Chikalata Chakwawula kwa Afilipi 1:1-30
1 Une Paulo ndili pampepe ni Timoteyo mpela achikapolo ŵa Klistu Yesu. Ngumlembela jemanja ŵaswela* wosope ŵamli ŵakamulana ni Klistu Yesu ku Filipi pampepe ni ŵakulolela soni ŵakutumichila ŵakamuchisya.
2 Umbone mtima wekulungwa soni mtendele wakutyochela kwa Mlungu Atati ŵetu soni Ambuje Yesu Klistu uŵe ni jemanja.
3 Ngusamyamichila Mlungu jwangu ndaŵi syosope pangumkumbuchila jemanja.
4 Ngusatenda yeleyi m’mapopelo gangu gakuchondelela gangusampopelela jemanja mwakusangalala.
5 Ngusampopelela ligongo mŵele mli mkukamuchisya pa masengo* gakulalichila ngani syambone kutandila pa lisiku lyandanda mpaka lelojino.
6 Ndili jwakusimichisya mtima kuti Mlungu, jwele juŵagatandikasisye masengo gambonega mwa jemanja, chachigamalisyasoni mpaka pa lisiku lya Klistu Yesu.
7 Pakuŵa yili yakuŵajilwa kuti une nganichisyeje yeleyi pakwamba jemanja wosope ligongo ngusinamganichisya mnope jemanja. Mlungu ŵamlosisye jemanja umbone mtima wakwe wekulungwa pampepe ni une. Yeleyi yili myoyo ligongo mkungamuchisya pandaŵi jandili m’nyumba ja ukayidi soni pa masengo gakuchenjela ngani syambone mwamalamusi, kuti silalichidweje pali pangali chakulekasya.
8 Une ngusachilila kumwona jemanja wosope ligongo ngusinamnonyela mnope mpelaga yakusati Klistu Yesu pakumnonyela jemanja, soni Mlungu ali mboni jangu pa yanguŵechetayi.
9 Ni ligongo lyakwe nganguleka kumpopelela jemanja kuti chinonyelo chenu chipitilisye kula pampepe ni kumanyilila kwenu yisyesyene soni kupikanichisya chenene yakusaka ya Mlungu.
10 Ngusatenda yeleyi kuti mmanyilileje yayili yakusosekwa mnope, ni chakulinga chakuti mŵe ŵangali chakulemwecheka chilichose soni kuti mkakuŵasyaga ŵane mpaka pa lisiku lya Klistu.
11 Chinesoni changusampopelela ni chakuti umi wenu wosope soni ndamo syenu siŵe syambone. Yeleyi yichikomboleka ni chikamuchisyo cha Yesu Klistu ni chakulinga chakuti Mlungu achimbichikwe soni kuti wosope amwoneje Mlungujo kuŵa jwapenani.
12 Sambano achalongo achimjangu, ngusaka mmanyilile kuti yindu yayindendechele une yitendekasisye kuti ngani syambone sipikaniche kwa ŵandu ŵajinji.
13 Ngani jakuti andaŵile ligongo lya Klistu jimanyiche pasikati pa Asilikali Ŵakulondela Mwenye soni kwa ŵandu ŵane wosope.
14 Apano achalongo achimjetu ŵajinji mwa Ambuje akulimba mtima ligongo lyakuti andaŵile, mwamti akulosya kulimba mtimaku pakulalichila maloŵe ga Mlungu mwangali woga.
15 Yili yisyene kuti ŵane akulalichila yakwamba Klistu ligongo lyakundendela jelasi* soni pakusaka kulimbana ni une, nambope ŵane akulalichila ni mtima wambone.
16 Ŵaneŵa akulalichila yakwamba Klistu ligongo lya chinonyelo, pakuŵa akumanyilila kuti une ŵasagwile kuti nasichenjele ngani syambone.
17 Nambo ŵanewo akulalichila ni mtima wakusaka yakangana ngaŵaga ni mtima wambone. Jemanjaji akusaka konjechesya yakupweteka yangu m’nyumba ja ukayidi muno.
18 Ana yakuyichisya yakwe yikuŵaga yamtuli? Yakuyichisya yakwe yili yakuti ŵandu akulalichilape ngani syambone syakwamba Klistu, chinga ŵane akusilalichila mwachinyengo kapena ni nganisyo syambone. Yeleyi une yikusangalasya kwabasi, mwamti chimbitilisyepe kuŵa jwakusangalala.
19 Ngumanyilila kuti changopole ligongo lya mapopelo genu gakuchondelela soni ni chikamuchisyo cha msimu wa Yesu Klistu.
20 Pakuŵa yeleyi ni yanguyijembecheya mwakusachilila soni ngukulupilila kuti ngasindenda sooni m’litala lililyose. Nambope ligongo lyakuti nguŵechetaga mwakulimba mtima, Klistu chaŵepe ali mkuchimbichika kupitila mu chilu changu, chinga nguwa kapena ngutamape ni umi.
21 Kwa une, naga ngutamape ni umi, chindameje ligongo lya Klistu, nambo naga nguwa chiyiŵe yakamuchisya kwa une.
22 Naga ngupitilisya kutamape ni umi mu chiluchi, chiyiŵe yakamuchisya ku masengo gangu. Nambo yampaka sagule pelepa, ngangusaka kwasalila.
23 Une yikusawusya kusagula chimo pa yindu yiŵiliyi, nambo changusachilila ni kuŵa jwagopoka ni kuja kutama ni Klistu, soni chelechi nguchiwona kuŵa chindu chambone mnope.
24 Nambope, kuli kwambone kutamape mu chilu achino ligongo lya jemanja.
25 Myoyo, ngukulupilila kuti yeleyi chiyikomboleche mwamti chindamepe ni umi, soni chimbitilisye kuŵa ni jemanja wosope kuti yindu yimjendeleje chenene nambosoni kuti mŵe ŵakusangalala ni chikulupi chenu.
26 Chiyiŵe myoyo ni chakulinga chakuti pachinjiŵasoni ni jemanja kweleko chimŵe ŵakusangalala ligongo mli ŵakumkuya Klistu Yesu.
27 Nambo chakusosekwa mnope ni chakuti ndamo syenu siŵeje syakamulana ni ngani syambone syakwamba Klistu. Mtendeje yeleyi kuti mbikaneje yambone yakwamba jemanja chinga pandili kweleko kapena iyayi, nambosoni kuti mbikaneje kuti mkwete nganisyo syakulandana soni kuti mli ŵakamulana pamkulingalinga kukulupilila ngani syambone.
28 Nambosoni mkatendaga woga ni ŵandu ŵakumsisya. Yindu yeleyi yili umboni wakuti jemanjajo chachijonanjidwa, nambo kwa jemanja yili umboni wakuti chimchikulupuka, mwamti umboni welewu uli wakutyochela kwa Mlungu.
29 Pakuŵa jemanja mkwete upile, ngaŵaga wakumkulupilila Klistupe, nambo wakusimanasoni ni yakupweteka ligongo lya jwalakwejo.
30 Ni ligongo lyakwe jemanja mkusimana ni yakusawusya yakulandana ni yamwayiweni ndili mkusimana nayo, yelesoni apano mkupikana kuti ngupitilisya kusimana nayo.
Maloŵe Gamwiŵanda
^ Alole Kugopolela kwa Maloŵe Gane.
^ Kapena kuti, “pakwawusya pasogolo masengo.”
^ Ŵane akusati “dumbo.”
