქ ვემიწონუ თე ახალგაზრდა კოჩიშ საქციელი. უმოს გვიანო, თე წინასწარმეტყველ ჸუჩა ირთუდუნ თეშ, შარას ჯილოქ ქეშეხვად დო დოჸვილ თინა (1 მეფ. 13:11—24).

³ მუშენ მიქცუ ართ დროს მოკრძალებულ წინასწარმეტყველქ კადნიერო დო მუშენ აჸუნ მეტყურე მოხუცებულს? თეშ გურშენ ბიბლია მუთუნს ვეჩიებ. შილებე თე წინასწარმეტყველს გაჭყორდუკო, ნამდა თის ღორონთწკუმა ართო გილულა მეთხიებუდ (წეკითხით მიქაშ 6:8). მუჟამსით ბიბლია იეჰოვაწკუმა ართო გილულაშენ  იჩიებუნ, თინა გულისხმენს ღორონთშა მენდებას, თიშ უზენაესობაშ მხარეს გერინას დო თიშ ხემძღვანელობაშ მეჸუნას. მოკრძალებულ კოჩის ჯგირო არჩქილე, ნამდა თინა ხშირას ოკო მიმართენდას ლოცვათ მუშ მოჸოროფე დო ირფელიშ შემალებე მუმას. წინასწარმეტყველს შეულებუდ იეჰოვას ქოთხუკო, ქუგაგებაფუკო მუშ მითითებეფი, მარა ბიბლია ვეჩიებ, ქიმიქცუ დო ვარ თიქ თაშ. მინშა ჩქი ხოლო გივორეთ სერიოზულ საკითხეფიშ წოხლე დო შილებე ვამჩქუდან, მუშ კეთება იჸუაფ სწორ. იეჰოვაშ ხემძღვანელობას მოკრძალებულო ქობგორუნთ-და, დუც ეუჩილითუანთ სერიოზულ შეცდომეფს.

4. მუს გებგენთ თე სტატიაშე?

⁴ წოხლენ სტატიაშე ქიგებგით, მუშენ რე მოკრძალება მნიშვნელოვან ქრისტიანშო დო მუ მიშურს თიშა. მარა, მუ დროს შილებე გიმიცადას ჩქინ მოკრძალებაქ? მუჭო შემლებუნა თე თვისებაშ განვითარება დო რთულ სიტუაციეფს თიშ გიმორჩქინა? თე კითხვეფიშ პასუხეფი მიბღათინ თიშ გურშენ, გუვარჩუათ სუმ ნაჩინებ სიტუაცია, მუჟამსით შილებე ჩქინ მოკრძალებაქ გეგმიცადას (იგავ. 11:2).

5, 6. მუჭო გიმირჩქინ მოკრძალება ბარზილაიქ?

⁵ ჩქინ მოკრძალებაქ შილებე გეგმიცადას, მუჟამსით მათირუნა მდგომარეობა ვარდა დავალებეფი. მუჟამსით დავითიქ ბარზილაის მეფეშ დოხორუს ცხოვრება შესთავაზუნ, ბარზილაიქ თენა დიდ პატივო მირჩქინ. ბარზილაი თე შეთავაზებას დეთანხმებუდ-და, თის შეიალებედ გაგრძელუკო მეფეწკუმა ურთიერთობა. მარა, ბარზილაიქ ვარია ქოთქუ მეფეშ შემოთავაზებაშენ. მუშენ მიქცუ თიქ თაშ? ბარზილაი უკვე ხანშა რდუ მიშულირ, ათეშგურშენ ვაკოდ, მეფეს ოღალო გიანჯირკო. ბარზილაიქ მეფეს უწუ, ნამდა მუშ მანგიორო ქიმჰამი მიდუჸუნაფუდკო, ნამუთ სავარაუდოთ მუშ ართ-ართ ქომოლსქუა რდუ (2 სამ. 19:31—37).

⁶ მოკრძალებაქ მეხვარ ბარზილაის, მეუღებუდკო ჭკვერულ გადაწყვეტილება. თის დავითიშ შეთავაზება თიშ გურშენ ვაუვარებ, ნამდა ახალ პასუხიშმგებლობაშ ეჭოფუაშა ოშკურუდ, ვარდა ოკოდ ცხოვრებაშ დოსკილადირ წანეფი გემუანო გუტარებუდკო. თის არჩქილედ მუშ მდგომარეობა დო თინა, ნამდა ვაშულებუდ ისხიშ კეთება. თის ვაკოდ, მუშ დუდშა შეულებუდუნ თიშე მეტ ეუჭოფუდკო (წეკითხით გალატელეფიშ 6:4, 5). ზედმეტო ქოფიფქრენთ მდგომარეობაშ მეღებაშენ, ვარდა სახელიშ აღიარებაშენ-და, ჩქინ დუდშე დიდ წარმოდგენა ქუმაშინა, შხვეფიშ ქიმენჯარებუნა დო საბოლათ გურ გომტირხუნა (გალ. 5:26). თეშ გინაწონს, მოკრძალება მოხვარუნა, არძაქ ართო ჩქინ უნარით დო ძალეფით განვადიდათ ღორონთი დო მივეხვარათ შხვეფს (1 კორ. 10:31).

7, 8. მუჭო მიმეხვარებუნა მოკრძალება, ნამდა ჩქინ დუც ვემვენდათ?

⁷ მეტ პასუხიშმგებლობეფს ბღებულენთინ, მეტ ძალაუფლება ხოლო მუმაჩამუნა დო თექ შილებე ჩქინ მოკრძალება გაგმოცადას. მუჟამსით ნეემიაქ იერუსალიმს ცხოვრენდესინ თი ხალხიშ გაჭირებაშ გურშენ ქიგეგუნ, იეჰოვას შურ დო გურით მიმართ ლოცვათ (ნეემ. 1:4, 11). იეჰოვაქ ქიმირჩქილუ თიშ ლოცვა დო აღძრუ მეფე არტაქსერქსე, ნეემია იუდეაშ გამგებელო ქუდანიშნუკო. ნეემიას მაღალ მდგომარეობა უკინებუდ, ქონება დო ძალაუფლება ხოლო უღუდ, მარა თინა დღას ვარდ მენდებულ მუშ დუდშა დო გამოცდილებაშა. თინა კინ აგრძელენდ ღორონთწკუმა ართო გილულას დო ირიათო ღორონთიშ სიტყვას გორუნდ ხემღვანელობას (ნეემ. 8:1, 8, 9). ნეემია ვაბატონენდ ხალხწკუმა, პირიქით იშო ოხვარუდ თინეფს (ნეემ. 5:14—19).

⁸ ნეემიაშ მაგალითშე იძირე, მუჭო მოხვარუნა მოკრძალება, ახალ დავალებეფიშ ვარდა მეტ პასუხიშმგებლობეფიშ მეღებაშ უკულ, ხვალე ჩქინ დუდშა დო ძალეფშა ვა ვორდათ მენდებულ. უხუცესიქ, ნამუთ ხვალე მუშ გამოცდილებაშა რე მენდებულინ,  შილებე იეჰოვას ხემძღვანელობა ვათხუას თეშ ქიდიჭყას კრებაშ საქმეეფიშ კეთება. შხვეფქ შილებე დიო გეგნოჭყვიდან მუდგაინ საკითხი დო უკულ ქოთხუან ღორონთის, ნამდა აკურთხას თინეფიშ გადაწყვეტილება. მარა ქიჸუაფუდუო თენა მოკრძალებულ საქციელი?! მოკრძალებულ კოჩის ირიათო შუ მუშ მდგომარეობა ღორონთიშ წოხოლე დო უჩქ მუშ ადგილ ღორონთიშ ორგანიზაციას. მუდგა რჩქინა დო გამოცდილება ვამღუდანინ, ჩქინ დუც ოკო ვემვენდათ, განსაკუთრებულო მუჟამსით ნაჩინებ სიტუაციეფიშ დო პრობლემეფიშ წოხოლე გივორეთ (წეკითხით იგავეფიშ 3:5, 6). ჩქი ღორონთიშ დიდ ოჯახიშ წევრეფი ვორეთ დო ჩქინ მიზან დუდიშ გიმორჩქინა ვარინ, პირიქით ირნერო ვოცადუდათ ოკო თი პასუხიშმგებლობეფიშ შესრულებას, ნამუთ ოჯახის ვარდა კრებას მობარუნა (1 ტიმ. 3:15).

9, 10. მუჭო მოხვარუნა მოკრძალება, მუჟამსით ბრალ ვამღუნან თეშ მაკრიტიკენა?

⁹ ეფი ვარე დუდიშ გაკონტროლება, მუჟამსით ბრალ ვამღუნან თეშ მაკრიტიკენა. ხანა ხშირას ინგარდ, მუშენდა თის ფენინა გიაძიცენდ ირო. მართალ რე, ხანა უჸორდ მუშ ქომონჯის, მარა თინა მანგარო გენიცადენდ სქუა ვაჸუნდუნ თის. ართშა, მუჟამსით ხანა კარავს ლოცულენდუნ, მღვდელმთავარ ელიქ იფიქრუ, ნამდა თინა შუმილ რდუ დო შენიშვნა ქიმეჩ. წერმიდგინით, მუჭო იგინანდ დუც ხანა! ირფელიშ უმკუჯინუო, ხანაქ მოკრძალება გეგმირჩქინ დო ელის პატიცემათ ქუდურაგადუ. ხანაშ გურიშემაკინალ ლოცვა ბიბლიას რე ინოჭარილ. თე ლოცვას ხანა გიმოხანტუს ღორონთიშ რწმენას, სიმარდულს დო განადიდენს თის (1 სამ. 1:5—7, 12—16; 2:1—10).

¹⁰ მოკრძალება მოხვარუნა უბადობას ჯგირიშ კეთებათ გივორჯგინათ (რომ. 12:21). სატანაშ ქიანას უსამართლობას ხშირას შეფხვადუთ, მარა ირნერო ვეცადათ ოკო, ნამდა შხვეფიშ გლახა საქციელიშ გურშენ ჩქინ დუდიშ კონტროლი ვა ვოდინუათ (ფსალმ. 37:1). უმოს გურსაჭუო რე, მუჟამსით პრობლემეფი თანაქრისტიანეფ შკას რჩქინდუ. თეცალ დროს მოკრძალებულ კოჩი იესოცალო მიქციებუ. „მუჟამსით თის ლანძღუნდესინ, იშო დღას ვალანძღუნდ , . . . თის ჩაბარ დუდი, მიდგა სიმართლეთ ასამართლენდ“  (1 პეტ. 2:23). იესოს უჩქუდ, ნამდა შურიშძიება იეჰოვაშ რდუ (რომ. 12:19). ბიბლია ქრისტიანეფს ურაგად, ნამდა მიაჸუნან იესოშ თანდაბლობაშ მაგალითის დო მანგიორ მითინს ვეგნუგან (1 პეტ. 3:8, 9).

11, 12. ა) მუჭო მოხვარუნა მოკრძალება, მუჟამსით ზედმეტო მოცქვანა ვარდა კომპლიმენტეფს მირაგადუნა? ბ) მუჭო ოკო მოქმედენდას მოკრძალება ჩქინ მეჯინა, მუკოქუნა დო საქციელწკუმა?

¹¹ ჩქინ მოკრძალებაქ შილებე თიმწკუმა ხოლო გეგმიცადას, მუჟამსით ზედმეტო მოცქვანა ვარდა კომპლიმენტეფს მირაგადუნა. დეფიფქრათ მუჯგირო მიქცუ ესთერქ, მუჟამსით თიშ მდგომარეობაქ დითირ. თე მშვენიერ ცირასქუას ართ წანაშ დინახალე შხვადოშხვა ოსქვამებელ პროცედურეფს უკეთენდეს. თის ურთიერთობა უღუდ ახალგაზრდა ცირასქუალეფწკუმა, ნამუთ სპარსეთიშ იმპერიაშ შხვადოშხვა კუნთხუშე რდეს დო ოცადუდეს მეფეშ გურიშ მოგებას. მარა ესთერი ირიათო მოკრძალებულ დო დუდშეკებულ რდუ. ესთერ ვართ თიშ უკულ გაამაყებე, მუჟამსით მეფექ თინა დედოფალო გეირჩუ (ესთ. 2:9, 12, 15, 17).

¹² მოკრძალება მოხვარუნა ჩქინ მეჯინა, მუკოქუნა დო საქციელი ირიათო ღირსეულ რდას დო პატიცემა იძირედას. ჩქი მარჩქილენა, ნამდა შხვეფიშ გურს „სიმშვიდეთ დო რბილ ხასიათით“ მიბგენთ დო ვართ ხოლო ცქვაფათ ვარდა დუდშა ზედმეტ ყურადღებაშ მექციებათ (წეკითხით 1 პეტრეშ 3:3, 4; იერ. 9:23, 24). დუდიშ დიდ წარმოდგენა ქომღუნან-და, საბოლათ თენა ჩქინ საქციელს ხოლო გეგმორჩქინდუ. მაგალთო, შილებე მობწონდან თიშე რაგად, ნამდა მუდგარენ პრივილეგიეფი მიღუნა, კონფიდენციალურ ინფორმაცია მიჩქუნა ვარდა პასუხიშმგებელ ჯიმალეფწკუმა ხოლოს ვორეთ. შილებე თეშ გეგმიფრჩქინათ დუდი, ნამდა მუდგარენ იდეაშ ავტორეფი ვორეთ დო წარმატებას ჩქინით მივოჭირინეთ, თიშ უმკუჯინუო ნამდა შხვეფქ მიმეხვარეს. თე დროს ვაგმოჭყორდან ოკო იესოშ ძვირფას მაგალითიქ. ბრელ მუთუნ, მუდგას თინა იჩიებუდუნ, ებრაულ წერილეფშე რდუ, ვარდა პირდაპირ ციტატა მოჸუნდ. მოკრძალებულ რაგადით თინა ხალხის მიოხვამილუანდ, ნამდა ირფელ, მუდგას იჩიებუდუნ, იეჰოვაშ ჭყოლოფა რდუ დო ვართ ხოლო მუშ სიჭკვერაშ ვარდა სიბრძნეშ დამსახურება (იოან. 8:28).

13, 14. მუჭო მიმეხვარებუნა მოკრძალება მიბღათ სწორ გადაწყვეტილებეფი?

¹³ ჩქინ მოკრძალებაქ საკითხეფიშ გინოჭყვიდირუაშ დროს ხოლო შილებე გეგმიცადას. მუჟამსით მოციქულ პავლე კესარეას რდუნ, წინასწარმეტყველ აგაბექ უწუ თის, ნამდა იერუსალიმშა მიდეშ-და, ოჭოფუნდეს დო შილებე დოჸვილესკონ ხოლო. ჯიმალეფს მანგარო აშკურნეს დო ეხვეწეს პავლეს, ვაულინუდკო, მარა ვეშიალებუეს თიშ გაჩერებაქ. პავლე ზედმეტო ვართ მუშ დუდშა რდუ მენდებულ დო ვართ შკურნაფილ რდუ. თინა ღორონთშა რდუ მენდებულ დო მზათ რდუ, სოდგა ვაჸუკო ოულარქინ, ბოლოშა შეუსრულებუდკო მუშ დავალება. თენა ქიგეგესინ თიშ უკულ, ჯიმალეფქ მოკრძალება გეგმირჩქინეს დო ვეშეწინააღმდეგეს პავლეს, მიდურთუმუდკო იერუსალიმშა (საქ. 21:10—14).

¹⁴ მოკრძალება თიმწკუმა ხოლო მოხვარუნა მიბღათ სწორ გადაწყვეტილება, მუჟამსით ბოლოშა ვამჩქუნა, მუჭო იჸუაფ საქმე ვარდა ვეშემლებუნა სიტუაციაშ გაკონტროლება. მაგალთო, სრულ დროთ ქომლამუნა მსახურება-და, მი მუკმოჯინენა დებლახებუთინ? მუჭო ოკო მიფქცუათ, მშობლეფს ჩქინ მოხვარაქ ქიდესაჭირეს-და? ვარდა მუჭო მიკიბჯინათ ჩქინ დუდშა, დიბრჩინუთინ? თეცალ საკითხეფშენ მუდგა ვებლოცათ დო ვეგმიბრკუათინ, ბოლოშა იშენით ვემიბღენთ პასუხეფს (ეკლ. 8:16, 17). იეჰოვაშა მენდება მოხვარუნა, ვაღიარათ ჩქინ შეზღუდულ შესაძლებლობეფი დო ქიმვარჩქვანათ თის. გიმორკვიებაშ, რჩევაშ მეღებაშ დო ლოცვაშ უკულ მივაჸუნათ ოკო ღორონთიშ შურიშ ხემძღვანელობას  (წეკითხით ეკლესიასტეშ 11:4—6). თეშ ჭყოლოფუათ, იეჰოვა ვარდა მაკურთხენა ვარდა ქიმმეხვარებუნა, დობთირუათ ჩქინ მიზნეფი (იგავ. 16:3, 9).

15. მუჭო მოხვარუნა იეჰოვაშენ ფიქრი, ვორდათ თანდაბლეფი?

¹⁵ ჩქი ქობძირით, ნამდა მოკრძალება მნიშვნელოვან თვისება რე, მარა მუჭო შემლებუნა უმოსო განვავითარათ თინა? მორთ გუვარჩუათ ოთხი საშვალება. პირველ, იეჰოვაშ მეტ მოკრძალება დო მოწიწება მაღვენუნა, მუჟამსით თიშ აღმატებულ თვისებეფშე დო მდგომარეობაშე დეფიფქრებუთინ (ეს. 8:13). დღას ვაგმოჭყორდან ოკო, ნამდა ჩქი ირფელიშ შემალებე ღორონთწკუმა ართო გილურთ დო ვართ ხოლო ანგელოზეფწკუმა ვარდა კათაწკუმა. თეშ გააზრება მიმეხვარებუნა, დუც გიმუკინათ „ღორონთიშ ძალიერ ხეშ წოხოლე“ (1 პეტ. 5:6).

16. მუჭო მოხვარუნა ღორონთიშ ჸოროფაშენ ფიქრი, ვორდათ მოკრძალებულეფი?

¹⁶ მაჟია, იეჰოვა ღორონთიშ ჸოროფაშენ ფიქრი მიმეხვარებუნა, განვავითარათ მოკრძალება. პავლექ ჭარ, ნამდა იეჰოვაქ „უმოს მეტ პატი“ მეჩუ კოჩიშ სხეულიშ თი ნაწილს, ნამუსით მუდგარენ ორკუდ (1 კორ. 12:23, 24). თეგვარო, იეჰოვა ზრუნენს არძაშე, თიშ უმკუჯინუო, ნამდა შეზღუდულ შესაძლებლობეფი ვარდა მუდგარენ კილ მიღუნა. ღორონთი ვადარენს მუშ მსახურეფს ართიანს დო შეცდომეფიშ გურშენ ვარიას ვეჩიებ ჩქინ გურშენ. სოდგა ვემსახურათინ, ვამოშკურა, მუშენდა დარწმუნებულ ვორეთ, ნამდა უჸორთ თის.

17. მუჭო იმოქმედებ ჩქინწკუმა თინა, ნამდა ვოცადუთ შხვეფიშ ჯგირ მხარეეფიშ ძირაფას?

¹⁷ მასმა, უმოსო დავაფასენთ ჩქინ ადგილს იეჰოვაშ ორგანიზაციას, მუჟამსით ქივეცადებუთ, ქობძირათ შხვეფიშ ჯგირ მხარეეფი. თიშ მანგიორო, ნამდა ირო ყურადღებაშ ცენტრის ვორდათ ვარდა ძალაუფლება ხეშა ქეშიპჸოთათ თიშენ საქმეშა ირიათო გემშაფრთათინ, უჯგუშ რე მოკრძალებულო ქელვაკითხუათ შხვეფს დო გეფთვალისწინათ თინეფიშ აზრი (იგავ. 13:10). თინეფწკუმა ართო გებხარებუთ, მუჟამსით თინეფი მეტ პასუხიშმგებლობეფს ქიმიღენა. ჩქი იეჰოვას განვადიდენთ, მუჟამსით ქობძირუნთ, მუჭო აკურთხენს თინა მთელ საჯიმალოს (1 პეტ. 5:9).

18. მუჭო მოხვარუნა სინდისიშ გავარჯიშება ღორონთიშ მოსაწონ თვისებეფიშ განვითარებას?

¹⁸ მანთხა, მუჟამსით ბიბლიურ პრინციპეფით ვოცადუთ ჩქინ სინდისიშ გიმოსწორებას, თენა მოხვარუნა უმოს მოკრძალებულეფ ვორდათ. გარჩიებაშ უჯგუშ უნარი მაღვენუნა, მუჟამსით ქივეცადებუთ, ირფელს იეჰოვაშ თოლით უჯინათ. რეგულარულ გურაფათ, ლოცვათ დო ნაგურეფუშ ცხოვრებას გიმორინაფათ უმოსო გუვავარჯიშენთ ჩქინ სინდისის (1 ტიმ. 1:5). თეშ გარდა, ქიდიბგურუანთ, ნამდა ჩქინ დუდიშ წოხოლე შხვეფ გივორინუათ. ჩქინ ოკეთებელს ჩქი გუვაკეთენთ-და, იეჰოვა მოპირუნა, ნამდა „დასრულენს ჩქინ მომზადებას“ დო ქიმმეხვარებუნა მოკრძალებაშ დო ღორონთიშ მოსაწონ შხვა თვისებეფიშ განვითარებას (1 პეტ. 5:10).

19. მუ მიმეხვარებუნა, ირიათო მოკრძალებულეფ ვორდათ?

¹⁹ სტატიას მოშინაფილ წინასწარმეტყველქ კადნიერ საქციელიშ გურშენ მიოდინუ სიცოცხლე დო ღორონთწკუმა ჯგირ სახელი. თეშ უმკუჯინუო, მოკრძალებაშ გიმორჩქინა რთულ სიტუაციეფს ხოლო რე შეიოლებერ. თეს ოძირანს ჯვეშ დროს ცხოვრენდესინ თი ართგურ კათაშ დო ჩქინ დროს ცხოვრენან ფერ ღორონთიშ მოკრძალებულ მსახურეფიშ მაგალითეფი. იეჰოვაწკუმა დიდ ხანს გილულა მოხვარუნა უმოს მოკრძალებულეფ ვორდათ (იგავ. 8:13). იეჰოვაწკუმა ართო გილულა დიდ პატი რე ჩქინო, თიშ უმკუჯინუო მუ დავალებეფ დო პასუხიშმგებლობეფ მიღუნა. დუვაფასათ თენა დო ირფელ გავაკეთათ, ნამდა მოკრძალებულო გილაფრთათ იეჰოვაწკუმა ართო მარადიულო!