U YÁANTAʼAL LE MÁAXOʼOB YAACHAJAʼAN U YÓOLOʼOBOʼ

Áantaj utiaʼal máaxoʼob yaachajaʼan u yóoloʼob

PAX ICH

YAʼAB BAʼAXOʼOB TSʼOʼOK U PUBLICARTAʼAL UTIAʼAL U YÁANTAʼAL LE MÁAXOʼOB YAACHAJAʼAN U YÓOLOʼOBOʼ. Jeʼex tsʼoʼok k-ilkoʼ yaʼab tiʼ le baʼaxoʼob ku yaʼalik le especialistaʼoboʼ chíikaʼan tiʼ le baʼax ku yaʼalik le Bibliaoʼ. Leloʼ ku yeʼesikeʼ láayliʼ ku yáantaj le baʼax ku yaʼalik le Bibliaoʼ. Chéen baʼaleʼ maʼ chéen ku tsʼáaik maʼalob consejoʼobiʼ, ku yaʼalik xan baʼaloʼob mix tuʼux uláakʼ jeʼel k-kaxtikeʼ.

Le kimenoʼoboʼ maʼ táan u muʼyajoʼobiʼ

U libroil Eclesiastés 9:5, ku yaʼalikeʼ le kimenoʼoboʼ «maʼ u yojloʼob mix baʼaliʼ». Tsʼoʼoleʼ «ku pʼáatal maʼ tu páajtal u béeykuntkoʼob le baʼax u tukultmoʼoboʼ» (Salmo 146:4). Le oʼolal le Bibliaoʼ ku yaʼalikeʼ le kimenoʼoboʼ bey táan u weenloʼobeʼ (Juan 11:11).
Natsʼaba yiknal le Dios u yaabiltmechoʼ

Le Bibliaoʼ ku yaʼalik: «Jéeobaeʼ * táan u paktik le máaxoʼob beetik baʼax maʼalob utiaʼal u kanáantkoʼoboʼ, ku chʼenxikintikoʼob kéen u kʼáatoʼob áantaj» (Salmo 34:15). Le oraciónoʼ ku yáantaj utiaʼal u yuʼubikuba máak maʼalob. Lelaʼ bey jeʼex kéen tsikbalnak máak yéetel wa máaxeʼ. U jaajileʼ le oraciónoʼ ku natsʼkoʼon yiknal Dios, le máax jach u kʼáat ka líikʼik k-óoloʼ.
Táan u náatsʼal junpʼéel jatsʼuts kuxtal

Le Bibliaoʼ ku yaʼalikeʼ yaan u kʼuchul u kʼiinil u kaʼa kuxkíintaʼal le kimenoʼoboʼ. Por ejemploeʼ ku yaʼalik bix le kuxtal kun antal way Luʼumeʼ. Ku yaʼalikeʼ Jéeobaeʼ «yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj» (Apocalipsis 21:3, 4).

Yaʼab máakeʼ ku líikʼil u yóol kéen u yojéelt yaan u kaʼa kuxkíintaʼal le kimenoʼob tumen Jéeoba, le Dios beet u tsʼíibtaʼal le Bibliaoʼ. Anneʼ 65 años tsʼoʼokok u beel ka kíim u yíicham, letiʼeʼ ku yaʼalik: «Tsʼoʼok in kanikeʼ le máaxoʼob kimenoʼoboʼ maʼ táan u muʼyajoʼobiʼ yéetel Dioseʼ yaan u kaʼa kuxkíintik le máaxoʼob yanoʼob tu tuukuloʼ. Cada ken in kʼaʼajs in wíichameʼ kin kʼaʼajsik xan le jatsʼuts promesaaʼ, lelaʼ jach ku líiʼsik in wóol».

Tina, le máax tsʼoʼok k-yáax chʼaʼchiʼitikoʼ, ku yaʼalik: «Desde ka kíim Timoeʼ jach tsʼoʼok in wilik bix u yáantken Dios. Kéen in wuʼuy jach yaachajaʼan in wóoleʼ kin wuʼuyik bey ku machik in kʼab Jéeoba utiaʼal u yáantkeneʼ. In wojéeltik yaan u kaʼa kuxkíintaʼal le kimenoʼoboʼ ku tsʼáaikten muukʼ utiaʼal in páaʼtik u kʼuchul u kʼiinil in kaʼa ilik Timo».

Le baʼax ku yaʼalik le koʼoleloʼobaʼ ku yeʼesik bix u yuʼubikuba u millonesil máakoʼob jach ku creerkoʼob baʼax ku yaʼalik le Bibliaoʼ. Wa chan difícil a creertik baʼax ku yaʼalikeʼ, jóoʼs tiempo utiaʼal a wilik baʼaxten jach maʼalob le consejoʼob ku tsʼáaikoʼ yéetel baʼax eʼesik jeʼel u béeytal xan le baʼax ku prometertik Diosoʼ. Le Bibliaoʼ jach tu jaajil jeʼel u yáantik le máaxoʼob yaan máax tsʼoʼok u kíimil tiʼoboʼ.