«Maʼ a sen chiʼichnaktaleʼex tu yoʼolal mix baʼal, baʼaxeʼ aʼaleʼex tiʼ Dios ich oración tuláakal baʼax a kʼáateʼex. Kʼáat óolneneʼex tiʼ letiʼ yéetel tsʼáaʼex gracias tiʼ, beeteʼex yéetel tuláakal a puksiʼikʼaleʼex. Bey túunoʼ le jeetsʼelil maʼ tu páajtal u naʼataʼal tumen wíinik ku tsʼáaik Diosoʼ, yaan u kanáantik a puksiʼikʼaleʼex yéetel a tuukuleʼex tu yoʼolal Cristo Jesús» (Filipenses 4:6, 7, Túumben Luʼum).

 «Maʼ a sen tuukuleʼex tu yoʼolal mix baʼal, baʼaleʼ tuláakal baʼax kʼaʼabéet teʼexeʼ aʼaleʼex mantatsʼ tiʼ [Dios] ich payalchiʼ, kʼáat óolneneʼex tiʼ yéetel tsʼáaʼex gracias tiʼ xan. Ku túuneʼ bíin u tsʼáateʼex jeetsʼel óolal, lelaʼ maas nojoch tiʼ le ku páajtal u naʼatik máakoʼ; le jeetsʼel óolal bíin u kanáant a puksiʼikʼaleʼex yéetel a tuukuleʼex tiʼ Cristo Jesús» (Filipenses 4:6, 7, Quiliʼich Biblia ich Maya).

 Le máaxoʼob creertik Diosoʼ jeʼel u páajtal u oraroʼob tiʼ letiʼ utiaʼal u kʼáatkoʼob áantaj le kéen jach chiʼichnakchajkoʼobeʼ. Dioseʼ ku yaʼalikeʼ yaan u tsʼáaiktiʼob jeetsʼelil, lelaʼ yaan u yáantkoʼob utiaʼal maʼ u sen chiʼichnaktaloʼob. Tsʼoʼoleʼ yaan u kanáantik u tuukuloʼob bey xan u puksiʼikʼaloʼob wa le baʼaxoʼob ku tuklikoʼoboʼ bey xan le baʼaxoʼob ku yuʼubikoʼoboʼ. Le versículo 6, ku yaʼalik jujunpʼéel clase oraciónoʼob jeʼel u yáantik máak utiaʼal ka yanaktiʼ jeetsʼelileʼ.

 Aʼaleʼex tiʼ Dios tuláakal baʼax a kʼáateʼex. Yaan oraciónoʼobeʼ ku beetik máak utiaʼal u kʼáatik wa baʼax tiʼ Dios. Lelaʼ jeʼel u páajtal u beetaʼaloʼob tiʼ jeʼel baʼalak súutukileʼ, chéen baʼaleʼ kʼaʼabéet maʼ u bíin tu contra le baʼax u kʼáat Diosoʼ wa le baʼax ku yaʼalik le Bibliaoʼ (1 Juan 5:14).

 Kʼáat óolneneʼex tiʼ Dios. Le kéen orarnak máak beyaʼ yéetel u jaajil u yóol ku sen kʼáat óoltik tiʼ Dios ka áantaʼak. Lelaʼ jeʼel u páajtal u beetik máak teʼ súutukiloʼob jach estresadooʼ bey xan wa jach yaj le baʼax ku aktáantikoʼ. Jesúseʼ bey tu beetiloʼ (Hebreos 5:7). Le oraciónoʼob beyaʼ yaʼab u téenel ku beetik máak, maʼ chéen juntéeniʼ.

 Tsʼáaʼex gracias. Le oraciónoʼob beyaʼ ku meyaj utiaʼal k-tsʼáaik gracias tiʼ Dios yoʼolal le baʼaxoʼob ku tsʼáaiktoʼonoʼ bey xan yoʼolal le baʼaxoʼob ku beetik t-oʼolaloʼ. Wa k-tuukul tiʼ le bukaʼaj baʼaloʼob ku beetik Dios t-oʼolaloʼ maas maʼ ken k-sen chiʼichnaktal yéetel jeʼel u kiʼimaktal k-óoleʼ (1 Tesalonicenses 5:16-18).

 Dioseʼ ku núukik k-oraciónoʼob le kéen u tsʼáatoʼon u ‹jeetsʼelil maʼ tu páajtal u naʼataʼal tumen wíinikoʼ›. Le jeetsʼelil beyaʼ ku yuʼubik máak wa maʼalob yanil tu táan Dios yéetel wa maʼalob u biskuba tu yéetel (Romanos 15:13; Filipenses 4:9). Le jeetsʼelilaʼ «maʼ tu páajtal u naʼataʼal tumen wíinik» tumen tiʼ Dios u taal yéetel jeʼel u yáantkoʼon tak teʼ súutukiloʼob k-tuklik maʼ tu béeytaloʼ.

 Le versículo 6, ku yaʼalikeʼ le jeetsʼelil ku tsʼáaik Diosoʼ yaan u ‹kanáantik k-puksiʼikʼal›. Le tʼaan ich griego ku traducirtaʼal ‹kanáantik›, ku meyaj utiaʼal u yúuchul tʼaan tiʼ le baʼax ku beetik le soldadoʼob utiaʼal u kanáantkoʼob junpʼéel kaaj yaan u pakʼiloʼoboʼ. Le jeetsʼelil ku tsʼáaik Dios xanoʼ ku kanáantik k-tuukul yéetel k-puksiʼikʼal wa le baʼaxoʼob k-tuklikoʼ bey xan le baʼaxoʼob k-uʼuyikoʼ. Tsʼoʼoleʼ ku yáantkoʼon utiaʼal k-aktáantik le problemasoʼ bey xan utiaʼal maʼ k-sen chiʼichnaktal.

 Le jeetsʼelil ku taal tiʼ Diosoʼ ku kanáantkoʼon «tu yoʼolal Cristo Jesús» tumen tu yoʼolal letiʼeʼ ku páajtal k-bisikba yéetel Dios. Jesúseʼ tu kʼubaj u kuxtal utiaʼal u salvartik wíinik tiʼ le kʼebanoʼ, le oʼolaleʼ wa k-tsʼáaik k-fe tiʼ letiʼeʼ jeʼel u páajtal k-disfrutartik le bendiciónoʼob ken u tsʼaa Diosoʼ (Hebreos 11:6). Tsʼoʼoleʼ tu yoʼolal Jesúseʼ ku páajtal k-orar tiʼ Jéeoba yéetel k-náatsʼal tiʼ. Jesúseʼ tu yaʼalaj: «Mix máak ku náatsʼal tu yiknal le Taata wa maʼ tin woʼolaloʼ» (Juan 14:6; 16:23).

 U cartail Filipenseseʼ tsʼíibtaʼab tumen apóstol Pablo tiʼ le sukuʼunoʼob yanoʼob Filiposoʼ. a Teʼ capítulo 4, Pabloeʼ ku yaʼaliktiʼob ka kiʼimakchajak u yóoloʼob mantatsʼ, tsʼoʼoleʼ ku yaʼalik jach kiʼimak u yóol tu yoʼolal le utsil tsʼoʼok u yeʼeskoʼob tiʼoʼ (Filipenses 4:4, 10, 18). Tu yaʼalaj xan tiʼobeʼ utiaʼal ka yanaktiʼob le jeetsʼelil ku tsʼáaik Diosoʼ kʼaʼabéet u kʼáatkoʼob tiʼ Dios ich oración. Tsʼoʼoleʼ tu yaʼalaj xan tiʼob baʼaxoʼob unaj u beetkoʼob yéetel tiʼ baʼaxoʼob unaj u tuukuloʼob utiaʼal ka kanáantaʼakoʼob tumen u ‹Diosil le jeetsʼeliloʼ› (Filipenses 4:8, 9).