Le Testigoʼoboʼ maʼ chéen tiʼ máakoʼob ku yeʼeskoʼob u yutsiloʼobiʼ, baʼaxeʼ tak tiʼ in walakʼ peekʼoʼob. Junpʼéel kʼiineʼ teʼ carritooʼ yaan kaʼach juntúul koʼolel ku kʼaabaʼtik Elaine, letiʼeʼ tu tsʼáaj galletaʼob tiʼ tu kaʼatúulil in walakʼ peekʼoʼob. Yoʼolal leloʼ jeʼel baʼaxak kʼiin ka máankoʼon naatsʼ teʼ tuʼux yaan le Testigoʼoboʼ le mejen peekʼoʼoboʼ ku káajal u woʼoltikubaʼob tumen jach taak u binoʼob teʼ tuʼux ku siʼibiltiʼob le mejen galletaʼoboʼ.

Bey máanik wa jaypʼéel mesesoʼ. Le mejen peekʼoʼoboʼ kiʼimak u yóoloʼob yéetel le mejen galletaʼob ku siʼibiltiʼoboʼ yéetel teneʼ kiʼimak xan in wóol in tsikbal junsúutuk yéetel le Testigoʼoboʼ. Chéen baʼaleʼ láayliʼ kin wilik kaʼach maʼ in jach biskinba tu yéeteloʼobeʼ. Teneʼ 70 años yaanten kaʼachi yéetel maʼ jach in wojel baʼax ku creertik le Testigoʼoboʼ. Tumen tsʼoʼok u pʼatken kʼaasil le jejeláas religiónoʼob tuʼux tsʼoʼok in binoʼ tin tukleʼ maas maʼalob ka in xakʼalxokt le Biblia chéen tin juunaloʼ.

Teʼ kʼiinoʼoboʼ tin wilaj uláakʼ Testigoʼob yéetel u carritoʼob tiʼ jejeláas lugaroʼob teʼ kaajoʼ. Letiʼob xaneʼ jach utsoʼob yéetel jeʼel baʼaxak kʼáatchiʼil ka in beettiʼobeʼ ku núukikoʼobten yéetel le Bibliaoʼ, le oʼolal joʼopʼ in maas confiar tiʼ letiʼob.

Junpʼéel kʼiineʼ Elaineeʼ tu kʼáatajten: ‹A tuklikeʼ le baʼalcheʼoboʼ, ¿junpʼéel regalo wa ku taal tiʼ Dios?›. Teneʼ tin núukajtiʼ: ‹Claro de ke beyoʼ›. Letiʼ túuneʼ tu xokajten Isaías 11:6 tak 9. Teʼ súutukoʼ kʼexpaj bix in tuukul, chéen baʼaleʼ láayliʼ maʼ animarnajen in chʼaʼ junpʼéel publicación teʼ carritooʼ.

Desde leloʼ sáamsamaleʼ kex chéen jun chan súutukeʼ jach ku kiʼital in tsikbal yéetel Elaine bey xan yéetel Brent, u yíicham. Letiʼobeʼ tu yaʼaloʼobteneʼ maʼalob ka in xok Mateo tak Hechos utiaʼal in naʼatik baʼax u kʼáat u yaʼal u kuxtal máak jeʼex úuchik u kuxtal Cristooʼ. Teneʼ bey tin beetiloʼ. Maʼ xáanchajeʼ tin waʼalaj tiʼ Elaine yéetel tiʼ Brenteʼ jeʼel in xook tu yéeteloʼobeʼ. Leloʼ úuch tu chúumukil u añoil 2016.

Jach kin tsʼíiboltik kaʼach u kʼuchul u kʼiinil in xook yéetel in bin teʼ muchʼtáambaloʼoboʼ. Teneʼ jach kiʼimak in wóol ikil u páajtal kaʼach in kaanbal tiʼ le Bibliaoʼ. Le oʼolal le ka máan junpʼíit maas tiʼ junpʼéel añoeʼ okjaʼanajen. Bejlaʼeʼ 79 años yaanten yéetel in wojleʼ tiaʼanen ichil u jaajil religióneʼ. Jéeobaeʼ jach tsʼoʼok u bendecirken tumen tsʼoʼok u chaʼik in wantal ichil le máaxoʼob meyajtik tiʼ tuláakal yóokʼol kaaboʼ».