ბაღანობაშე მიჸორდჷ ბუნება. ჩქინ ქალაქიშ, იუვიასკიულიაწკუმა (ცენტრალურ ფინეთ) ხოლოს სქვამ ტყა დო ტბეფ რდუ, სოდეთ ჩქინ ოჯახ ხშირას გილეშ. მა ცხოველეფ ხოლო მანგარო მიჸორს. ბაღანობას, სოდეთ ჯოღორ დო კატუს ბძირუნდჷ მოკოდ, ქუმუფერეკო. გამწიბრდინ მანგარო იბრისხებუდ, მუჟამსით ვორწყედ, მუნერ გლახათ ოქცუდ ხალხ ცხოველეფს. მუსხირენ დროშ უკულ ართ ორგანიზაციას ქუვაკათ, ნამუთ იცვენდჷ ცხოველეფს. თე ორგანიზაციაშ წევრეფს ჩქიმცალო უჸორდეს ცხოველეფ.

ჩქი ბრელ მუდგარენს ვორთუდით ცხოველეფიშ უფლებეფიშ დაცვებელო. ვავრცელენდით ინფორმაციას დო ვონწყუნდით აქციეფს თინეფიშ წინააღმდეგ, მიდგას ცხოველიშ ბეწვიშ მაღაზიეფ დო ცხოველეფიშ საცდელ ლაბორატორია უღუდ. თეს გეძინელ, ცხოველეფიშ დაცვებელო ახალ ორგანიზაცია დუვაარსით. ჩქინ თეცალ ქმედებეფიშ გურშენ ხშირას ხელისუფლებაშ წარმომადგენელეფშე წინააღმდეგობეფ მიღდეს. მა მუსხირენშა ბჭოფეს დო სასამართლოს ხოლო გინოფჩეს.

ცხოველეფიშ უფლებეფიშ გარდა თი შხვა პრობლემეფ ხოლო მაწუხენდჷ, ნამუთ მსოფლიოს ხვადუდ. საბოლათ ქუვაკათ შხვადოშხვა ორგანიზაციას, თინეფ შქას საერთაშორისო ამნისტიას (ადამიანეფიშ უფლებეფიშ დამცველ საერთაშორისო ორგანიზაცია) დო გრინპისის (საერათშორისო საზოგადოებრივ ბუნებაშ დამცველ ორგანიზაცია). მუთ შემლებუდუნ ირნერო ვუკინენდჷ თინეფს ხუჯის. თი ხალხიშ უფლებეფიშ დაცვებელო ვბრძოლენდჷ, მით ღარიბ, შქირენულ დო გაჭირებულ რდუ.

დროშ მიკულაწკუმა ართო ქიმეფხვად, ნამდა მსოფლიო მა ვა მათირედ. მართალ რე, თე ორგანიზაციეფქ მაგვარეს ჭიჭე პრობლემეფ, მარა დიდ პრობლემეფ უმოსო იძინანდჷ. თეშ იძირედ, ითამ მთელ ქიანას უბადო მართუნდჷ დო მითინს ვაინტერესუდ თე მდგომარეობაშ თირუა. ძალეფქ ქეშმელუ.

დუდის გლახათ ბგინაფლენდჷ, მუშენდა მუთუნიშ თირუა ვეშემლებუდ, ზუსტას თე დროს დიბჭყჷ ღორონთშე დო ბიბლიაშე ფიქრ. ართ დროს იეჰოვაშ  მოწმეეფწკუმა ბგურაფლენდჷ ბიბლიას. მანგარო ვაფასენდჷ თინეფს, მუშენდა ჩქიმ მიმართ სიჯგირას დო პირად ინტერესის გიმირჩქინანდეს. მარა სიმართლე ქოფთქუენ, ვა ვორდჷ მზათ, დოფთირეკო ცხოვრება. მარა თე დროს ირფელქ შხვანერო ქუმოხვად.

ბიბლია გებჭოფ დო თიშ კითხირ ქიდიბჭყჷ. თექ ნაკითხერქ ჩქიმ გურს მანგარო მუჰამუ. ბიბლიას ბრელ თიცალ ადგილ ქობძირ, სოდეთ რაგადებულ რდუ, ნამდა ცხოველეფს ჯგირო ოკო მივექცითკო. მაგალთო, იგავეფიშ 12:10-ს ჭარჷ: „მართალ კოჩ მუშ საქონელშე ზრუნენს“. თეს გეძინელ, ქობძირ, ნამდა ღორონთ ვა რე თი პრობლემეფიშ მიზეზ, ნამუთ ამდღა მსოფლიოს რე. თეშ გინაწონს, ჩქინ ოწუხებელ უმოსო იძინანსინ თიშ ბრალ რე, ნამდა ხალხიშ უმენტაშ ვემეჸუნს ღორონთიშ მითითებეფს. ჩქიმ გურს მანგარო შეხუ, მუჟამსით ქიგებგჷ, მუნერ მოჸოროფე დო მოჭყოლოფე ღორონთ რე იეჰოვა (ფსალმუნი 103:8—14).

თი დროს შევავს მოთხოვნა, ქუმომღესკო წიგნ, „მუს მოგურუანა ბიბლია სინამდვილეს?“. თეშ უკულ ხეთეშე ართ იეჰოვაშ მოწმე წყვილქ ჸუდეშა ქუმმაკითხუ. თინეფქ ბიბლიაშ გურაფა შემოფთავაზეს დო მა ხოლო დევეთანხმჷ. თეს გეძინელ, იეჰოვაშ მოწმეეფიშ დარბაზის კრებაშ შეხვალამეფშა დასწრება ქიდიბჭყჷ. შედეგო, ბიბლიურ ჭეშმარიტებაქ ჩქიმ გურს მანგარო შეხუ.

ბიბლიაშ ჭყოლოფათ შემალებუ ბრელ მუდგარენ უჯგუშობაშა დოფთირეკო. დუდ დუვანებ პაპიროსიშ დო ოშუმალიშ შუმას, უმოს მოწესრიგებულო მიკოქუნა ქიდიბჭყჷ დო გლახა სიტყვეფიშ რაგად მივოტე. თეწკუმა ართო, დოფთირე დამოკიდებულება ხელისუფლებაშ წარმომადგენელეფიშ მიმართ (რომაელები 13:1). თეს გეძინელ, მივოტე უზნეო ცხოვრებაშ წეს, ნამუთ ჩქიმო ჩვეულებრივ მუდგარენ რდუ.

არძაშ უმოსო გამჭირდჷ, გუვავითარკო სწორ დამოკიდებულება თი ორგანიზაციეფიშ მიმართ, მით ცხოველეფიშ დო ადამიანეფიშ უფლებეფს იცვენდჷ. თე ირფელ ართ დღაშა ვა მოხვალამე. დუდშე ბგინაფლენდჷ, ნამდა თე ორგანიზაციეფიშ დოტება თინეფიშ ღალატ რდუ. მარა ქიმეფხვად, ნამდა რეალურო ხვალე ღორონთიშ სამეფოს შეულებუდ მსოფლიო უჯგუშობაშა დოთირუკო. გეგნობჭყვიდ, ირნერო ხუჯ ქუდუკინკო ღორონთიშ სამეფოს დო შხვეფს ხოლო ქუგვოგებაფეკო თიშ გურშენ (მათე 6:33).

მუჟამსით აქტივისტ ვორდჷ, ჩქიმო ჟირ კატეგორიაშ ხალხ არსებენდჷ: ჯგირ დო გლახა. მზათ ვორდჷ თინეფიშ წინააღმდეგ მიდაფრთკო, მით გლახათ მიმორჩქუდ. მარა ამდღა ბიბლიაშ ჭყოლოფათ ვა ბჯოგჷ ადამიანეფ. თეშ გინაწონს, ირნერო ვოცადუქ, გუვავითარე ქრისტიანულ ჸოროფა არძაშ მიმართ (მათე 5:44). შხვა საშვალებეფწკუმა ართო, თეცალ ჸოროფას თით გიმიფრჩქინანქ, ნამდა ხალხის ღორონთიშ სამეფოშ გურშენ სახიოლო ამბეს გინოფჩანქ. მანგარო მოხიოლ თიშ ძირაფა, ნამდა თე საჯგირობუო საქმე, ხეს უნწყუნს მშვიდობას დო ბედნერობას დო ხალხის არზენს მომავალიშ რეალურ იმენდის.

ასე შინაგან სიმშვიდე მიღჷ, მუშენდა ჩქიმ არძა ოწუხებელ იეჰოვას ქიმვანდჷ. დარწმუნებულ ვორექ, ნამდა თინა, მუჭოთ გუმაჭყაფალ, ბოლოს მუღენს ადამიანეფიშ დო ცხოველეფიშ ტანჯებას დო ვა დუშვენს, ნამდა ჩქინ სქვამ დედამიწაქ გენადგურას. თეშ გინაწონს, თინა მუშ სამეფოშ საშვალებათ დედამიწას კინ სამოთხეთ გინაშქვანს (ესაია 11:1—9). ჩქიმო ხიოლ ხვალე თის ვა მოუღ, ნამდა მიჩქჷ თე ირფელ, თინა ხოლო მოხიოლ, ნამდა შემლებ შხვეფს მივეხვარე თე ირფელიშ გაგებას. ამდღა უკვე ვა ფიფქრენქჷ, ნამდა მსოფლიო მა ოკო ფთირუე.