Karaha ty volan̈iny tsaiky lelahy araiky, Will an̈arany: “Mety hampakamo mamaky Baiboly io, izikoa tsy hainao fomba tsara hamakian̈a izio.”

 Tianao ho hay ma karakory atao baka anao ho tia mamaky Baiboly? Lahatsoratra ty han̈ampy anao.

•  Ataova velon̈o tantara io

•  Diniha tsarabe!

•  Hevitriny tanora karaha anao

 Ataova karaha efa an̈aty tantara io ao anao. Karaha ty mety hataonao:

1.   Fidiana tantara araiky an̈aty Baiboly ao tianao hianaran̈a. Anao afaka mifidy tantara araiky na toko araiky amindro Filazantsara aby io. Na koa anao afaka mifidy tantara araiky amindro tantara tandrin̈esan̈a, amy jw.org ao.

2.   Vakia tantara io. Izio afaka vakinao zaraiky, na koa miaraka amy naman̈a na lafamỳ. Tsara izikoa atao mare vakiteny. Mety koa izikoa olo araiky atao pampiditry tantara, fa sasany ndraiky man̈ano anjaranolo hafa.

3.   Mba an̈ohara hely baka araikiaraiky amindro ty:

   •   Ataova sary tantara io. Na koa isaka raha nandalo, afaka asianao sarisarinany, baka io in̈y amy zay manjary tantara mifampitohitohy. Afaka asianao fan̈azavan̈a koa ambaniny sary io iô.

   •   Ampifandraisa raha mombamomba olo io. Ohatra, anao izikoa mamaky tantaranolo araiky tsy nivadiky, sorata iô toetrinany ndreky raha nataony, avio ampifandraisa amy fitahian̈a nazony.

   •   Tantara io hamoron̈a tantara vaovao. Mitadiava toejavatra mety hitovy amy tantara io, baka io asiava “fan̈adikadin̈ana.” Anao man̈adikadin̈y olo io ndreky iro vavolombelon̈o nahita izio.

   •   Izikoa olo amy tantara io tao nan̈ano fanapahankevitry ratsy, iritrireta mety ho nan̈ano akory niafarany izikoa tsy zen̈y raha nataony. Ohatra, tamy Petera nivolan̈a tsy nahay Jesosy in̈y. (Marka 14:66-​72) Ino raha tokony nataony baka izy tsy ho nan̈ano zen̈y?

   •   Izikoa anao olo tia mamoron̈o raha, an̈ohara ty: Mamoron̈a tantara araiky baka amy tantara an̈aty Baiboly ao. Baka io sorata ino raha mety hianaran̈a baka amizio.​—Romanina 15:4.

 Mety hahita hevitry vaovao an̈aty tantara io ao anao izikoa dinihinao tsarabe izio. Sady matetiky, volan̈a araiky na aroe an̈aty tantara io ao fo mety hisy dikany maventy.

 Ohatra, Matio 28:7 ampitovisa amy Marka 16:7.

•    Nan̈ino ma Marka ndraiky nivolan̈a fa tsy ela Jesosy hiboaka amy pianatranany “ndreky amy Petera”?

•  Tsara ho hay: Marka tsy nahita maso raha nandalo aby io. Mety Petera nitantara izio taminany.

•  Hevitry nisitriky: Mety ho karakory tsapany Petera izikoa izy fa naharen̈y fa Jesosy tihahita izy? (Marka 14:66-​72) Akory nan̈aboahany Jesosy tamy Petera fa izy ten̈a naman̈a? Akory mety hangalanao tahaka Jesosy? Akory han̈aboahanao fa anao ten̈a naman̈a?

 Izikoa ataonao velombelon̈o tantara io, baka io dinihinao tsara raha tianizio koran̈iny, anao hahazo hafizany mare amy vaky Baiboly ataonao.