YAAN MÁAXOʼOB AʼALIK MAʼATECH. Juntúul doctoreʼ tu yaʼaleʼ k-kaxtik áantaj teʼ Bibliaoʼ bey jeʼex ka meyajnaktoʼon junpʼéel libro jóoʼsaʼab 1920 utiaʼal k-kaʼansik Quimicaeʼ. Yaan máaxeʼ hasta jeʼel u kʼáatiktech wa jeʼel u meyajtech u instructivoil junpʼéel computadora jach úuchben utiaʼal a kanik bix jeʼel u meyajtech junpʼéel maas túumbeneʼ. Lelaʼ ku yeʼesik yaan máaxoʼob tuklik le Bibliaoʼ maʼ tu páajtal u yáantik máak teʼ kʼiinoʼobaʼ.

¿Jeʼel wa u meyajtech junpʼéel libro jach úuchben wa yaʼab túumben baʼaloʼob yaneʼ? Bejlaʼeʼ yaʼab sitioʼob yaan ich Internet utiaʼal u yáantaʼal máak. Teʼ televisionoʼ yaan programaʼob tuʼux ku jóokʼol psicologoʼob yéetel uláakʼ máakoʼob ku tsʼáaikoʼob tsolnuʼukoʼob. Tsʼoʼoleʼ u milesil libroʼob ku koʼonol utiaʼal u yáantaʼal máak, baʼaleʼ lelaʼ chéen ku beetaʼal utiaʼal u náajaltaʼal u millonesil taakʼin.

Wa yaʼab baʼaloʼob túumbentak yaneʼ, ¿maʼalob wa ka meyajnaktoʼon le Biblia tsʼoʼok óoliʼ dos mil años tsʼíibtaʼakoʼ? Le máaxoʼob ketik le Biblia yéetel junpʼéel úuchben libro wa yéetel junpʼéel úuchben instructivoeʼ, ¿jaaj wa le baʼax ku yaʼalikoʼoboʼ? U jaajileʼ maʼ. Le ciencia yéetel le tecnologíaoʼ séeb u kʼexpajal, chéen baʼaleʼ tuláakloʼon k-kʼáat ka yanaktoʼon kiʼimak óolal, maʼ u yúuchultoʼon loob, u yantal u biilal k-kuxtal yéetel ka múuchʼ yanak k-láakʼtsiloʼob yéetel k-amigoʼob.

Le Bibliaoʼ, kex jach úuchbeneʼ, ku tʼaan tiʼ le baʼaxoʼob k-kʼáat ka yanaktoʼonoʼ. Ku yaʼalik xaneʼ Dios beet u tsʼíibtaʼal. Tsʼoʼoleʼ ku taasik tsolnuʼukoʼob ku yáantkoʼon ichil k-kuxtal bey xan utiaʼal k-aktáantik jeʼel baʼaxakeʼ (2 Timoteo 3:16, 17). Le Bibliaoʼ ku yaʼalikeʼ le tsolnuʼukoʼob ku tsʼáaikoʼ mix bikʼin kun xuʼulul u yáantkoʼon. Ku yaʼalik: «U tʼaan Dioseʼ kuxaʼan yéetel yaan u páajtalil» (Hebreoʼob 4:12).

¿Jaaj le baʼax ku yaʼalikoʼ? ¿Láayliʼ wa jeʼel u yáantkoʼon le Bibliaoʼ? ¿Yaan wa ta tʼaan uláakʼ libro maas maʼalob teʼ kʼiinoʼobaʼ? Le revista U Pʼíich Tulumil Kananaʼ yaan u núukik lelaʼ.