U tsʼáaik máak junpʼéel maʼalob ejemploeʼ letiʼe u beetik le baʼax ku kaʼansikoʼ. Koʼox aʼalikeʼ juntúul taatatsileʼ ku yaʼalik tiʼ u hijo mantatsʼ unaj u yaʼalik u jaajil, chéen baʼaleʼ le kéen taalak kaxtbileʼ ku yaʼalik tiʼ u hijo ka jóokʼok u yaʼal maʼ kulaʼaniʼ. ¿Máasaʼ wa ku beetik beyoʼ maʼ táan u kaʼansik tiʼ u paal u yaʼal u jaajiliʼ?

«Yaʼab máakeʼ ku yaʼalik: ‹Beet baʼax kin waʼalik maʼ baʼax kin beetkiʼ›. Chéen baʼaleʼ maʼ bey unaj u kaʼansaʼal le paalaloʼoboʼ, letiʼobeʼ beyoʼob mejen piitsʼeʼ ku kankoʼob tuláakal baʼax ku yaʼalik yéetel ku beetik máak. Wa táan k-aʼaliktiʼob ka u beetoʼob junpʼéel baʼal, chéen baʼaleʼ toʼoneʼ k-beetik yaanal baʼaleʼ, yaan u tsʼáaikoʼob cuenta yéetel yaan u yaʼalikoʼobtoʼon» (David).

LE BIBLIAOʼ KU YAʼALIK: «Teech ka waʼalik: ‹Maʼ a wookol›, ¿ka wookol wa?» (Romanos 2:21).

Le táan u bin u nojochtal le paalaloʼoboʼ maas ku chʼaʼikoʼob en cuenta baʼax ku yaʼalaʼaltiʼob tumen u taataʼob ke le baʼax ku yaʼalaʼaltiʼob tumen u yéet xookoʼoboʼ. Le oʼolaleʼ maases letiʼe taatatsiloʼob unaj u kaʼansik u paalaloʼoboʼ, chéen baʼaleʼ kʼaʼabéet xan u tsʼáaikoʼob junpʼéel maʼalob ejemplo.

«Maʼ xaaneʼ ka wilkeʼ kex ka a babal aʼal wa baʼax tiʼ a paalaleʼ bey maʼ tu yuʼubikechoʼobeʼ, chéen baʼaleʼ wa maʼ ta beetik le baʼax ka waʼalikoʼ séeb u chʼinikoʼob ta wich. Kex maʼ t-tsʼáaik cuentaeʼ le paalaloʼoboʼ táan u yilkoʼob tuláakal le baʼaxoʼob k-beetkoʼ» (Nicole).

LE BIBLIAOʼ KU YAʼALIK: «Le naʼat ku taal teʼ kaʼanoʼ [...] maʼ j-kaʼapʼéel ichiʼ» (Santiago 3:17).

Tuukulnen tiʼ lelaʼ: «¿Bix in tratartik in núup yéetel in paalal? ¿Baʼax programailoʼob suuk in chaʼantik? ¿Baʼax clase amigoʼob yaanten? ¿Kin tuukul wa yoʼolal u maasil?». Le kéen nojochchajak a paalaleʼ, ¿a kʼáat wa ka u beetoʼob le baʼaxoʼob ka beetik techoʼ?

«Teen yéetel in wíichameʼ mix juntéen k-aʼalik tiʼ k-paalal ka u beetoʼob le baʼaloʼob maʼatech k-beetik mix toʼonoʼ» (Christine).

Kʼáat perdón. Le paalaloʼoboʼ u yojloʼobeʼ u taataʼobeʼ deporsi maʼ perfectoʼobiʼ. Le kéen a kʼáat perdón tiʼ a núup yéetel tiʼ letiʼobeʼ ka kaʼansiktiʼob mantatsʼ unaj u yaʼalikoʼob u jaajil yéetel u kʼáatkoʼob perdón.

«Kʼaʼabéet k-reconocertik yaan baʼaloʼob maʼ maʼalobtak k-beetkiʼ yéetel k-kʼáatik perdón, beyoʼ le paalaloʼoboʼ yaan u kaanbaloʼob tiʼ baʼax k-beetik» (Robin).