Maʼ kun xáantaleʼ yaan u yantal jeetsʼelil way Luʼumeʼ, chéen baʼaleʼ lelaʼ u Reino Dios kun beetik maʼ u gobierno wíinikiʼ. Le Reinoaʼ tiaʼan teʼ kaʼanoʼ yéetel u Reyileʼ Jesús. Ilawil baʼax ku yaʼalik le Biblia yoʼolal le baʼax ken u beet le Reinoaʼ.

1.   Dioseʼ yaan u «beetik u xuʼulul u yantal baʼateʼel tiʼ tuláakal yóokʼol kaab». Beyoʼ yaan u beetik u yantal «jeetsʼelil tiʼ le máaxoʼob ku lúubloʼob utsil» tiʼoʼ (Salmo 46:9; Lucas 2:14).

2.   U Reino Dioseʼ yaan u gobernartik le Luʼumaʼ yéetel yaan u beetik u xuʼulul u pʼektikuba máak (Daniel 7:14).

3.   Jesús, u Reyil u Reino Dioseʼ, ku yaʼalaʼaltiʼ «u Príncipeil Jeetsʼelil». Letiʼeʼ «mantatsʼ ken u beet u yantal jeetsʼelil» way Luʼumeʼ (Isaías 9:6, 7).

4.   Yáanal le Reinooʼ, le máaxoʼob chéen baʼateʼel ku beetkoʼoboʼ yaan u xuʼulsaʼaltiʼob, tumen Dioseʼ «u pʼekmaj le máaxoʼob uts tu tʼaan u beetkoʼob looboʼ» (Salmo 11:5; Proverbios 2:22).

5.   Dioseʼ yaan u beetik u yantal jeetsʼelil ichil le máaxoʼob beetik baʼax uts tu tʼaanoʼ. Le Bibliaoʼ ku yaʼalik baʼax kun úuchul: «U espadaʼobeʼ yaan u sutkoʼob u nuʼukulil u péeksaʼal luʼum, u lanzaʼobeʼ yaan u sutkoʼob u nuʼukulil podar. Maʼ ken u líiʼs u espada mix junpʼéel kaaj tu contra uláakʼ kaaj, mix kun seguer u kankoʼob baʼateʼel» (Isaías 2:3, 4).

 U millonesil u testigoʼob Jéeobaeʼ táan u yilik u kuxtaloʼob ich jeetsʼelil (Mateo 5:9). Toʼoneʼ kajaʼanoʼon ich maas tiʼ doscientos treinta luʼumiloʼob yéetel mix juntúul jeʼel u yóotik u kíims u yéet máakileʼ.