XOOK 2
¿Máax Dios?
1. ¿Baʼaxten unaj a adorartik Dios?
Tumen letiʼ beet tuláakal baʼal. Dioseʼ desde úuchjeakil yaniliʼeʼ yéetel mix bikʼin u xuʼulul (Salmo 90:2). Dios aʼalmil le jatsʼuts promesaʼob yaan teʼ Bibliaoʼ (1 Timoteo 1:11). Yoʼolal letiʼeʼ kuxaʼanoʼon, le beetik chéen letiʼ unaj k-meyajtik yéetel k-adorartik. Xok Apocalipsis 4:11.
2. ¿Bix Dios?
U wíinklil Dioseʼ maʼ jeʼex k-tiaʼaloʼ, letiʼeʼ juntúul espíritu, le oʼolal mix juntéen ilaʼak tumen mix máak (Juan 1:18; 4:24). Chéen baʼaleʼ jeʼel u páajtal k-kʼaj óoltik u jatsʼuts modos le kéen k-il le baʼaxoʼob u beetmoʼ. Jeʼex le jejeláas frutaʼob yéetel le looloʼoboʼ ku yeʼesik u yaabiltmoʼon yéetel táaj yaan u naʼat. Tsoʼoleʼ le bukaʼaj baʼaloʼob yaan teʼ kaʼan bey xan way Luʼumeʼ ku yeʼesik u nojoch poder. Xok Romanos 1:20.
Jeʼel xan u páajtal k-kʼaj óoltik Dios le kéen k-xok le Bibliaoʼ. Kéen k-xokeʼ k-ilik bix u tratartik máak, baʼax uts tu tʼaan, baʼax u pʼeek yéetel bix u yuʼubikuba yoʼolal baʼax k-beetik. Xok Salmo 103:7-10.
3. ¿Bix u kʼaabaʼ Dios?
Jesúseʼ tu yaʼalaj: «K-Taata yanech teʼ kaʼanoʼ, santificartaʼak a kʼaabaʼ» (Mateo 6:9). Kex jejeláas bix u yaʼalaʼal tiʼ Dioseʼ chéen junpʼéel u kʼaabaʼ yaan. Como yaʼab idiomaʼob yaneʼ maʼ igual bix u yaʼalaʼal u kʼaabaʼiʼ. Ich maayaeʼ ku yaʼalaʼal Jéeoba, baʼaleʼ yaan máakeʼ ku yaʼalik xan tiʼ Yavé. Xok Salmo 83:18 (tiʼ uláakʼ Bibliaʼobeʼ 82:19).
Tiʼ jejeláas Bibliaʼobeʼ luʼsaʼab le kʼaabaʼ Jéeobaoʼ ka tsʼaʼab Yuumtsil wa Diosiʼ. Chéen baʼaleʼ ka yáax tsʼíibtaʼab le Bibliaoʼ ku chíikpajal u kʼaabaʼ Dios kex siete mil u téeneliʼ. Jesúseʼ tu kaʼansaj u kʼaabaʼ Dios tiʼ le máakoʼoboʼ. Xok Juan 17:26.
Chaʼant le video ¿Yaan wa u kʼaabaʼ Dios?
4. ¿U yaabiltmoʼon wa Dios?
Jeʼex le taatatsilaʼ, Jéeobaeʼ jach u yaabiltmoʼon yéetel u kʼáat ka xiʼiktoʼon utsil
Yaan máaxoʼob aʼalikeʼ wa u yaabiltmoʼon Dioseʼ, ¿baʼaxten ku chaʼik k-sufrir? Ku yaʼalikoʼob xaneʼ ku beetik u sufrir máak utiaʼal u probartik. Pero leloʼ maʼ jaajiʼ. Xok Santiago 1:13.
Jéeobaeʼ ku yeʼesik u yaabiltmoʼon tumen ku chaʼik k-yéeyik baʼax ken k-beete. Letiʼeʼ ku chaʼik k-yéeyik wa yaan k-adorartik, maʼ tu obligarkoʼon (Josué 24:15). Pero bejlaʼeʼ táan k-sen sufrir tumen yaʼab máakeʼ ku yéeyik u beetik baʼaloʼob kʼaastak. Chéen baʼaleʼ Jéeobaeʼ maʼ uts tu tʼaan u yilik k-sufririʼ. Xok Génesis 6:5, 6.
Jéeobaeʼ jach u yaabiltmoʼon le oʼolal u kʼáat ka k-disfrutart k-kuxtal. Maʼ tun xáantaleʼ yaan u xuʼulsik le baʼaxoʼob beetik k-muʼyajoʼ bey xan le máaxoʼob beetik k-sufriroʼ. ¿Yaan wa baʼax oʼolal ku chaʼik k-sufrir? Yaan. Teʼ xook 8, tiʼ ken u tsoliʼ. Xok 2 Pedro 2:9; 3:7, 13.
5. ¿Bix jeʼel a náatsʼal yiknal Dioseʼ?
Jéeobaeʼ ku yaʼalik ka orarnakoʼon tiʼ letiʼ. Como u yaabiltmoʼoneʼ u kʼáat ka náatsʼkoʼon tu yiknal. Tsʼoʼoleʼ ku perdonarkoʼon (Salmo 65:2; 145:18). Letiʼeʼ u yojel maʼ fácil k-beetik baʼax ku yaʼalikiʼ, pero ku kiʼimaktal u yóol wa k-tsʼáaik k-óol beete. Kex kʼebanoʼoneʼ jeʼel u páajtal k-amigotik Dioseʼ. Xok Salmo 103:12-14; Santiago 4:8.
Unaj k-yaabiltik Jéeoba tumen letiʼ tsʼaamil k-kuxtal (Marcos 12:30). Jeʼel a weʼesik a yaabiltmaj Jéeoba kéen kaanbalnakech tiʼ letiʼ bey xan kéen a beet baʼax ku yaʼalik. Jujunpʼíitil ken a wuʼuyil maas náatsʼ yanilech tiʼ letiʼ. Xok 1 Timoteo 2:4; 1 Juan 5:3.
