Le Bibliaoʼ ku yaʼalikeʼ le máaxoʼob naatsʼ yaniloʼob tiʼ Diosoʼ ku kanáantkoʼob le bix u biskubaʼob tu yéeteloʼ, tsʼoʼoleʼ ku tsʼáaikoʼob ichil u kuxtaloʼob baʼax ku yaʼalik. Baʼaleʼ le máaxoʼob chéen u yutsil ku kaxtikoʼoboʼ ku beetkoʼob chéen baʼax uts tu tʼaanoʼob (Judas 18, 19; Efesoiloʼob 5:1).

BAʼAX KU YAʼALIK LE BIBLIAOʼ: «Wa ku lúubul a wóol le kéen a wilaba ich talamileʼ, ku yúuchul tumen junpʼíit a muukʼ» (Proverbios 24:10).

BAʼAX U KʼÁAT U YAʼALE: Kéen lúubuk u yóol máakeʼ ku pʼáatal maʼ taak u seguer u beetik mix baʼaliʼ. Baʼaleʼ u kʼaʼajsik máak yaan baʼax maʼalob ku taal u kʼiineʼ jeʼel u yáantikeʼ. Unaj k-kʼaʼajsikeʼ deporsi yaan u kʼuchul u kʼiinil u xuʼulul le problemaʼoboʼ yéetel yaʼab baʼaloʼob jeʼel u kanik máak tak tiʼ le baʼaxoʼob kʼaastak ku yúuchultiʼoʼ.

BAʼAX JEʼEL U PÁAJTAL A BEETKEʼ: Tuukulnen tiʼ baʼax maʼalob jeʼel u yúuchleʼ. Tu lugar a chiʼichnaktal yoʼolal baʼax jeʼel u yúuchul wa a kutal a páaʼt u maʼalobtal a kuxtaleʼ ilawil baʼax jeʼel a beetik utiaʼal u maʼalobtaleʼ. Chéen baʼaleʼ kʼaʼajak xan techeʼ junsúutuk jeʼel u jáan kʼexpajal a kuxtaleʼ (Eclesiastés 9:11). U jaajileʼ maʼ bey jeʼex k-tuklik wa baʼaxeʼ maʼ bey u yúuchliʼ. Le Bibliaoʼ ku yaʼalik: «Pakʼ a wiʼinaj tu jaʼatskabil, pakʼ xan tu yoknaj kʼiin, tumen mix bikʼin bíin ojéeltaʼak máakalmáak bíin maʼalob jóokʼokiʼ, wa le ta yáax pakʼajoʼ, wa le ta pachal pakʼajoʼ, wa tu kaʼapʼéelal bíin maʼalobchajak» (Eclesiastés 11:6).

BAʼAX KU YAʼALIK LE BIBLIAOʼ: «¡Tsʼáaten naʼat utiaʼal ka páatak in kuxtal! [...] Tiʼ a tʼaaneʼ yaan tuláakal jaaj» (Salmo 119:144, 160).

 BAʼAX U KʼÁAT U YAʼALE: Le Bibliaoʼ ku tsolik tuláakal le baʼaxoʼob taak k-ojéeltikoʼ. Ku tʼaan tiʼ baʼaloʼob jeʼex:

• ¿Baʼax oʼolal kuxaʼanoʼon?

• ¿Baʼaxten k-muʼyaj?

• ¿Baʼax ku yúuchul kéen kíimik máak?

• ¿Baʼax ku taal u kʼiin u yúuchul?

U millonesil máakoʼob tiʼ tuláakal yóokʼol kaabeʼ kiʼimak u yóoloʼob úuchik u kankoʼob baʼax ku yaʼalik le Biblia yoʼolal le baʼaloʼobaʼ bey xan tu yoʼolal uláakʼ baʼaloʼob taak u yojéeltikoʼob.

BAʼAX JEʼEL U PÁAJTAL A BEETKEʼ: Ilawil a kanik baʼax ku yaʼalik le Bibliaoʼ. Aʼal tiʼ juntúul u testigo Jéeoba ka u yáantech a naʼate. Jeʼel u páajtal xan a wilik le sitio jw.org yaantoʼon ich Internetoʼ wa jeʼel xan u páajtal a bin tuʼux suuk u muchʼkubaʼob kaanbal tiʼ Dioseʼ. Gratis u yokol máakiʼ yéetel maʼatech u máan kʼáatbil taakʼiniʼ.

NATSʼABA TIʼ DIOS

«Kiʼimak u yóol le máaxoʼob wiʼijoʼob tiʼ tuláakal le baʼaxoʼob ku tsʼáaik Diosoʼ, tumen u tiaʼaloʼob u Reinoil kaʼan» (MATEO 5:3).

ILAWIL A KAANBAL TIʼ DIOS

‹Kaxt Dios, [...] letiʼeʼ maʼ náach yanil tiʼ cada juntúul tiʼ toʼoneʼexiʼ› (BAʼAXOʼOB [HECHOS] 17:27).

XOK LE BIBLIAOʼ YÉETEL TUUKULNEN TIʼ BAʼAX KU YAʼALIK

«Kiʼ u yóol le máak [...] u yaabilajeʼ tiʼ u tsʼaamaj tiʼ u yaʼalmajtʼaan Yuumtsileʼ, ku tsʼáaik xan [tu] tuukul bul kʼiin yéetel bul áakʼab. [...] ¡Tuláakal baʼax ku beetkeʼ ku jóokʼol utsil tiʼ!» (SALMO 1:1-3).