Colosenses 3:1-25
3 Bey túunoʼ, wa líiʼsaʼabeʼex junmúuchʼ yéetel Cristoeʼ+ seguernak a kaxtikeʼex le baʼaloʼob yanoʼob teʼ kaʼanoʼ, le tuʼux kulukbal Cristo tu x-noʼoj kʼab Diosoʼ.+
2 Chʼik a tuukuleʼex tiʼ le baʼaloʼob yanoʼob teʼ kaʼanoʼ,+ maʼ tiʼ le baʼaloʼob yanoʼob way luʼumeʼ.+
3 Tumen teʼexeʼ kíimeʼex, yéetel a kuxtaleʼexeʼ tiaʼan tu kʼab Cristo, le máax yaan junmúuchʼ yéetel Diosoʼ.
4 Le kéen u yeʼes u poder Cristo, le máax taasiktoʼon kuxtaloʼ,+ teʼexeʼ yaan a chíikbesaʼaleʼex yéetel yaan a nojbaʼalkúuntaʼaleʼex junmúuchʼ tu yéetel.+
5 Le oʼolaleʼ kíimseʼex le tsʼíibolal yaan tiʼ u xéexetʼal a luʼumkabil wíinklileʼexoʼ,+ jeʼex núupkʼeban,* éekʼ kuxtalil, u jíiltaʼal máak tumen u tsʼíibolalil u núupchital,+ kʼaakʼas tsʼíibolaloʼob bey xan u tsʼíiboltaʼal baʼax u tiaʼal yaanal; le jeʼelaʼ láayliʼ bey ka adorartaʼak imagenoʼobeʼ.
6 Tu yoʼolal le baʼaloʼobaʼ Dioseʼ yaan u yeʼesik u pʼujaʼanil.
7 Le baʼaloʼobaʼ letiʼe baʼaxoʼob ka beetkeʼex kaʼach ichil a kuxtaleʼexoʼ.+
8 Chéen baʼaleʼ beoraaʼ kʼaʼabéet a tselkeʼex tiʼ teʼex tuláakal le baʼaloʼobaʼ: kʼuuxilil, pʼuʼujulil, kʼasaʼanil,+ poochʼilil+ bey xan kʼaakʼas tʼaanoʼob+ ku jóokʼol tu chiʼ máak.
9 Maʼ a paklan tuskabaʼex.+ Piteʼex a úuchben modoseʼex+ paʼteʼ yéetel le baʼaxoʼob suuk a beetkeʼex kaʼachoʼ.
10 Búukinteʼex le túumben modosoʼ,+ ikil u yantalteʼex chúukaʼan kʼaj óolalileʼ ku bin u túumbenchajal utiaʼal ka chíikpajak tiʼ u modos Dios.+
11 Ichileʼ minaʼan griego mix judío, minaʼan circuncisión* mix incircuncisión, minaʼan j-táanxel luʼumil mix escita,* minaʼan esclavo, minaʼan xan máax maʼ esclavoiʼ, baʼaxeʼ Cristo chúukbesik tuláakal baʼal tiʼ tuláakal máak.+
12 Bey túunoʼ, teʼex santoʼex yéetel yaabiltaʼaneʼexeʼ, tumen yéeyaʼaneʼex tumen Dioseʼ,+ búukbesabaʼex yéetel le nojoch yaabilaj ku yeʼesaʼal tu yoʼolal le chʼaʼ óotsilaloʼ.+ Búukbesabaʼex xan yéetel utsil, yéetel kabal óolal,+ yéetel jeetsʼel óolal+ bey xan yéetel paciencia.+
13 Seguernak a muʼyajtikabaʼex ta baatsileʼex yéetel a perdonarkabaʼex ta baatsileʼex+ yéetel u jaajil a wóoleʼex kex wa yaan baʼax oʼolal u tʼaan máak tu contra uláakʼ.+ Jeʼel bix tu perdonartileʼex Jéeoba yéetel u jaajil u yóoleʼ teʼexeʼ bey xan unaj a beetkeʼexoʼ.+
14 Chéen baʼaleʼ maʼ chéen leloʼ, baʼaxeʼ unaj a búukbeskabaʼex yéetel yaabilaj,+ tumen le yaabilajoʼ jach tu jaajil ku muchʼik máak.+
15 Tsʼoʼoleʼ nuʼuktaʼak a puksiʼikʼaleʼex tumen u jeetsʼelil Cristo,+ tumen u jaajileʼ teʼexeʼ tʼaʼaneʼex utiaʼal ka suunakeʼex junpʼéeliliʼ wíinklil yéetel ka yanakteʼex le jeetsʼelil jeʼeloʼ. Tsʼáaʼex xan u graciasil tuláakal baʼal.
16 Chuʼupuk a puksiʼikʼaleʼex yéetel u kaʼansajoʼob Cristo utiaʼal ka a naʼateʼex tubeel tuláakal baʼal. Maʼ u xuʼulul a paklan kaʼanskabaʼex yéetel a paklan líiʼsik a wóoleʼex* ta baatsileʼex táan a kʼaykeʼex salmos,+ alabanzaʼob utiaʼal Dios, kʼaayoʼob utiaʼal a adorarkeʼex Dios yéetel kʼaayoʼob utiaʼal a tsʼáaikeʼex gracias; kʼaayneneʼex xan ichil a puksiʼikʼaleʼex utiaʼal Jéeoba.+
17 Jeʼel baʼalak xan ka a waʼaleʼex wa ka a beeteʼexeʼ, beeteʼex tuláakal tu kʼaabaʼ Yuumtsil Jesús yéetel tsʼáaʼex gracias tiʼ Dios le Taata tu kʼaabaʼ Yuumtsiloʼ.+
18 Atantsileʼex, tsʼáabaʼex yáanal u páajtalil a wíichameʼex+ jeʼex uts tu tʼaan Yuumtsileʼ.
19 Íichamtsileʼex, maʼ u xuʼulul a yaabiltikeʼex a wataneʼex,+ yéetel maʼ a sen kʼuuxileʼex tu yéeteloʼob.*+
20 Paalaleʼex, uʼuyeʼex u tʼaan a taataʼex tiʼ tuláakal baʼal,+ tumen Yuumtsileʼ jach uts tu tʼaan ka beetaʼak beyoʼ.
21 Taatatsileʼex, maʼ a beetkeʼex u kʼuuxil* a paalaleʼex+ utiaʼal maʼ u yaatal u yóol u puksiʼikʼaloʼob.*
22 Esclavoʼex, tiʼ tuláakal baʼaleʼ, uʼuyeʼex u tʼaan a tsʼuulileʼex;+ maʼ a beetkeʼex chéen le táan u yilkeʼexoʼob jeʼex u beetik le máaxoʼob u kʼáatoʼob lúubul utsil tiʼ u maasiloʼ, baʼaxeʼ beeteʼex yéetel u jaajil u yóol a puksiʼikʼaleʼex bey xan tumen jach ka respetarkeʼex Jéeoba.
23 Jeʼel baʼalak táan a beetkeʼexeʼ, beeteʼex yéetel u jaajil a wóoleʼex* bey utiaʼal Jéeobaeʼ+ maʼ bey utiaʼal wíinikoʼobiʼ,
24 tumen a wojleʼexeʼ Jéeoba ken u tsʼáateʼex le herencia bey junpʼéel premiooʼ.+ Beetabaʼex esclavoil tiʼ Cristo, le Tsʼuuloʼ.
25 U jaajileʼ kex jeʼel máaxak+ ka u beet baʼax kʼaaseʼ yaan u kʼamik u boʼolil le kʼaas tu beetoʼ.+
Notas
^ Ilawil página 2573.
^ Ilawil página 2559.
^ Bey u yaʼalaʼal kaʼach tiʼ le máakoʼob ku taasaʼaloʼob mix baʼalil tu yoʼolal bix u kuxtaloʼob wa tu yoʼolal baʼax suuk u beetkoʼoboʼ.
^ Wa «tsolnuʼuktikabaʼex».
^ Wa «maʼ u chichtal a puksiʼikʼaleʼex tiʼ letiʼob».
^ Wa «maʼ a náaksikeʼex u yóol; maʼ a beetkeʼex u yaatal u yóol».
^ Wa «u lúubul u yóoloʼob».
^ Wa «yéetel tuláakal a puksiʼikʼaleʼex».
