BAʼAX KU CREERTAʼAL.

Yaʼab máak tuklikeʼ maʼ kʼaas u báaxal máak yoʼolal taakʼin wa ku beetaʼal jeʼex u yaʼalik le autoridadoʼoboʼ. Por ejemploeʼ yaan tiʼ le taakʼin ku juntartaʼal teʼ loteríaʼob ku beetik le gobiernooʼ ku meyaj utiaʼal u yáantaʼal uláakʼ máakoʼob.

BAʼAX KU YAʼALIK LE BIBLIAOʼ.

Le Bibliaoʼ maʼ juntaatsʼ u yaʼalik baʼax ku tuklik Dios yoʼolal le apuestaʼoboʼ. Pero ku yáantkoʼon k-naʼat baʼax ku tuklik yoʼolal le clase báaxal beyaʼ.

Le kéen apostarnak máakeʼ ku beetik utiaʼal u ganartik u taakʼin uláakʼ máakoʼob. Chéen baʼaleʼ lelaʼ ku bin tu contra tiʼ le baʼax tu yaʼalaj Jesúsoʼ: «Kanáantabaʼex utiaʼal maʼ a tsʼíiboltkeʼex ayikʼalil» (Lucas 12:15). U suukileʼ le máakoʼoboʼ ku apostaroʼob utiaʼal u maas yantaltiʼob taakʼin. Le máaxoʼob organizartik le báaxaloʼob beyaʼ ku yaʼalikoʼobeʼ jach yaʼab taakʼin jeʼel u ganartik máakeʼ, pero u jaajileʼ jach junpʼíit máakoʼob ku ganaroʼob. Yaʼab máak xaneʼ ku apostartik yaʼab taakʼin teʼ casinoʼoboʼ. Chéen baʼaleʼ le clase báaxal beyaʼ tu lugar u yáantik máak utiaʼal maʼ u sen tsʼíiboltik taakʼineʼ, ku beetik u tsʼíiboltik máak u yantaltiʼ taakʼin chéen beyoʼ.

Le kéen apostarnak máakeʼ ku tuukul chéen tu yoʼolal tumen ku taaktal u ganartik le taakʼin ku perdertik u maasiloʼoboʼ. Chéen baʼaleʼ le Bibliaoʼ ku yaʼalik: «Cada juntúul máakeʼ maʼ u seguer u kaxtik chéen u yutsil, baʼaxeʼ u yutsil u yéet máakil» (1 Corintios 10:24). Tsʼoʼoleʼ junpʼéel tiʼ le Diez Mandamientoʼoboʼ ku yaʼalik xan: «Maʼ unaj a tsʼíiboltik mix junpʼéel tiʼ le baʼaloʼob yaantiʼ a wéet máakiloʼ» (Éxodo 20:17). U jaajileʼ le kéen apostarnak máakeʼ ku beetik yéetel u tuukulil u ganartik u taakʼin u maasil máakoʼob.

Le Bibliaoʼ ku yaʼalikeʼ maʼ unaj k-creertik xan wa yaan u suerte máakiʼ. Úuchjeakileʼ tu kaajil Israeleʼ anchaj máaxoʼob maʼ confiarnajoʼob tiʼ Jéeobaiʼ ka káaj u adorarkoʼob «u diosil le Suerteoʼ». ¿Bix tu yilil Jéeoba le baʼax tu beetoʼoboʼ? Letiʼeʼ tu yaʼalaj: «Teʼexeʼ seguernaj a beetkeʼex baʼaxoʼob kʼaastak tin táan, yéetel ta yéeyaj a beetkeʼex baʼaxoʼob maʼ uts tin tʼaaniʼ» (Isaías 65:​11, 12).

Tiʼ jujunpʼéel luʼumiloʼobeʼ le taakʼin ku juntartaʼal utiaʼal le apuestaʼoboʼ ku meyaj utiaʼal u yáantaʼal le paalaloʼob xookoʼ wa le máaxoʼob óotsiloʼoboʼ. Chéen baʼaleʼ kex ka meyajnak le taakʼin beyoʼ maʼ u kʼáat u yaʼal wa maʼalobiʼ, tumen le apuestaʼoboʼ ku beetik u tsʼíiboltik máak u maas ayikʼaltal, u tuukul chéen tu yoʼolal yéetel u yantaltiʼ taakʼin chéen beyoʼ.

«Maʼ unaj a tsʼíiboltik mix junpʼéel tiʼ le baʼaloʼob yaantiʼ a wéet máakiloʼ» (Éxodo 20:17).

BAʼAX KU YAʼALIK LE BIBLIAOʼ.

Le Bibliaoʼ ku yaʼalik: «Le máaxoʼob u chʼaʼtukultmaj u ayikʼaltaloʼoboʼ ku túuntaʼal u yóoloʼob yéetel ku lúubloʼob tiʼ junpʼéel léech bey xan tiʼ kʼaakʼas tsʼíibolaloʼob chéen kuneloʼob ku biskoʼob máak tiʼ kʼaskúunajil yéetel xuʼulsajil» (1 Timoteo 6:9). Le máax ku apostaroʼ jach ku tsʼíiboltik u yantaltiʼ taakʼin. Le Bibliaoʼ ku yaʼalikeʼ le tsʼíibolalaʼ jach kʼaas, le oʼolal unaj k-pʼektik (Efesios 5:3).

Le apuestaʼoboʼ ku beetik u yaabiltik máak le taakʼinoʼ. Ku beetik u tuklaʼal chéen chʼaʼabil jeʼel u ayikʼaltal máakeʼ. Le Bibliaoʼ ku yaʼalikeʼ «u yaabiltaʼal le taakʼinoʼ u moots tuláakal u jejeláasil baʼaloʼob kʼaastak». Le máax u yaabiltmaj le taakʼinoʼ ku controlartaʼal tumen le tsʼíibolal jeʼeloʼ. Tsʼoʼoleʼ jeʼel tak u yantal ansiedad tiʼeʼ yéetel jeʼel tak u náachtal tiʼ Dioseʼ. Le Bibliaoʼ ku yaʼalikeʼ le máaxoʼob ku lúubloʼob tiʼ le vicioaʼ ku «sen muʼyajoʼob» (1 Timoteo 6:10).

U tsʼíiboltaʼal ayikʼalileʼ ku beetik u pʼáatal maʼ kiʼimak u yóol máakiʼ tumen chéen ku sen tsʼíiboltik u maas antal taakʼin tiʼ. Eclesiastés 5:10, ku yaʼalik: «Le máax u yaabiltmaj plataeʼ mix bikʼin u kiʼimaktal u yóol yéetel le bukaʼaj plata yaantiʼoʼ, le máax u yaabiltmaj le ayikʼaliloʼ mix bikʼin xan u kiʼimaktal u yóol yéetel le bukaʼaj ku náajaltikoʼ».

U millonesil máakoʼobeʼ tsʼoʼok u suut tiʼob junpʼéel vicio u apostaroʼob. Por ejemploeʼ tu luʼumil Estados Unidoseʼ u millonesil máakoʼob yaan tiʼob le vicioaʼ.

Proverbios 20:21, ku yaʼalik: «Junpʼéel herencia maʼ maʼalob bix u yantal tiʼ máakeʼ, kéen máanak kʼiineʼ mix junpʼéel utsil ken u taase». Le máaxoʼob ku suut vicioil u apostaroʼoboʼ jeʼel u sen pʼaxkubaʼobeʼ, jeʼel u perderkoʼob u amigoʼob, u meyajoʼob yéetel u familiaʼob. Le oʼolal maas maʼalob ka k-beet baʼax ku yaʼalik le Bibliaoʼ beyoʼ maʼ ken lúubkoʼon tiʼ baʼaloʼob kʼaastakiʼ.

«Le máaxoʼob u chʼaʼtukultmaj u ayikʼaltaloʼoboʼ ku túuntaʼal u yóoloʼob yéetel ku lúubloʼob tiʼ junpʼéel léech bey xan tiʼ kʼaakʼas tsʼíibolaloʼob chéen kuneloʼob ku biskoʼob máak tiʼ kʼaskúunajil yéetel xuʼulsajil» (1 Timoteo 6:9).