AKLISTU ŵa m’yaka 100 yandanda, ŵatesile yiliyose yakomboleka kuti alalicile “ngani syambone syakwamba ya Ucimwene” kwa ŵandu ŵajinji. (Mat. 24:14) Ŵane ŵajile kulalicila m’yilambo yine. Mwambone, ndumetume Paulo ŵajawile m’cilambo cele masiku agano cikukolanjidwa kuti Turkey kukulalicila mwamtawu pa maulendo gakwe ga umishonale. * Mu 2014, abale ŵalinganyisye yakuja kulalicila kumaloko mwapajika. Pandaŵiji yaliji yili yimasile yaka 2000, ndumetume Paulo cilalicilile kumaloko. Ligongo cici ŵalinganyisye yeleyi? Soni ŵani ŵaŵakamwile nawo masengo gakulalicilaga?

Apano ku Turkey kwana ŵakulalicila ŵakupunda 2,800, nambo cilamboco cikwete ŵandu 79 miliyoni. Yeleyi yikulosya kuti jwakulalicila jumo akusosekwa kwalalicila ŵandu ciŵandika 28,000. Agambe ganicisya, ŵakulalicilaŵa aŵele ali mkulalicila ŵandu ŵamnono ŵa m’cilambo ca Turkey. Lisosa lyakulalicila kwapajikaku lyaliji kwayicila ŵandu ŵajinji pandaŵi jamnono. Abale ni alongo ŵakutyocela m’yilambo yine ŵakwana 550 ŵaŵaŵecetaga ciŵeceto ca ku Turkey ŵajawile kukulalicila mwapajika yalumo ni abale ni alongo ŵakumaloko. Ana ŵanduŵa ŵakombwele kutenda yamtuli?

Ŵalalicile mkuli wekulungwa. Mpingo wine wawuli ku Istanbul walembile kuti, “Ŵandu paŵatuwonaga, ŵawusyaga kuti, ‘Ana kwana msongano wapajika? Tukwawona Ŵamboni sya Yehofa palipose!’” Mpingo wine wawuli mumsinda wa Izmir walembile kuti, “Mundu jwine jwakamula masengo pakwimika magalimoto ŵam’wusisye jwamkulungwa jwa mumpingo jwine kuti, ‘Ana cikutendekwa cici? Yikuwoneka kuti pa masiku gelega mtanganidwe kwabasi!’” Kusala yisyene ŵandu ŵajinji ŵamanyilile ya masengoga.

Abale ni alongo ŵakutyocela m’yilambo yine ŵala ŵasangalele mnope ni masengo gakulalicilaga. Steffen jwa ku Denmark, ŵasasile kuti, “Lisiku lililyose, nasimanaga ni ŵandu ŵaŵaliji mkanapikanepo yakwamba Yehofa. Nalipikanaga kuti naliji mkumanyikasya lina lya Yehofa. Jean-David jwa ku France ŵalembile kuti, “Twalalicilaga msewu umo kwa maawala gejinji. Yeleyi yaliji yakusangalasya. Ŵandu ŵajinji nganiŵamanyililaga Ŵamboni sya Yehofa. Cakusangalasya mnope caliji cakuti pa mlango uliwose, twatagulilanaga ni ŵandu, kwalosya fidiyo soni kwapa yakuŵalanga.”

Kwa yijuma yiŵilipe, abale ni alongo 550 ŵala ŵagaŵile mabuku gakwana 60,000. Kusala yisyene jemanjaji ŵalalicile mkuli wekulungwa.

 Mtawu pamasengo gakulalicila wajonjecekwe. Kulalicila kwapajikaku kwalimbikasisye abale ŵakumaloko kuti ajonjecesye yakutenda mu undumetume. Ŵajinji ŵatandite ganicisya yakutanda undumetume wandaŵi syosope. Mwambone, mkati mwa miyesi 12 panyuma pakulalicila kwapajikaku, ciŵalanjilo ca apayiniya ku Turkey cakwesile ni ŵandu 82.

Abale ni alongo ŵakutyocela m’yilambo yine ŵala ŵasasile mwele kulalicila kwapajikaku kwakamucisye atamose paŵawujile m’yilambo yawo. Mlongo jwine jwa ku Germany lina lyakwe Şirin ŵalembile kuti, “Abale ni alongo ŵa ku Turkey ngayikusiyasawusya kulalicila mwaupile. Une ngusatenda sooni kulalicila mwaupile. Nambo nguyamicila mnope ligongo lya kulalicila kwapajikaku, cisyasyo ca abale ni alongo soni mapopelo gawo. Yeleyi yangamucisye mnope kuti ngombole kutenda yindu yanganindendejepo. Nakombwele kulalicila soni gaŵila tumapepala kwa ŵandu ŵakwenda mungulugulu njanji. Apano ngangusatenda sooni mpela munatendelaga pandanda.”

M’bale jwine jwa ku Germany lina lyakwe Johannes jwasasile kuti, “Nalijiganyisye yindu yine yakungamucisya pa undumetume wangu. Abale ni alongo ku Turkey akusaŵa ŵakusacilila kwasalila usyesyene ŵandu ŵajinji. Akusatenda yeleyi ndaŵi jilijose japatile lipesa. Naliji jwakusacilila kutenda yakulandanayi panawujile kumangwetu ku Germany, mwamti apano ngusinalalicila ŵandu ŵajinji kulekangana ni kala kose.

Mlongo jwine jwa ku France lina lyakwe Zeynep ŵasasile kuti, “Kulalicila kwapajikaku kungamucisye mnope pa undumetume wangu. Kungamucisye kuti mbe jwakulimba mtima soni kuti namkulupilileje mnope Yehofa.”

Ŵakulalicilaŵa ŵaliji ŵakamulana jwine ni mjakwe. Cinonyelo soni mkamulano wawapali pasikati pa abale ni alongo ŵakutyocela m’yilambo yakulekanganalekangana waliji wapajika mnope. Jean-David jwatumkolasile jula, ŵasasile kuti, “Abale ni alongo ŵajinji ŵatupocelaga m’nyumba syawo, ŵatuwonaga mpela acimjawo soni mpela ŵamwiŵasa mwawo. Namanyililaga kuti twaliji pa ubale wapacilambo cosope, ligongo ni yinaŵalangaga m’mabuku getu. Nambo pandaŵiji, naliwonele jika umboni wa yeleyi. Nawuweni kuŵa upile wapenani mnope kuŵa jumo jwa Mboni sya Yehofa, soni ngusinam’yamicila mnope Yehofa ligongo lya upile wapajikawu.”

 Mlongo jwine jwa ku France lina lyakwe Claire ŵasasile kuti, “Cinga ŵakutyocela ku Denmark, France, Germany, kapena ku Turkey, wosopewe twaliji mpela liŵasa limo. Yaliji mpela kuti Yehofa asimasisye malile ga yilambo.”

Stéphanie jwa ku France ŵajonjecesye kuti, “Kulalicila kwapajikaku kutujiganyisye kuti tukusaŵa ŵakamulana mnope ligongo lya cinonyelo catukwete pa Yehofa ngaŵaga ligongo lya ndamo kapena ciŵeceto.”

Ŵajinji mwa abale ŵakutyocela m’yilambo yine, ŵatandite kuganicisya yakusamila ku Turkey kuti akakamucisye pa masengo gagakusosekwa kutendekwape kumaloko. Ŵamnono mwa abaleŵa asamile kala ku cilamboku. Tukwayamicila mnope abaleŵa.

Mwambone, kakuga kane kakutali kakwete ŵakulalicila ŵakwana 25 mu mkuli umo. Kwa yaka yejinji, kwapali jwamkulungwa jwa mumpingo jumope basi. Nambo mu 2015, ŵakulalicila ŵa mu mkulimu ŵasangalele mnope kupocela abale ni alongo ŵakwana 6 ŵakutyocela m’cilambo ca Germany ni Netherlands.

Ana abale ni alongo ŵaŵatyocele m’yilambo yine kwawula ku Turkey asasile yamtuli yakwamba umi wakumaloko? Kusala yisyene, ndaŵi syejinji yikusaŵa yakusawusya, nambo kutumicila kumalo kwakukusosecela ŵakulalicila ŵajinji kukusakola yakuyicisya yambone. Kwende tulole yaŵecete ŵandu ŵane:

Federico jwa ku Spain jwakwete yaka ya m’ma 40, soni ali jwamlombele, ŵasasile kuti, “Ligongo lyakuti nganingola yindu yejinji yakucilu, yangamucisye kuti mbe jwagopoka. Yangamucisyesoni kuti nganisyo syangu syosope siŵeje pa yindu yakusosekwa mnope.” Ana jwalakwe ŵayamicile undumetume welewu? Elo. Ligongo ŵaŵecetesoni kuti, “Pawupite kucilambo cine ni cakulinga cakwakamucisya ŵandu kum’manyilila Yehofa, yikusaŵa kuti ugwejo ukuliŵika m’miyala mwa Yehofajo. Ukusalipikana yisyesyene kuti Yehofa akukukamucisya kupundana ni kala kose.”

Rudy jwa ku Netherlands jwakwete yaka ya m’ma 50 soni ali jwamlombele, jwaŵecete kuti, “Yikusaŵa yakusangalasya mnope kutumicila kumalo kwakukusosecela ŵakulalicila ŵajinji, soni kwajiganya usyesyene  ŵandu ŵajinji ŵaŵaliji mkanawupikanejepo. Yikusaŵasoni yakusangalasya mnope kwawona ŵandu ali mkusangalala ligongo lyakumanyilila usyesyene.”

Sascha jwa ku Germany jwakwete yaka ya m’ma 40, soni ali jwamlombele, jwaŵecete kuti, “Ndaŵi jilijose pandili mu undumetume, ngusasimana ni ŵandu ŵakusaŵa kuti akuwupikana usyesyene kandanda pa umi wawo. Kwakamucisya ŵandu ŵeleŵa kuti ammanyilile Yehofa yikusasangalasya mnope.”

Atsuko jwa ku Japan jwakwete yaka ya m’ma 30, soni jwali jwamlombegwe, ŵaŵecete kuti, “Kalakala nasakaga Alamagedo jili jiyice mwacitema. Nambo ndili mbite kukutenda undumetume ku Turkey, nam’yamicile Yehofa ligongo lyakwendelecela kuwusimana mtima. Kulola yakutenda Yehofa pakulongolela masengo gakulalicila ga pacilambo cosope, yikusandendekasya kuti nam’ŵandicile mnope.”

Mlongo jwine jwa ku Russia lina lyakwe Alisa jwakwete yaka ya m’ma 30, ŵasasile kuti, “Kutumicila Yehofa m’litala lyeleli kungamucisye mnope kupasya umbone mtima wakwe.” (Sal. 34:8) Jwalakwe ŵasasilesoni kuti, “Yehofa nganaŵape Atati ŵangu nambo alisoni Mjangu jwakusangamucisya pandaŵi jisimene ni yakusawusya. Apano ndili jwakusangalala mnope ligongo lya majali gambatile pa umi wangu.”

Ligongo lyakulalicila kwapajika kwakwatendekwe ku Turkey, ŵandu ŵajinji ŵapikene ngani syambone. Nambope, kwana mikuli jine jele ŵandu ŵakwe nganapikane usyesyene. Lisiku lililyose, ŵandu ŵa m’yilambo yine ŵaŵasamile ku Turkey akusasimana ni ŵandu ŵanganapikanejepo usyesyene wakwamba Yehofa. Ana wawojo akusaka kuja kutumicila m’mikuli mpela jeleji? Naga akuganicisya yakutenda yeleyi, tukwalimbikasya kuti, “Akwesye meso gawo ni alole m’migundamo, muswejele kala mwamti mukusosekwa kugowola.” (Yoh. 4:35) Ana yili yakomboleka kuja kamucisya mbali jine ja cilambo kwele m’migunda mwakwe “ mukusosekwa kugowola”? Naga yili m’yoyo, akusosekwa kosecela apanopano kuti cakwanilisye cakulinga celeco. Yisyene yakwe yili yakuti naga akonjecesya yakutenda pa masengo gakulalicila ngani syambone mpaka “kumbesi kwa cilambo capasi,” cacipata majali gamajinji ganganapatejepo!—Mase. 1:8.