Teʼ Bibliaoʼ maʼ tu meyaj le tʼaan aborto utiaʼal u yúuchul tʼaan tiʼ u yéemsaʼal juntúul chaambal maʼ kʼuchuk u kʼiinil u síijiliʼ. Chéen baʼaleʼ yaʼab tekstoʼob ku yáantkoʼon k-naʼat bix u yilik Dios le kuxtaloʼ, tak u kuxtal juntúul chaambal maʼ síijikiʼ.

 Le kuxtaloʼ junpʼéel u siibal Dios (Génesis 9:6; Salmo 36:9). Tu táaneʼ jach u koʼoj u tojol u kuxtal tuláakal baʼal, tak u kuxtal le chaambaloʼob tiaʼanoʼob tu matriz u maamaʼoboʼ. Le oʼolaleʼ le kéen abortartaʼak juntúul chaambaleʼ tu táan Dioseʼ táan u kíimsaʼal.

 Le Ley tu tsʼáaj Dios tiʼ le israelitaʼoboʼ ku yaʼalik: «Wa jujuntúul máakoʼob táan u baʼateloʼob yéetel ku lastimarkoʼob juntúul koʼolel embarazada, yéetel yoʼolal leloʼ ku síijil u chaambal antes tiʼ u kʼuchul u kʼiinil. Wa maʼ kíim le koʼolel mix le chaambaloʼ, le máax beet le looboʼ unaj u boʼotik tu táan le juezoʼob le bajux kun kʼáatbiltiʼ tumen u yíicham le koʼoleloʼ. Pero wa ku kíimil le koʼolel wa le chaambaloʼ unaj xan u kíimsaʼal le máax beet le looboʼ» (Éxodo 21:22, 23). a

•  ¿Desde baʼax kʼiin ku káajal u kuxtal juntúul máak?

•  ¿Jeʼel wa u perdonartaʼal juntúul koʼolel tsʼoʼok u abortareʼ?

•  Wa tu chiʼ kíimil yaan le maamatsil wa le chaambaloʼ, ¿maʼalob wa ka abortarnak?

 Tu táan Dioseʼ u kuxtal juntúul chaambaleʼ ku káajal desde kéen pʼáatak embarazadail juntúul koʼolel. Teʼ Bibliaoʼ le kéen tʼaanak Dios yoʼolal juntúul chaambal maʼ síijikeʼ ku chʼaʼchiʼitik junpáay tiʼ u maama. Koʼox ilik jujunpʼéel ejemploʼob eʼesik tu táan Dioseʼ igual u kuxtal juntúul chaambal maʼ síijikiʼ yéetel u kuxtal juntúul chaambal tsʼoʼok u síijil.

•   Juntéenjeakeʼ rey Davideʼ tu yaʼalaj tiʼ Dios: «Ta wilen antes in síijil» (Salmo 139:16). Jeʼex k-ilkoʼ antes tiʼ u síijil Davideʼ tu táan Dioseʼ letiʼeʼ kuxaʼaniliʼeʼ, jeʼex kuxaʼanil u maasil máakoʼoboʼ.

•   Koʼox ilik uláakʼ ejemplo. Dioseʼ tsʼokaʼaniliʼ u yaʼalik baʼax meyajil ken u beet profeta Jeremías antes tiʼ u síijileʼ. Jéeobaeʼ tu yaʼalajtiʼ: «Teneʼ in kʼaj óolech desde tiaʼanech tu nakʼ a maamaeʼ, yéetel tin yéeyech antes tiʼ a síijil utiaʼal a beetik junpʼéel nojoch meyaj, utiaʼal a beetkaba profetail tiʼ le kaajoʼoboʼ» (Jeremías 1:5).

•   Lucas, juntúul tiʼ le máaxoʼob tsʼíibt le Bibliaoʼ, doctor kaʼachi. Le tʼaan ich griego meyajnajtiʼ utiaʼal u chʼaʼchiʼitik juntúul chaambal maʼ síijikoʼ láayliʼ letiʼe meyajnajtiʼ utiaʼal u chʼaʼchiʼitik juntúul chaambal tsʼoʼok u síijiloʼ (Lucas 1:41; 2:12, 16).

 Jeʼeleʼ, Dioseʼ jeʼel u perdonartik le koʼoleloʼob tsʼoʼok u abortaroʼoboʼ. Maʼ xaaneʼ le kéen u kanoʼob bix u yilik Dios le kuxtaloʼ jeʼel u jach yaatal u yóoloʼob yoʼolal le baʼax tu beetoʼoboʼ. Chéen baʼaleʼ maʼ unaj u yuʼubikubaʼob beyoʼ. Le Bibliaoʼ ku yaʼalik: «Jéeobaeʼ ku chʼaʼik óotsilil, jach ku yeʼesik u yutsil [...]. Jeʼex bukaʼaj náachil yanil lakʼin tiʼ chikʼinoʼ, letiʼe bukaʼaj xan tsʼoʼok u náachkuntik tiʼ toʼon le baʼaxoʼob maʼ maʼalob k-beetmoʼ» (Salmo 103:8-12). b Jeʼex k-ilkoʼ Jéeobaeʼ yaan u perdonartik le máaxoʼob jach tu jaajil ku arrepentiroʼob tiʼ le baʼaxoʼob maʼ maʼalobtak u beetmoʼoboʼ, ichileʼ táakaʼan tak le abortooʼ (Salmo 86:5).

 Le Bibliaoʼ ku yaʼalikeʼ jach koʼoj u kuxtal juntúul chaambal maʼ síijikiʼ. Le oʼolaleʼ kex ka aʼalaʼak tiʼ le maamatsil en riesgo yanil letiʼ bey xan le chaambaloʼ maʼ unaj u abortariʼ.

 ¿Kux túun wa tu yorail táan u síijil le chaambal ku kʼaʼabéettal u yilaʼal wa yaan u salvartaʼal le chaambal wa le maamatsiloʼ? Leloʼ maʼ jach suuk u yúuchliʼ, chéen baʼaleʼ wa ka úuchkeʼ chéen letiʼe atantsil yéetel le íichamtsil unaj u chʼaʼtuklikoʼob baʼax ken u beetoʼoboʼ.