Mlungu jusyesyene ni jwali Mkupanganya jwa yindu yosope. Jwalakwe jwangali ndandililo, soni ngasakola mbesi. (Salimo 90:2) Kwa Jwalakwe ni kwasikutyochela ngani syambone syasikusimanikwa m’Baibulo. (1 Timoteo 1:11) Pakuŵa Mlungu ni juŵatupele umi, tukusosekwa kumlambilaga jwalakwe jika basi.​—Aŵalanje Chiwunukuko 4:11.

Pangali mundu juŵam’weni Mlungu, ligongo jwalakwe ali msimu. Yeleyi yikugopolela kuti jwalakwe ali jwa umi wapenani mnope kupundana ni yakupanganyikwa ya pachilambo chapasi. (Yohane 1:18; 4:24) Atamose kuti yili myoyo, m’weji mpaka tukombole kumanyilila ndamo syakwe kupitila mu yindu yaŵayipanganyisye. Mwachisyasyo, yisogosi ni maluŵa yikusatulosya kuti Mlungu ali jwachinonyelo soni jwalunda. Ukulu wa chilambo ukusatusalila ya machili gakwe.​—Aŵalanje Aloma 1:20.

Mpaka tulijiganye yejinji yakwamba ndamo sya Mlungu patukuŵalanga Baibulo. Mwachisyaso, Baibulo jikusatusalila yakusanonyela Mlungu soni yangakusayinonyela, mwakusatendela yindu ni ŵandu, soni mwakusatendela yindu mu yakutendekwa yakulekanganalekangana.​—Aŵalanje Salimo 103:7-10.

Yesu ŵatite, “Atati ŵetu ŵakwinani, lina lyawo lichimbichikwe.” (Mateyu 6:9) Atamose kuti Mlungu akwete mena gane ga uchimbichimbi, jwalakwe akwete lina lyakwe lisyesyene. Mu yiŵecheto yejinji akusalikolanga mwakulekanganalekangana. Mu Chiyawo ndaŵi syejinji likusakolanjidwa kuti “Yehofa.” Nambo ŵane akusalikolanga linali kuti “Yahweh.”​—Aŵalanje Salimo 83:18.

Lina lyakuti Yehofa alityosisye m’Mabaibulo gejinji ni aŵisilemo mena gauchimbichimbi mpela gakuti Ambuje kapena  Mlungu. Nambo pijamasile Baibulo kulembedwa, jakwete lina lyakuti Yehofa ndaŵi 7,000. Yesu ŵalimanyisye linali kwa ŵandu paŵajiganyaga ya Mlungu.​—Aŵalanje Yohane 17:26.

Alolele fidiyo jakuti Ana Mlungu Akwete Lina?

Ana yipwetesi yejinji yatukusimana nayo yikulosya kuti Yehofa ali Mlungu jwangasamala ya m’weji? Ŵandu ŵane akusasalaga kuti jwalakwe akusatendekasya kuti tulajeje pakusaka kutulinga, nambo yeleyi ngaŵa yisyene.​—Aŵalanje Yakobo 1:13.

Mlungu ŵampele mundu ufulu wakusagula yakutenda. Ana ngatukusayamichila upile wetu wakusagula kumtumichila Mlungu? (Yoswa 24:15) Nambo ŵajinji akusiŵatendela achimjawo yakusakala, ni ligongo lyakwe pana yipwetesi. Yehofa yikusampweteka kuyiwona yindu yangali chilungamo.​—Aŵalanje Genesesi 6:5, 6.

Yehofa ali Mlungu jwakusasamala ya m’weji. Jwalakwe akusaka kuti tusangalaleje ni umi. Pachangakaŵapa chachityosya yipwetesi, soni ŵandu ŵakusayitendekasya. Nambo pandaŵi ajino, jwalakwe akwete ligongo lyakupikanika lyakundila yipwetesi pandaŵi jamnonoji. Mu Lijiganyo 8, tuchilimanyilila ligongo lyakwe.​—Aŵalanje 2 Petulo 2:9; 3:7, 13.

Yehofa akutuŵenda kuti tumŵandichile jwalakwe mwakuŵecheta najo mwipopelo. Jwalakwe akwete lung’wanu ni mundu jwalijose pajika. (Salimo 65:2; 145:18) Ali jwakusachilila kutukululuchila yakulemwa yetu. Akusakuwona kulingalinga kwetu kuti tumsangalasye, atamose kuti ndaŵi sine tukusalepelaga. Atamose kuti nganutukola umlama, komboleka kuŵa paunasi wambone ni Mlungu.​—Aŵalanje Salimo 103:12-14; Yakobo 4:8.

Pakuŵa Yehofa ni juŵatupele umi, tukusosekwa kumnonyelaga mnope kupundana ni mundu jwine jwalijose. (Maliko 12:30) Mpaka tupitilisye kuŵa paunasi ni Mlungu naga tukumnonyela. Mpaka tutende yeleyi patukulijiganya ya jwalakwe soni kutenda yakusasaka.​—Aŵalanje 1 Timoteo 2:4; 1 Yohane 5:3.