Yepéyepé ta umaité mairamé ta uyuyuká, aintá ta umbaua ta upurará uaá irum. Ma até mairamé ta upurará retana aé té kuá ta upurará uaá upuderi usasá. — Remaã kuá kuadru  “Ta vida uyutrukari.”

Sá ne purarasá ti upaua, te rekuá maresé. Jesus umbeu kuaié: ‘Ape kuri te peyúka pe piá uirandé resé, ne pemanduari sesé kuá pesikari uaá uirandé, ñhansé usikana pemanduari uyí ara resé.’ — Mateus 6:34.

Ma, amuramé nemena u nerimiriku uxári indé, amuramé reriku masi puxiuera uaá ti uaá upaua, amuramé umanu auá regustari uaá. Maã indé resu remuñhã ti ramé repituú repurará?

Resasá ramé kuaié, indé repuderi remuñhã yepé maã: indé repuderi remaã ne purarasá amu rupité. Rekua ramé aikué maã indé ti uaá repuderi remupuranga, indé resu repuderi remaã amurupi té ne vida. (Provérbios 15:15) Kuá upuderi uajudari indé rekuá arama maã remuñhã ti arama resikari reyuyuká. Sá remuñhã ramé kuaié, indé resu repuderi rekuá maié ta kurí remuñhã mairamé repurará. — Jó 2:10.

REMANDUARI KUÁ RESÉ: Indé reputari uwí. Ma reriku arama uwí, indé represisari reriku pasiensia. Yepé ara resu remusaka maniaka, amu ara rekarãi, asui amu ara remuwáua. Yaué té yuíri, umupurará uaá irum indé. Merupi upuderi uyumukaturu. Amuramé rerikuté reriku pasiensia repuderi arama reiku puranga.

MAÃ INDÉ REPUDERI REMUÑHÃ KUÍRI TÉ: Indé repuderi rekuntari amu miraita irum uajudari arama indé, maié ne anama u ne rumuara, auá regustari uaá. Aintá ta upuderi ta uajudari reyusaã arama puranga. — Provérbios 11:14.