U Reino Dioseʼ junpʼéel gobierno tsʼaʼan teʼ kaʼan tumen Jéeoba Diosoʼ. Teʼ Bibliaoʼ ku yaʼalaʼaltiʼ xan «u Reinoil kaʼan» (Marcos 1:14, 15; Mateo 4:17). Kex óoliʼ tsolaʼan jeʼel bix u gobierno wíinikeʼ, u jaajileʼ maas maʼalob tiʼ jeʼel baʼalak gobiernoil yaan way Luʼumeʼ.

•   Máaxoʼob kun gobernaroʼob. Dioseʼ tsʼoʼok u yéeyik Jesucristo utiaʼal u beetik u Reyil le Reinooʼ. Letiʼeʼ maas yaan u poder tiʼ jeʼel máakalmáak gobiernoil tsʼaʼan tumen wíinikeʼ (Mateo 28:18). Jesúseʼ ku meyajtiʼ u poder utiaʼal u beetik baʼaloʼob maʼalobtak. Tsʼoʼok u yeʼesik jach maʼalob bix u nuʼuktaj yéetel ku chʼaʼik óotsilil (Mateo 4:23; Marcos 1:40, 41; 6:31-34; Lucas 7:11-17). Yáanal u nuʼuktaj Dioseʼ, Jesúseʼ tu yéeyaj máakoʼob jejeláas tuʼux u taaloʼob utiaʼal u binoʼob kaʼan yéetel ka u gobernartoʼob le Luʼum junmúuchʼ tu yéeteloʼ (Apocalipsis 5:9, 10).

•   Bukaʼaj tiempo kun gobernar. U gobierno Dioseʼ maʼ jeʼex u gobierno wíinikeʼ tumen «mix bikʼin kun xuʼulsbiltiʼ» (Daniel 2:44).

•   Máaxoʼob kun gobernarbiloʼob. Jeʼel máaxak ka u beet baʼax uts tu tʼaan Dioseʼ, kex jeʼel tuʼuxak ka taalakeʼ (Hechos 10:34, 35).

•   U leyoʼob. Le leyoʼob wa mandamientoʼob yaan ichil u Reino Diosoʼ maʼ tu chaʼik u beetaʼal baʼaloʼob kʼaastak yéetel ku yáantaj utiaʼal ka yanak junpʼéel maʼalob kuxtal tiʼ máak. Junpʼéel tiʼ le leyoʼoboʼ ku yaʼalik: «‹Kʼaʼabéet a yaabiltik Jéeoba yéetel tuláakal a puksiʼikʼal, yéetel tuláakal a kuxtal bey xan yéetel tuláakal a tuukul›. Lelaʼ letiʼe mandamiento maas nojochoʼ yéetel letiʼe yáax baʼax ku yaʼalik le Leyoʼ. Le u kaʼapʼéeloʼ chíikaʼan tiʼ le yáax junpʼéeloʼ, letiʼ lelaʼ: ‹Kʼaʼabéet a yaabiltik a wéet máakil jeʼex a yaabiltikabaeʼ›» (Mateo 22:37-39). Jeʼex k-ilkoʼ wa le máaxoʼob yanoʼob yáanal le Reino u yaabiltmoʼob Dios yéetel u yéet máakileʼ yaan u tratarkoʼob maʼalob tuláakal máak.

•   Bix u kaʼansaj. U Reino Dioseʼ maʼ chéen ku yaʼalik baʼax unaj u beetaʼaliʼ baʼaxeʼ ku kaʼansik xan bix unaj u beetaʼal (Isaías 48:17, 18).

•   Baʼax u biilal. U Reino Dioseʼ maʼ junpʼéel gobierno tsʼaʼan utiaʼal u ayikʼaltal le máaxoʼob ku gobernaroʼoboʼ. Baʼaxeʼ tsʼaʼan utiaʼal u béeykuntik baʼax u kʼáat Dios. Ichil lelaʼ táakaʼan u tsʼáaik kuxtal minaʼan u xuul tiʼ le máaxoʼob beetik baʼax uts tu tʼaanoʼ (Isaías 35:1, 5, 6; Mateo 6:10; Apocalipsis 21:1-4).